හැමදේම ඉවසගෙන ආදරේ කරනවා

ආදරය ලබන්න, විඳින්න අපි කවුරුත් කැමැතියි. හැබැයි ‘අභිමාන්’ට ආදරය කරන්න පෙම්වතියෝ දෙන්නෙක් ඉන්න බව අපි කවුරුත් දන්නවා. ‘නීල පබළු’ ටෙලිනාට්‍යයේ ‘කුරුළු,’ බාධක, කම්කටොලු මැද ‘අභිමාන්ට’ ආදරය කරනවා. ඉතින් මේ ආදර කතාවේ ‘කුරුළු’ගේ ආදරය හිමිවෙයිද. එහෙමත් නැතිනම් ‘කුරුළු’ගේ ආදරය අහිමි වෙයිද කියලා ‘කුරුළු’ චරිතය රඟපාන ටනාෂා සතරසිංහගෙන් අහන්න අපි හිතුවා.
ටනාෂා ඉතින් කොහොමද?
සතුටින් හිටියත් ඉන්නවා කියන්නේ කොහොමද? ලෝකයම වැලඳගත්තු මේ වෛරසයක් නිසා. අපිත් ඉතින් ආරක්‍ෂාකාරීව වැඩකටයුතු කරගෙන යනවා. පසුගිය දවස්වල රූපගත කිරීම් සිදුකළේ නැහැ. එහෙත් දැන්නම් වැඩකරගෙන යනවා.
‘අභිමාන්’ගේ ආදරයක් නිසා ‘කුරුළු’ට කෙනෙහෙලිකම් කරනවා වැඩියි නේද?
ඔව් ඉතින්… ‘අභිමාන්’ට කෙල්ලෝ දෙන්නෙක් ආදරය කරනවානේ. ඉතින් මට ‘පූජා’ නපුරුකම් කරනවා. ඒ හැමදෙයක්ම ඉවසගෙන මමත් ආදරය කරනවා.
අක්කා – නඟාලා දෙන්නාගේ ඔය නපුරුකම් කවදා අවසානයක් දකියිද අපි?
තවම ‘පූජා’ දන්නේ නැහැ ‘කුරුළු’ එයාගේ නංගි කියලා. ඒ දැනගත්ත දාට ‘නීල පබළු’ ටෙලිනාට්‍ය ඉදිරියේදී කණපිට හැරෙයි හිතාගන්න බැරි විදියට. හැමදේම ලස්සනට සිදුවෙයි.
එකම ටෙලිනාට්‍යයක බැඳිලා ඉන්න විට තවත් හොඳ නිර්මාණ මඟහැරෙනවා ඇති නේද?
හොඳ නිර්මාණවලින් මට ආරාධනා ආවා. ඒත් මම ‘නීල පබළු’ ටෙලිනාට්‍ය සමඟ බැඳිලා ඉවරයි. අවුරුදු ගණනාවක් එක දිගට වැඩකරගෙන ආවා ‘කුරුළු’ විදියට. ඒ නිසා වැඩි කාලයක් ‘කුරුළු’ නිසා වෙන් කරන්න සිදුවෙනවා. ඒ නිසාම මෙය අවසානයක් දකිනකම් මම ‘කුරුළු’ තුළ ජීවත් වෙනවා.
ඉදිරියේදී තෝරාබේරාගෙන වැඩකළොත් නරකද?
නරකමත් නැහැ. හැබැයි එහෙම තෝරාබේරාගෙන වැඩ කරන්න අමාරුයි. මෙගා කියලා මම ඉදිරියේදී නිර්මාණවල වර්ගීකරණයක් කරන්නේ නැහැ. මෙගා වුණත් සමාජයට තේරුමක් ඇති වටිනා යමක් දෙන්න පුළුවන් කියලා මම විශ්වාස කරනවා.
ඔබ කාලයක් රඟපාලා අතරමඟදි නතරවෙලා. මේ ක්‍ෂේත්‍රයට නැවැත එන්න හිතුවේ?
2014 වසරේ තමයි මම මේ ක්‍ෂේත්‍රයට ආවේ. ඒ ලක්‍ෂ්මන් පුෂ්පකුමාරගේ ‘තිම්රගිර’ ටෙලිනාට්‍ය හරහා. අධ්‍යාපන කටයුතුවලට බාධාවක් වන නිසා මම පසුකාලීනව නිර්මාණවලට සම්බන්ධ වුණේ නැහැ. නැවැත 2018 ‘නීල පබළු’ ටෙලිනාට්‍ය හරහා තමයි රඟපෑමට සම්බන්ධ වුණේ.
2018 බැඳුණු පවුල ශක්තිමත් බැම්මක් වෙලා වගෙයි නේද?
ගෙදරින් පස්සේ මගේ මහගෙදර ‘නීල පබළු’ කණ්ඩායම. මුල් කාලයේ පොඩි පාළුවක් දැනුණා. දැන්නම් ඉතින් එකම පවුලක සහෝදර පිරිසක් වගේ එකමුතුව වැඩ කරනවා.
වසන්ත විතාරණගේ