මේ වෙනකොට ටිකක් අමුතු කතාබහක් කරළියට ඇවිත්. ආරංචිය හැටියට නම් කතාවට ඇමැති කෙනෙක් සම්බන්ධයි. කොහොමත් ඉතින් ඇමැතිලා ගැන කරළියට එන කතා ටිකක් නොවේ නොසෑහෙන්න අමුතුයි කියලා කවුරුත් දන්නවනේ. හැබැයි මේ කියන ඇමැති ඊටත් වඩා අමුතුයි කියල තමයි ආරංචි වුණේ. මේ ඇමැතිට හදවතක් ඇත්තෙම නැහැ කියලත් කතාවක් තියෙනවා. ඉතින් අන්තිමට බල්ලෙක්ගෙ හදවතක් ඇමැතිට බද්ධ කරපු කතාවකුත් ඇහෙනවා. කොහොමින් කොහොම හරි අන්තිමේ රතිඤ්ඤා සද්දයත් ඇහුණත් හැංගෙන්න දුවන මේ අපූරු ඇමැති ගැන විස්තර හොයලා බලද්දි තමයි අපිට දැනගන්න ලැබුණේ. මෙයා ගැන හරියටම දැනගන්න නම් කතා කරන්න ඕන හොඳම කෙනා අපේ රටේ දක්ෂ, ජනප්රිය වගේම කවුරුත් ආදරය කරන රංගන ශිල්පියෙක් වන ශ්රියන්ත මෙන්ඩිස් මහත්මයා කියලා. මෙරට සිනමාව, රූපවාහිනිය සහ වේදිකාව යන ත්රිත්ව මාධ්යයම සිය රංගන කුසලතාවයෙන් හැඩවැඩ කළ, ඒ වගේම මෙරට නිර්මාණය වූ තුන්වැනි ටෙලිනාට්ය වන පළිඟු මැණිකේ තුළින් ටෙලිනාට්ය කලාවට පිවිස තවමත් ත්රිවිධ කලාකෙතම පෝෂණය කරමින් සිටින ශ්රියන්ත මෙන්ඩිස් නම් වූ ඒ විශිෂ්ට කලාකරුවා අපව පිළිගත්තේ සිය සුපුරුද, සුහදශීලී සිනාවෙන්මයි. අපි ඉතින් මේ අමුතු ඇමැති ගැන ආරංචියෙන්ම කතාව පටන් ගත්තා.
ළඟදි ඇමැති කෙනෙක් වෙන්න යනවා කියලා ආරංචි වුණා?
ඔව්… ඇමැති කෙනෙක් වුණානේ. ඒ “ජයශ්රී ඇමැතිතුමා” චිත්රපටයේ. මේ ඇමැති සාමාන්ය ඇමැතිවරුන්ට වඩා වෙනස් ඇමැති කෙනෙක්. කොහොසත් බලය ලැබුණාම ගොඩාක් අය වෙනස් වෙනවනේ. චීන කියමනක් තියෙනවනෙ මිනිසකු හඳුනාගන්න ඔහුට බලය දෙන්න කියලා.
එතකොට ළඟදි ජනාධිපති තරගයකට ඉදිරිපත් වෙනවා කියලත් ආරංචියක් ලැබුණා?
ජනාධිපති තරගයටත් ඉදිරිපත් වෙනවා. ඒ උදයකාන්ත වර්ණසූරිය මහත්මයාගේ “ප්රසිඩන්ට් සුපර් ස්ටාර්” කියන ෆිල්ම් එකේ. මේ වෙනකොට ඉතින් සියල්ල තෝරන්නේ රියැලිටි තරගවලින්. නළුවෝ නිළියෝ හොඳම කුක්ලා, හොඳම ගායකයෝ.ඔය වගේ හැමදේම සුපර් ස්ටාර්වලින්ම තෝරන එකේ, ජනාධිපතිත් ඒ විදියටම තෝරන්න තමයි ප්රසිඩන්ට් සුපර් ස්ටාර් ලෑස්ති වෙන්නේ.
