පාසල් කාලයේදී වේදිකාවට පෙම්බැඳි ඇය, අද වනවිට පුංචි තිරය මෙන්ම සිනමාවත් තමන්ගේ රංගන ප්රතිභාවෙන් හැඩකරන දක්ෂ ශිල්පිනියකි. කැලණිය විශ්වවිද්යාලයෙන් ශාස්ත්රීය දැනුම ලබා, වෘත්තියෙන් ගුරුවරියක ලෙස සේවය කරන ඇය, කලාව සහ ජීවිතය සමබරව පවත්වාගෙන යන අපූරු චරිතයකි. මේ දිනවල තිරගත වන ‘ෆාදර්’ චිත්රපටයේ ඇය කළ රංගනය මේ දිනවල බොහෝ දෙනකුගේ අවධානයට ලක්ව තිබේ. ඇය නමින් ආශා දිල්රුක්ෂි. ඇය සමගයි ‘හාට්’ අපේ රසබර කතාබහ.Sri Lanka Latest News
ඉතින් ආශා මේ දවස්වල වැඩකටයුතු මොනවද?
පසුගිය දින කිහිපයේ කෙටි චිත්රපටයක් එක්ක ටිකක් කාර්යබහුල වෙලා හිටියේ. මේ දවස්වල ඉස්සරහට කරන්න ඉන්න ටෙලි නිර්මාණයක පිටපතක් එක්ක කාලය ගතකරමින් ඉන්නවා.
මුළින්ම කියමු රංගනයට එන්න පාර හැදුණු විදිය ගැන?
මට රංගනයට එන්න පාර හැදෙන්නේ පාසල් කාලෙදි. හැබැයි පාසලෙන් පිටදි තමයි මට මේ අවස්ථාව ලැබෙන්නේ. ඒ දමිත් රත්නායක කියන කෙටි නාට්යකරුවාගේ ‘මං කොල්ලෙක්’ කියන කෙටි නාට්යයෙන්. ඒක මගේ පළමු රංගනය වගේම අභියෝගාත්මකම රංගනය කිව්වොත් නිවැරදියි. ‘පැමිණිල්ලක් දාමුද?’ ‘ඩොලර් හීන’ වගේ කෙටි නාට්යවලින් යෞවන කෙටි නාට්ය උළෙල සහ රාජ්ය නාට්ය උළලෙහි අවසන් වටයට එන්න පුළුවන් වුණා. යොවුන් නාට්ය උළෙලේ සහ හොඳම සහාය නිළියට නිර්දේශ වීම් පවා ඒවායෙන් ලැබුණා.
‘ෆාදර්’ චිත්රපටයේ ඔබේ රංගනය ගැනත් කතා කරමු?
චමින්ද ජයසූරියගේ ‘ෆාදර්’ චිත්රපටය මේ වනවිට රටේ වැඩි කතාබහක් ඇතිකරන්න සමත් වුණු චිත්රපටය බවට පත්වෙලා තියෙනවා. චිත්රපටය බලපු බොහෝ දෙනා මගේ රංගනය දැකලා මාව සමාජ මාධ්ය ඔස්සේ හොයලා අහලා තිබුණා. සෑහෙන හොඳ ප්රතිචාර තවමත් ලැබෙමින් තියෙනවා. සිනමාවේ දැවැන්තයන් එක්ක කරන්න ලැබුණු පුංචිම කොටස වුණත් මතක හිටින රංගනයක් ඉදිරිපත් කළා කියලා හැමෝම මට සුබ පතනවා. මං හරිම සතුටින් ඉන්නේ. ඒ හැම ප්රතිචාරයකටම බොහොම ස්තුතියි. මට මේ විදිහේ ප්රතිචාර ලැබෙන තැනට මාව ගෙනාපු චමින්ද අයියට සහ ෆාදර් චිත්රපටයේ සියලු ශිල්පීන්ට ස්තුතිවන්ත වෙනවා.
ඔබ රංගනයෙන් දායක වුණු ටෙලිනාට්ය ගැනත් කතා කළොත්?
ටෙලි නිර්මාණ විදිහට නිමල් රත්නායකගේ ‘මැටි කඩුලු’ ටෙලිනාට්යයේ සජීගේ චරිතයත්, ප්රියන්ත ප්රනාන්දුගේ ‘සසංකාරා’ ටෙලිනාට්යයේ ‘ශ්රියාණි’ ලෙසත් අසංක සායක්කාරගේ ‘ඇයි අපි සුදුද?’ ටෙලිනාට්යයේ ආශා ගුරුතුමිය ලෙසත් රංගනයෙන් එකතු වෙන්න ලැබුණා. ඒ නිර්මාණවලදිත් මට හොඳ ප්රතිචාර ලැබිලා තියෙනවා.
පවුල ගැන විස්තර ටිකක් කතා කළොත්?
පවුලේ හැමෝම මට මේ නිර්මාණවල යෙදෙන්න ලොකු ශක්තියක් වෙලා ඉන්නවා. එයාලගේ සහාය නැතිනම් මට මේ කිසිදෙයක් කරන්න ලැබෙන්නේ නැති තරම්.
කැමැතියි දැනගන්න ඔබේ ජීවිතයේ ඔබට ඇති අමතක නොවන සිදුවීම් සහ සොඳුරු හමුවීම් පිළිබඳ?
අමතක නොවන සිදුවීම් විදිහට මට ලැබුණු පළමුවැනි කෙටි නාට්යය. මං ඒ වෙනකොට රංගනය ගැන හැදෑරීමක් කරලා තිබුණේ නෑ. අභ්යාසයක්වත් කරලා තිබුණේ නෑ. ආසාව නිසා භාරගත්තා. ඒ චරිතය පිරිමි ළමයෙක් විදිහට හැදුණු වැඩුණු ගැහැනු ළමයෙකුගේ චරිතයක්. අම්මාගේ කුසේ පිළිසිඳ ගැනීම ඉඳලා තරුණියක් වෙනකල් එයාට සිද්ධ වුණු සිදුවීම් තමයි රඟපාන්න තිබුණේ. දෙබස් පාඩම් වුණාට රංගය එතරම් ප්රමාණවත් තැනක තිබුණේ නැති නිසා අධ්යක්ෂට සිද්ධ වුණා මට බලෙන්ම ඒ චරිතයට පණ දෙන්න. පැය එකහමාරක් විතර බිම වැටෙමින් දඟලමින් අධ්යක්ෂගෙන් ගුටි කකා කරපු අභ්යාසයක්. ඒ පැය එකහමාර මගේ ජීවිතයම වෙනස් කළා. අද ඒ අධ්යක්ෂ මගේ සැමියා වෙලා ඉන්නවා. එයා තමයි මේ හැමදෙයක් පිටිපස්සෙම මට ශක්තියක් වෙලා ඉන්නේ.
ඔබේ ඉදිරි වැඩකටයුතු ගැන කියමු?
මෑතකදි කෙටි චිත්රපටයකට එකතු වුණා. තව ටෙලි නිර්මාණ දෙකක් සඳහා ආරාධනා ලැබිලා තියෙනවා. තාම ඒවායේ රූගත කිරීම් සිදුවුණේ නැහැ. ඒ තිර පිටපත් එක්ක මේ දවස්වල වැඩකරගෙන යනවා. ෆාදර් චිත්රපටයෙන් පස්සෙත් මාව දැකලා නිර්මාණ කිහිපයකට ආරාධනා ලැබිලා තියෙනවා. ඉස්සරහට ඒවා එක්කත් සම්බන්ධ වෙන්න බලාන ඉන්නවා.
හසිනි මධුමාලි
