විදේශගත ශ්‍රී ලාංකිකයන්ට සෙලාන් බැංකුවෙන් ප්‍රතිලාභ රැසක්

සුහද හදක් ඇති දේශීය බැංකුව, සෙලාන් බැංකුව, විදේශගත ශ්‍රී ලාංකිකයන්ට වඩාත් පහසුවෙන් සිය මවු රටට මුදල් එවීමට හැකිවන ආකාරයට තම අභ්‍යන්තර ප්‍රේෂණ සේවාවන් වඩාත් සරල හා පහසු කිරීමට පියවර ගෙන තිබේ. එමෙන්ම මෙම සේවාවන් භාවිත කරන්නන්ට අමතර ප්‍රතිලාභ රාශියක්ද හිමිවනු ඇත.

දැඩි සංචරණ සීමාවන් සහිත අවස්ථාවලදී පවා, මුදල් හදිසියකදී එතෙරින් එවන මුදල් ඉක්මනින් ලබාගැනීමට හැකිවන ආකාරයට විධිවිධාන සකස් කිරීමටද සෙලාන් බැංකුව පියවර ගෙන ඇත. මෙය ගනුදෙනුකරුවන්ට ප්‍රතිලාභ සැලසීමට අමතරව, රටට මේ මොහොතේ අත්‍යාවශ්‍ය වී පවතින විදේශ විනිමය වර්ධනය කරගැනීමටද අත්වැලක් වනු ඇතැයි සෙලාන් බැංකුව අපේක්ෂා කරයි.

විදේශගත ශ්‍රී ලාංකිකයන් මෙරටට එවන මුදල් ලබාගන්නා පුද්ගලයන්ට, එම මුදල් ක්ෂණිකව, පහසුවෙන්, පෝලිම්වල රැඳී සිටීමෙන් තොරව, සහ අතිරේක ගාස්තුවකින් තොරව ලබාගත හැකිය. එමෙන්ම පවතින හුවමාරු අනුපාතයට අමතරව, ඇමෙරිකානු ඩොලර් එකක් සඳහා අමතර රු. 2ක මුදලක් ගෙවීමටද සෙලාන් බැංකුව කටයුතු කරන අතර, එමගින් මුදල් ලබන්නා වෙත ලැබෙන මුදල් ප්‍රමාණය වැඩි වේ.