මැලිබන් බිස්කට් ලෝක තත්ත්ව සතිය සැමරීමට එක්වෙයි…

මැලිබන් සමාගම යනු දශක හතක් පුරා ලාංකීය පාරිභෝගික ජනතාව වෙත, ගුණාත්මක නිෂ්පාදන ලබාදීම තුළින් ඉමහත් කීර්තියක් අත්කර ගැනීමට සමත් වූ ආයතනයකි. 1954 වසරේදී මැලිබන් සමාගමේ නිර්මාතෘ ඒ.ජී. හින්නි අප්පුහාමි මහතාගේ දැක්ම ඔස්සේ, ගුණාත්මක බව සිය දර්ශනය කරගත් මැලිබන් ආයතනය, එම දැක්ම පෙරදැරි කරගනිමින් ඉහළ තත්ත්වයේ ගුණාත්මක බවින් යුතු අමුද්‍රව්‍ය භාවිත කරමින්, නවීන තාක්ෂණික ක්‍රමෝපාන් ඔස්සේ නව්‍ය වූ නිෂ්පාදන රැසක් හඳුන්වා දෙමින් සුවහසක් පාරිභෝගිකයන්ගේ සිත් දිනාගෙන ඇත.

ආරම්භයේ සිට මැලිබන් ආයතනය උසස් නිෂ්පාදන ක්‍රියාවලියක් පවත්වාගැනීම කෙරෙහි මූලික අවධානයක් යොමුකරනු ලැබූ අතර, 1995 වසරේදී පළමු වරට ගුණාත්මකභාවය පිළිබඳ ප්‍රමිති සහතික ලබාදීමේ යාන්ත්‍රණයක් ක්‍රියාත්මක කිරීමෙන් පසුව ISO 9001 තත්ත්ව කළමනාකරණ පද්ධතියෙන් ප්‍රමිති සහතිකයක් ලබාගත් පළමුවැනි නිෂ්පාදන ආයතනය බවට පත් වූයේ මැලිබන් සමාගමයි.