සංසාරණ්‍ය මෙතැනින් ඉවරයි

සයිමන් නවගත්තේගම සූරීන්ගේ සංසාරණ්‍ය අසබඩ නවකතාව ඇසුරින් සංජය නිර්මාල් අධ්‍යක්ෂණය කළ සංසාරණ්‍ය අසබඩ ටෙලි නාට්‍ය බොහෝ දෙනෙක් ආදරයෙන් වැලඳ ගත්තා කිව්වොත් ඒකේ වැරැද්දක් නැහැ. ඒකාකාරී ටෙලි නාට්‍ය කලාව එපා වෙලා හිටිය බොහෝ දෙනෙක් සංජයගේ අලුත් වැඬේට හුඟක් කැමැති වුණා. කොහොම වුණත් මේ වෙද්දී සංසාරණ්‍ය අසබඩ අවසනයට එළඹිලා. ටෙලි නාට්‍ය අවසන් වෙන්න ඔන්න මෙන්න කියා තිබියදීත් අපි සංජයට කතා කළා. ඒ සංසාරණ්‍ය අසබඩ ගැන වගේම ඔහුගේ ඉදිරි නිර්මාණ ගැනත් තොරතුරු දැන ගන්න.
සංසාරණ්‍ය අසබඩ අවසන් කොටස් කිහිපයට එළඹිලා. කොහොමද ලැබෙන ප්‍රතිචාර?
ඔව්. කතාව ඉවර වීගෙන යනවා. ප්‍රතිචාර නම් හොඳටම හොඳයි. සම්ප්‍රදායෙන් මිදුණු වෙනම තලයක රසික කොට්ඨාසයක් අපි එක්ක එකතු වෙලා ඉන්න බව පේනවා. ඒ අතරින් 80%ක් විතරම උපාධිධාරීන්. මං හිතන්නේ ටෙලි නාට්‍යයේ රූපවාහිනී ශ්‍රේණිගත කිරීම් වුණත් බොහොම හොඳයි. විශේෂයෙන්ම යූ ටියුබ් හරහා ටෙලි නාට්‍යයේ මුල් කොටස් නරඹන පිරිස ඉහළ යන බවක් පේන්න තියෙනවා. ඒ හින්දා හොඳ ටෙලි නාට්‍යයක් නිර්මාණය කළා කියලා ලොකු සතුටක් හිතේ තියෙනවා.
සයිමන් නවගත්තේගම කියන්නේ අපේ රටේ බිහි වුණු වෙනස් විදියේ නිර්මාණකරුවෙක්. ඒ වගේ කෙනකුගේ නවකතාවක් රූපවාහිනියට ගෙන ඒම අභියෝගයක් වුණේ නැද්ද?
ඇත්තටම ඒක ලොකු අභියෝගයක් වුණා. මොකද නවගත්තේගම මහත්මයාගේ පොත හැමෝටම තේරෙණ එකක් නෙවෙයි. ඒ වගේ නවකතාවක් මිනිසුන්ට තේරෙන ටෙලි නාට්‍යයක් බවට පත් කරන්න පුළුවන්ද කියන එක ලොකු අභියෝගයක් වුණා. ඒත් බෞද්ධ දර්ශනය තේරුම් ගත්ත ජනතාවකට මේ කතාව තේරුම් ගන්න බැරි වෙන එකක් නැහැ කියන විශ්වාසයත් අපිට තිබුණා. ඒ වගේම ඔවුන් ඒක තේරුම් ගත්තු බව ලැබෙන ප්‍රතිචාර හරහා පේනවා.
සංසාරණ්‍ය අසබඩ ටෙලි නාට්‍ය විකාශනය වෙන්න කලින් ප්‍රසන්න ජයකොඩි මහත්මයා සයිමන් නවගත්තේගම මහත්තයාගේ නවකතාවක් සිනමාවට ගෙනාවා. ඊට ලැබුණු ප්‍රතිචාර ඔබේ නිර්මාණයට බලපෑවේ කොහොමද?
ඇත්තටම ප්‍රසන්නගේ චිත්‍රපටය තිරගත වෙද්දී අපේ ටෙලි නාට්‍යයේ වැඩ භාගයක් ඉවර වෙලා තිබුණේ. අනෙක් එක ප්‍රසන්න නවකතාවේ එක් කොටසක් අරන් ඒකට සිනමානාත්මක රචනයක් ලබා දෙන එක තමයි කරලා තිබුණේ. ඒ හින්දා ඒ චිත්‍රපටයට ලැබුණු ප්‍රතිචාර ගැන අපි වැඩිය සැලකිලිමත් වුණේ නැහැ.
සංසාරණ්‍ය අසබඩ තිර නාටකය සකස් කළේ නවගත්තේගම මහත්මයාගේ පිටපත අනුවමද?
ඇත්තටම කිව්වොත් නවගත්තේගම මහත්මයා ටෙලි නාට්‍ය තිර පිටපතක් විදියට තමයි මේක මුලින් ලියලා තිබුණේ. පස්සේ ඒක නවකතාවක් බවට පත් කරලා තියෙනවා. නවකතාව කියවගෙන යද්දිත් ඒක තේරෙනවා. අපි ඒ පිටපත ඒ විදියටම අරගෙන නවකතාවට අලුතෙන් එකතු කරලා තිබුණු කොටස් කිහිපයත් ටෙලි නාට්‍ය සඳහා යොදා ගත්තා.
සංසාරණ්‍ය අසබඩ දැන් තියෙන්නේ ජනප්‍රියත්වයේ උපරිමයේ. ඒ වගේ වෙලාවක මේක නවත්වන්න වෙන එක ගැන මොකද හිතෙන්නේ?
මේක කොහොමත් මේ වෙලාවේ නවත්වන්න වෙනවා. මොකද නවකතාවේ විදියට ඒක එහෙම වෙන්නම ඕනෑ. අපි උපරිම උත්සාහ කළේ නවකතාවට කිසිම හානියක් වෙන්නේ නැතිව ඒ කතාව තිරයට නඟන්න. ඒ හින්දා මේක මේ වෙලාවේ ඉවර වෙන්නම ඕනෑ.
ඒ උත්සාහය සාර්ථක වුණා කියලා හිතනවද?
අනිවාර්යයෙන්ම. ලැබෙන ප්‍රතිචාරත් එක්ක ඒ බව හොඳින්ම තේරෙනවා.
සංසාරණ්‍ය අසබඩින් පස්සේ සංජය ඊළඟට මොකක්ද කරන්නේ?
අපි මේ මැයි මාසෙදි චිත්‍රපටයක වැඩ කටයුතු ආරම්භ කරන්න තමයි හිටියේ. ඒත් රටේ ඇතිවුණු තත්ත්වයත් එක්ක ඒක කල් ගියා. මේ දවස්වල ලියන වැඩකට අත ගහලා ඉන්නේ. ඒකෙන් පස්සේ ලබන ඔක්තෝබර් මාසයේදී විතර අලුත් ටෙලි නාට්‍යයක වැඩ කටයුතු ආරම්භ කරන්න බලාපොරොත්තුවෙන් ඉන්නවා.
චන්දන පොන්නම්පෙරුම