කොළඹ වරායේ නැගෙනහිර පර්යන්තයේ කළමනාකරණය හෝ මුළු අයිතියෙන් කොටසක් හෝ විදෙස් සමාගමකට පැවරීමට රජය තීරණය කර නොමැති බව අග්රාමාත්ය මහින්ද රාජපක්ෂ මහතා පැවසීය.
ජාතික ජන බලවේගයේ පාර්ලිමේන්තු මන්ත්රී අනුර කුමාර දිසානායක මහතා අද (06) පාර්ලිමේන්තුවේදී යොමු කළ ප්රශ්නයකට පිළිතුරු ලබාදෙමින් අග්රාමාත්යවරයා මේ බව සඳහන් කළේය.
“පැවැති යහපාලන රජය විසින් කොළඹ වරායේ නැගෙනහිර ජැටිය සම්බන්ධයෙන් ගිවිසුම්වලට එළඹී ඇත. එම ගිවිසුම්වල පිටපත් සභාගත කරමි. අප රජය විසින් මෙම නැගෙනහිර ජැටියේ කළමනාකරණය, මුළු අයිතිය හෝ අයිතියෙන් කොටසක් හෝ විදේශ සමාගමකට පැවරීමට තීරණය කර නොමැත.” යනුවෙන් අග්රාමාත්ය මහින්ද රාජපක්ෂ මහතා පැවසීය.
එහිදී ජනතා විමුක්ති පෙරමුණේ නායක අනුර කුමාර දිසානායක මහතා පවසා සිටියේ “දැන් මේ තර්කයක් ගොඩනගන්න හදනවා පැරණිව ගිවිසුමකට ගහලා තියෙන නිසා අපිට යන්න වෙලා තියෙනවා කියලා. හැබැයි යන්නේ පැරණි ගිවිසුම නෙමෙයි. යෝජනා කරලා තියෙන්නේ නව ගිවිසුමකට එළඹීම සඳහායි.” යනුවෙනි.
කෙසේවෙතත් ඉන්දීය විදේශ අමාත්ය එස්. ජයශංකර් මහතා ශ්රී ලංකාවේ සංචාරයක නිරතව සිටින අතරවාරයේදී අගමැතිවරයා මෙම ප්රකාශය පාර්ලිමේන්තුවේදී සිදුකිරීම විශේෂ සිදුවීමකි.
පසුගිය දිනවල මාධ්ය වාර්තා කොට තිබුණේ ඉන්දියාවේ අදානි සමාගමට වරායේ කොටස් පැවරීම සදහා කැබිනට් පත්රිකාවක් ඉදිරිපත් කොට ඇති බවකි.
වරාය අමාත්ය රෝහිත අබේගුණවර්ධන මහතාද පසුගිය දිනෙක මල්වතු අනුනාහිමියන් හමුවී සදහන් කර සිටියේ වරායේ නැගෙනහිර පර්යන්තයේ 49%ක කොටස් ලබා දීම සදහා ඉන්දියාවට සහ ජපානයට ආරාධනා කර ඇති බවකි.
