සෙලින්කෝ ලයිෆ් සුර්යබලයට ආයෝජනය කරයි

සෙලින්කෝ ලයිෆ් සමාගම වසරකට පරිසරයට මුදාහරින කාබන් ප්‍රමාණය ටොන් 42.6කින් අඩුකර ගනිමින් වසරකට මෙගාවොට් 120ක විදුලි බලයක් උත්පාදනය කළ හැකි මහා පරිමාණයේ සූර්ය පැනල පද්ධති දෙකක් අනුරාධපුරයේ සහ යාපනයේ ආරම්භ කර තිබෙන අතර, මේවා මෙම දිස්ත්‍රික්ක දෙක තුළ තිබෙන විශාලතම සූර්ය පැනල පද්ධති වෙයි.
අනරාධපුරයේ තිබෙන පද්ධතියේ කිලෝවොට් 50ක ධාරිතාවක් තිබෙන බවත් මෙයින් වාර්ෂිකව මෙගාවොට් 66ක් ජනිත කිරීමට බලාපොරොත්තු වන බව සමාගම සඳහන් කරයි. මෙම ව්‍යාපෘතිය සෙලින්කෝ ලයිෆ් විසින් ආරම්භ කළ දෙවැනි විශාලතම සූර්ය පැනල පද්ධතිය වන අතර, මේ තුළින් සමාගම ජාතික විදුලිබල පද්ධතියෙන් වසරකට ලබාගන්නා විදුලි ඒකක ප්‍රමාණය 66,000කින් අඩුකර ගැනීම හැකිවෙයි. ඒ තුළින් සමාගම වසරකට පරිසරයට මුදා හරින කාබන් ප්‍රමාණය ටොන් 23.4කින් අඩුකර ගැනීමට හැකියාව ලැබේ.

කිලෝවොට් 40ක ධාරිතාවකින් යුක්ත වන සමාගමේ යාපනයේ සූර්ය පැනල පද්ධතිය මගින් වසරකට මෙගාවොට 54ක් ජනනය කරන අතර, සමාගම වසරකට ජාතික විදුලිබල පද්ධතියෙන් ලබාගන්නා විදුලිය ඒකක 54,000ක් ලබා නොගැනීමට සමාගමට මේ තුළින් අවස්ථාව හිමිවෙයි. මේ තුළින් සමාගම වසරකට පරිසරයට මුදා හරින කාබන්ඩයොක්සයිඞ් ටොන් 19.2ක් පරිසරයට එකතු වීම වළක්වාගත හැකි වෙයි. මෙය සෙලින්කෝ ලයිෆ් සමාගම විසින් ආරම්භ කර තිබනෙ සූර්ය පැනල පද්ධතිවලින් පස්වැනියට විශාලතම පද්ධතිය වෙයි.

මෙම සූර්ය පැනල පද්ධති සඳහා රුපියල් මිලියන 15.9ක් ආයෝජනය කර තිබෙන අතර, සමාගමේ නව මූලස්ථාන ගොඩනැඟිල්ලේ 2016 වසරේදී සවිකළ කිලෝවොට් 63.18ක පද්ධති ධාරිතාවකින් යුක්ත වන සූර්ය පැනල පද්ධතිය සමාගමේ විශාලතම සූර්ය පැනල පද්ධතිය වෙයි. මෙමඟින් සමාගම ජාතික විදුලිබල පද්ධතියෙන් ලබාගන්නා විදුලිය ඒකක 7,200ක් මාසිකව ඉතිරි කරගන්නා අතර, ඒ තුළින් සමාගම පරිසරයට මුදාහරින කාබන් ප්‍රමාණය ටොන් 108කින් අඩු කිරීමට සමත්වී ඇත.