එතකොට ජයශ්රී ඇමැතිතුමා චිත්රපටයයි, ප්රසිඩන්ට් සුපර් ස්ටාර් චිත්රපටයයි දෙකේම ඔබ කොමඩි චරිතද කරන්නේ?
කොමඩි චරිතයක්ම කියන්න බැහැ. පොඩි සීරියස් චරිතයකුත් මේ තුළ තිබෙනවා.
ඉදිරියේදී කොමඩි චරිතවලටම කොටුවෙයි කියලා හිතෙන්නෙ නැද්ද?
අපෝ නැහැ. එහෙම වෙන්නේ නැහැ. චිත්රපට කිහිපයකම එකිනෙකට වෙනස් චරිතවලින් මාව දැකගන්න ලැබෙනවා. ඒ අතර මිදුණු විශ්වය චිත්රපටයේ චරිතය වෙනස්. ඊළඟට ගේම් චිත්රපටයේ මම උසස් පොලිස් නිලධාරියෙක්. උතුරු සුළඟ චිත්රපටයේ ගම් භාර ගොවියෙක්. මේ චරිත ගත්තාම ඒවා එකිනෙකට වෙනස්. අනෙක් එක ලෝකයම කොමඩි වුණු වෙලාවක අපි ටිකක් කොමඩි වුණාම මොකද?
සිංහල සිනමාවේ විජය නන්දසිරි මහත්මාගෙන් හිස්වුණු කොමඩි කිරුළ ඊළඟ හිමිකරුවා ශ්රියන්ත මෙන්ඩිස්ද?
අනේ නැහැ. අනෙක් එක විජය නන්දසිරි මහත්මයා කොමඩි නළුවෙක් විදියට මා දකින්නෙ නැහැ. ඔහු හොඳ දක්ෂ නළුවෙක්. ඒ වගේම හොඳ නිර්මාණශීලී හැකියාවක් තිබුණු චරිතාංග නළුවෙක් විදියටයි මම ඔහුව දකින්නේ.
මේ වන විට ඔබ චිත්රපට සහ ටෙලිනාට්ය කොපමණ ප්රමාණයකට දායක වෙලා තියෙනවාද?
චිත්රපට නම් 50ක පමණ රඟපාලා තියෙනවා. ටෙලිනාට්ය නම් 200ක විතර රඟපාලා තියෙනවා. අනෙක් කාරණය තමයි මං ලංකාවේ නිර්මාණය වුණු 3 වැනි ටෙලිනාට්ය වන “පළිඟු මැණිකේ” ටෙලිනාට්යයේ තමයි මුලින්ම රඟපෑවේ. එදා සිට තවමත් ඉතින් රංගනයේ යෙදෙමින් ඉන්නවා. සිනමාව, රූපවාහිනිය, වේදිකාව කියන මාධ්ය ත්රිත්වයෙන්ම මාව දකින්න පුළුවන්.
චිත්රපට 50ක්, ටෙලිනාට්ය 200ක් ඔබත් සමඟ සිටි රසික පිරිසට මොනවද කියන්න තියෙන්නෙ?
විෂම කැරකෙන ලෝකය ගැන අවධානයෙන් ඉන්න කියලා තමයි කියන්න තියෙන්නේ.
ශ්රියන්ත මෙන්ඩිස් නම් දක්ෂ ප්රතිභාපූර්ණ රංගන ශිල්පියාගෙ හෙට දවසෙ ප්රාර්ථනාව මොකද්ද?
ඔව්. හෙට දවස හොඳවෙලා හැමෝටම සතුටින්, සමඟියෙන් ඉන්න ලැබෙන්න කියලා ප්රාර්ථනා කරන ගමන්ම ලංකාවේ ජන සමාජයේ සිතුම පැතුම් හඳුනාගත් නිර්මාණ වැඩි වැඩියෙන් බිහිවේවා කියලත් ප්රාර්ථනා කරනවා.
කුමාර රත්නායක
