ප්රවීණ සිනමා සහ ටෙලි නළු ජීවන් කුමාරතුංග ප්රධාන චරිතයෙන් දායක වන ‘ජීවා’ චිත්රපටය තව නොබෝ දිනකින් දිවයින පුරා සිනමා ශාලාවල තිරගත වීමට නියමිතය. Sri Lanka Latest News
සියලු රස සමගින් එහි තිර පිටපත සකසා ඇත්තේ කැළුම් ආර්යන් කුලරත්න විසිනි. ‘ජීවා’ ජීවන්ගේම නිර්මාණ වෑයමක් වන මේ නවතම චිත්රපටය නිෂ්පාදනය කොට ඇත්තේ එස්.ජේ. ෆිල්ම්ස් විසින්ය. ජීවන් සමග සංගීතා වීරරත්න, පුබුදු චතුරංග සහ ක්ලීටස් මෙන්ඩිස් ප්රධාන චරිත මවන ‘ජීවා’හි දක්ෂ චරිතාංග නළුවකු වන දර්ශන් ධර්මරාජ් කැපීපෙනෙන රංගන මෙහෙවරක යෙදෙන්නේ දුෂ්ටයා ලෙසිනි.
විශේෂයෙන්ම ‘ජීවා’ ත්රාසජනක දර්ශනයන්ගෙන් අනූනය. මෙහි වීරයා ජීවන්ය. විසිල් පාර නොගහා බැරි සටන් ජවනිකා, ලොමුදැහැගැන්වෙන දර්ශන, ත්රාසය, කුතුහලය චිත්රපටය පුරා තත්පරයෙන් තත්පරය විහිද යයි. මනහර වූ සංගීතය සුනිල් ධර්මසේනගෙනි.
ත්රාසජනක සිනමා රසයට ඇලුම් කරන සැමට වගේම පවුලේ හැමෝටම එක පෙළට ඉඳගෙන බලන්න පුළුවන් පවුලක කතාවක් ‘ජීවා’ ප්රේක්ෂකයන් හමුවට ගෙන එයි.
සාරංගා සහ නැවත හමුවෙමු චිත්රපට තුළින් දුෂ්ට චරිත නිරූපණයට පැමිණි ජීවන් එයට පසුව ඊට කොටු නොවී දුෂ්ටයාගෙන් පෙම්වතාටත්, පෙම්වතාගෙන් වීරයාටත් ප්රවිෂ්ට වෙමින් සිංහල චිත්රපට කලාවේ පෙරළිකාර මං සලකුණු තැබුවේ මීට දශක කීපයකට ඉහත අපූරු මතක සටහන් සිය රසිකයන් හමුවට ගෙන එමිනි. මඳ කලකට සිනමාවෙන් ඈත්ව සිටියද ජීවන්ට මනාප රසිකයන් තවමත් ඔහුගේ ප්රවේගකාරී රංගන ශෛලිය දැකගැනීමට කැමැත්තෙන් සිටින බව වැටහෙන්නේ ‘ජීවා’ ටේ්රලරයට ඔවුන් දක්වා තිබෙන ප්රතිචාර අනුවය.
ඉතසිතින් අපි පතන්නෙමු,
ජීවා සමග ජීවන්ට රජ ගමනකට සුබ පැතුම්…
මල්මි කෞෂල්යා
