නවලෝක රෝහල් සමූහය, ආනන්ද විද්‍යාලයේ ආදි ශිෂ්‍ය සංගමය සමග අත්වැල් බැඳගනී…

ශ්‍රී ලංකාවේ පුරෝගාමී පෞද්ගලික රෝහල් සේවා සන්නාමය වන නවලෝක රෝහල් සමූහය, ලංකාවේ ප්‍රධාන පාසලක් වන කොළඹ ආනන්ද විද්‍යාලයේ ආදි ශිෂ්‍ය සංගමයේ සාමාජිකයන්ට සහ අධ්‍යයන සාමාජික සාමාජිකාවන්ට නවලෝක රෝහල් සමූහයේ සුවිශේෂ සහ උසස් තත්ත්වයේ බහුවිධ සෞඛ්‍ය සේවා පහසුකම් වෙත ප්‍රවේශ වීම සඳහා සුවිශේෂ ආයතනික සෞඛ්‍ය ආරක්ෂණ විසඳුමක් හඳුන්වා දෙන ලදී.

2021 ඔක්තෝබර් 14 වැනි දින, සෞඛ්‍ය අමාත්‍යාංශය පනවා ඇති දැඩි සෞඛ්‍ය නීතිරීතිවලට අනුගතව කොළඹ නවලෝක රෝහල් පරිශ්‍රය තුළදී මෙම සුවිශේෂ යෝජනා ක්‍රමය, දෙපාර්ශ්වයේම නියෝජිතයන් ඉදිරියේ නිල වශයෙන් ක්‍රියාත්මක කරනු ලැබීය.

මෙම යෝජනා ක්‍රමය යටතේ සියලු ආදි ආනන්දීයයන් සහ අධ්‍යයන සාමාජිකයන්ට කොළඹ, මීගමුව, ගම්පහ සහ දිවයින පුරා පිහිටි නවලෝක රෝහල් ශාඛාවලින් විශේෂ ප්‍රතිලාභ යටතේ මෙන්ම නොමිලේද සපයනු ලබන සුවිශේෂ සේවාවන් රාශියක් ලබාගත හැකිය. සැත්කම්, කාමර වෙන්කිරීම්, හෙද සේවා, රෝග විනිශ්චය, බාහිර රෝගී පරීක්ෂා, රසායනාගාර පරීක්ෂණ, දන්ත වෛද්‍ය සේවා සහ සෞඛ්‍ය පරීක්ෂණ පැකේජ සහ නොමිලේ ගිලන් රථ පහසුකම් සඳහා 25% දක්වා වට්ටම් ඇතුළත් වේ.