2024 කියන්නේ ප්රවීණ කලාකරුවන්, ඒ වගේම අපි හැමදෙනාම වාගේ තදින් ඇලුම් කළ කලාකරුවන් කිහිප දෙනෙක්ම ජීවන ගමනට ගුඩ් බායි කියලා නොඑන ගමන් ගිය අවුරුද්දක්. Sri Lanka Latest News
මන මෝහනීය ගී නදින් සුවහසක් සිත්සතන් සැනසූ ප්රවීණ ගායක සේනක බටගොඩ කියන්නෙත් එහෙම යන්න ගිය සුවිශේෂ කෙනෙක්. ඔහු ගියේ හරි හදිසියෙමයි. කවුරුත් හිතපු නැති වෙලාවකයි.
‘අයියෝ අපරාදේ…’
ඔහුගේ මරණය අහපු හැමෝම වාගේ එහෙම කිව්වා. අසීමිතව ඔහුට ඒ ගාම්භීර හඬට ප්රිය කළ දහස් ගණන් රසිකයන් අතර ජනකාන්ත ප්රවීණ නිළි තාරකාවක වූ ‘නාඩගම්කාරයෝ’ ටෙලියේ සුදු චූටි හෙවත් සෙනාලි ෆොන්සේකාත් හිටියා. සෙනාලි ඇගේ මුහුණු පොතේ වාගෙම ඉන්ස්ටග්රෑම් එකෙත් සේනක බටගොඩ ගැන හරිම සංවේදී සටහන් පවා කිහිප වතාවක්ම මුදාහැර තිබුණා. ‘හාට්’ එකේ මෙහෙම සටහනක් තියන්න හිතුණෙත් ඈ කතාබහකට ‘මව්රට’ හාට් එකට ආව වෙලාවකත් සේනක බටගොඩගේ සිත්කලු හඬ ගැන වාගෙම සුමධුර ගී පෙළහර ගැනත් හිතට දැනෙන තාලෙට කතා කළ නිසයි.
‘සේනක බටගොඩ කියන්නේ මියගිය කෙනකුට වුණත් පණ දෙන්න පුළුවන් තරමේ හැඟීම්බර හඬකින් සින්දු කියන්න පුළුවන් ගායකයෙක්. මම ඔහුගේ ගායන ශෛලියට තදින් ප්රිය කරන විශේෂ රසිකාවක්. විශේෂයෙන්ම ඒ රසිකත්වය තව තවත් අලුත් වුණේ නාඩගම්කාරයෝ ෂූටින්වලට ගියාම. නිවාඩු පාඩු විරාමයක සජිත අයියලා නිතරම වාගේ ගායනා කළේ සේනක බටගොඩගේ සින්දුමයි. ඒ වෙලාවට මම පුදුමාකාර ආසාවකින් ඒවා රසවින්දා. ඔහු කරන අලුත් නිර්මාණ ගැන පවා මම උනන්දු වුණේ ආකර්ෂණීය උමතුවකින් වාගෙයි. නිහඬ රෑක ඔහුගේ ගාම්භීර හඬ ස්වරයට සවන් දෙනකොට හිතට දැනෙන සුවය වචනවලින් කියන්න බැරි තරමයි. සත්තකින්ම ඒ තරම් මනරම් ප්රවීණ ගායන ශිල්පියකුගේ වියෝව කියන්නේ අතිවිශාල පාඩුවක්. ලොකු දුකක්. ඔහුගේ රිද්මය, හඬ, වචන හරිම හැඟීම්බරයි. ඒ වගේම ඒ හඬ කාටවත් අනුකරණය කරන්න බැහැ. කාටවත් හොරකම් කරන්නත් බැහැ. සේනක බටගොඩ කියන්නේ බ්රෑන්ඩ් එකක්.
සෙනාලි බොහොම සන්සුන්ව සේනක බටගොඩගේ වටිනාකම හා දුක්බර වියෝව ගැන කතා කෙරුවේ එහෙමයි.
සෙනාලි කියන්නේ ඇත්ත. අදටත් සේනක බටගොඩගේ සින්දුවක් වාදනය වෙනවා ඇහුණාම අපි හැමෝම වාගේ වොලියුම් එක ටිකක් වැඩි කරනවා. කරන වැඩේ ටිකකට හෝ නතර කරලා එයට වුවමනාවෙන් කන් දෙනවා.
‘අයියෝ… පොර නෑනේ ඉතින්…’
කියලත් හිතට අලුතෙන් මතක් කරලා දෙනවා. සෙනාලි කියන්නා වාගෙම ‘යං යං යං අපි සැනලසිල්ලේ…’ වාගේ නම්බර්ස් අහන කොට අනිවාර්යයෙන්ම සේනක බටගොඩ බ්රෑන්ඩ් එකක්ම තමයි කියලා හිතෙනවා.
දමයන්ති රේණුකා ප්රනාන්දු
