ප්රවීණ ගායක ග්රේෂන් ආනන්දගේ පුතා මාරියෝ ආනන්ද මොකක්දෝ අලුත් තාලේ වැඩකට අත ගහන්න යනවා කියලා ආරංචියක් තිබුණා. වැඩි සද්දයක් නැති තාලෙට පාඩුවෙ හිටියට මාරියෝ ආනන්ද කියන්නේ සුපිරිම වැඩ්ඩෙක්. ඒක බොහෝ දෙනා මුලින්ම තේරුම් ගත්තේ ‘ගිනි අවි සහ ගිනි කෙළි’ ටෙලි ඩ්රාමා එකේ ඔහු කළ සංගීත අධ්යක්ෂණයෙන් පස්සෙයි. ඒ විතරක් නෙවෙයි ‘මා නොවන මම’ වැඩසටහනට ඇවිදින් ඔහු කළ ගී ප්රසංගයටද විශාල ප්රතිචාරයක් ලැබුණා.Sri Lanka Latest News
මොකක්ද දැන් මේ වැඩි සද්දයක් නැතිව මාරියෝ අත ගහන්න හදන අලුත් වැඩේ? එයාගෙන්ම අහලා දැනගනිමු ඒක.
ඉතින් මාරියෝ කොහොමද අලුත් තොරතුරු?
වරදක් නැහැ. හොඳින් ඉන්නවා. මියුසිකල් ෂෝවලටත් දැන් දිගින් දිගටම සහභාගි වෙනවා.
ඒ කියන්නේ කාලයක් ඔබ සංගීත ප්රසංග වර්ජනය කරලා තිබුණද?
අයියෝ නැහැ. මම මා තුළ මීට කලකට ඉහත පොඩි සීමාවක් හදාගෙන හිටියා මියුසිකල් ෂෝවලට සහභාගි වුණේ නැහැ. අලුත් යමක් කරන්න හිතුවේ නැහැ. කෙටියෙන් කියනවා නම් කලා කටයුතුවලින් ටිකක් ඈත්වෙලා හිටියා.
හේතුව මොකක්ද ඒකට?
මම පොඩි සමාජ සේවාවක නිරතව සිටියා. පාසල් යන දරුවන්ව මත් උවදුරින් බේරාගැනීමේ වෑයමයි එම සේවාවේ තිබුණේ. මම විතරක් නෙවෙයි තව බොහෝ දෙනෙක් ඒ සඳහා මට සහාය වුණා.
තාත්තා මතට ඇබ්බැහිව විඳපු දුක නිසාද ඒ පියවර ගත්තේ?
බොහෝ දුරට ඒ සංවේදී කාරණයද ඊට හේතු වුණා. එයින් මිදෙන්න බැරිව ඔහු මැදිව සිටි අසරණකම, ඒ පීඩනය මම දැක්කා. එතකොට මම ඉස්කෝලේ යන පොඩි කොල්ලෙක්. හැමදාමත් තාත්තා මට කිව්වේ ‘කවදාවත් බීමට ඇබ්බැහි වෙන්න එපා මාරියෝ, මේවා කටේ තියන්න එපා, ගැලවෙන්න බැරි පාපයක් ඒක’ කියලා. තාත්තා හුඟක් සංවේදී විදියට දුන්න ඒ අවවාදය මගේ හිතට තදින්ම වැදුණා.
‘අවවාදයට වඩා ආදර්ශය උතුම්’ කියලා ඔබ ඒ වෙනුවෙන් ආදර්ශවත් මෙහෙවරක නියැළුණාද?
එහෙම හිතෙනවා මට.
ළාබාල යෞවනයකු ලෙස සංගීත අධ්යක්ෂණයට පිවිසුණු හපන්කම ගැනත් මතක් කරමු?
ඔව්, ‘ගිනි අවි සහ ගිනි කෙළි’ ටෙලි ඩ්රාමා එකේ මියුසික් ඩිරෙක්ටර් විදියට වැඩකරන කොට මගේ වයස අවුරුදු 21යි. මම ඒ නිර්මාණ මෙහෙවරට හවුල් වුණේ පුදුමාකාර සතුටකින්. ඒ වගේම හැකි උපරිමය මම කළා.
හෝ ගාලා ප්රශංසා ආවා, ප්රවීණයෝ පවා ඔබව අගය කළා?
සත්තකින්ම ලොකු සතුටක් දැනුණා. හිතුවේ නැති විදියට ප්රතිචාර ලැබෙන්න ගත්තා. ඒත් කියන්න දුක හිතෙන කාරණයක්ද මෙතැනදී මතකයට එනවා. ඒ තමයි 2021 දෙරණ ටෙලි සම්මාන උළෙලට මා සංගීත අධ්යක්ෂණය කළ නිර්මාණය ඇතුළත්ව තිබුණත් මට ඊට සහභාගි වෙන්න ආරාධනා ලැබුණේ නැහැ. සම්මාන හෝ කුසලතා නැති වුණත් මං වෙනුවෙන් ඉන්විටේෂන් එකක් එදා දුන්නෙ නැත්තෙ ඇයි කියන එක අදටත් හිතාගන්න අමාරුයි. හැබැයි ඒ ගැන අමනාපයක් නම් නැහැ.
මොනවට අමනාප වෙන්නද ඔබට ඉන්නවා හොඳ රසික පිරිසක්?
ඒක පුදුමාකාර ආදරයක්. මාරියෝ ආනන්ද තවම මහ ලොකු දෙයක් කරලත් නැතුව මේ තරම් රසික ප්රතිචාරයක් මොනවට ලැබෙනවද කියලා හිතාගන්න බැහැ ඇත්තටම.
මාරියෝ ආනන්ද ලොකු වැඩකට අතගහන්න යනවාය කියලා ආරංචියක් දැන් නම් තියෙනවා?
ඔව්. ටෙලි නිර්මාණයකට මැදි වෙලයි ඉන්නේ.
විස්තර ටිකක් කියමු මාරියෝ?
තවම වැඩි ප්රචාරයක් දෙන්න අදහසක් නැහැ. මොකද පොඩි සර්ප්රයිස් එකක් විදියටයි මේ නිර්මාණය ටෙලිකාස්ට් කරන්න යන්නේ. ඒත් මං පුංචි තොරතුරු ටිකක් කියන්නම්. මේක වෙනස් තාලේ නිර්මාණයක්. ප්රවීණයන් බොහොමයක් රඟපානවා. මේ දවස්වල ටෙලියෙ පබ්ලිසිටිවලට දුවනවා පනිනවා. මා සමග එක්ව සිටින බොහෝ දෙනකුගේ සහාය මත තමයි හැම දේම කෙරෙන්නේ. ඩ්රග්ස් ගැන තමයි තිර පිටපත මූලික වෙලා තියෙන්නේ.
ඔබ ඊට දායකව ඇත්තේ මොන ආකාරයටද?
කිව්ව විස්තර මදැයි ඉතින් ඔය. ඉතිරි හැම දේම ඇස් දෙකෙන් බලාගන්න පුළුවන්. කුතුහලය තාත්විකයි, අහම්බය සුන්දරයි. ඒ හින්දා මෙතැනින් නවතිමු.
හොඳයි, සුබ පතනවා සියල්ල සාර්ථක වෙන්න කියලා…
බොහොමත්ම ස්තුතියි. අප සැමගේ ප්රාර්ථනයද එහි සාර්ථකත්වයයි.
මල්මි කෞශල්යා
