සෙංකඩගල ෆිනෑන්ස්හි අධ්‍යක්‍ෂ මණ්ඩලයට ආචාර්ය රොෂාන් පෙරේරා පත්කරයි

සෙන්කඩගල ෆිනෑන්ස් ආයතනය සිය විධායක නොවන ස්වාධීන අධ්‍යක්‍ෂවරයකු වශයෙන් ආචාර්ය රොෂාන් පෙරේරා මහත්මිය පත්කරනු ලැබූ බව පසුගියදා නිවේදනය කළේය.

ශ්‍රී ලංකා මහ බැංකුවේ සේවය කරනු ලැබූ ආචාර්ය රොෂාන් පෙරේරා මහත්මිය, මූල්‍ය හා රාජ්‍ය මූල්‍ය ප්‍රතිපත්ති සම්පාදනය හා ක්‍රියාත්මක කිරීම සම්බන්ධව 20 වසරකට අධික කාලයක අත්දැකීම් ඇති වෘත්තීය වේදිනියකි.

ශ්‍රී ලංකා මහ බැංකුවේ සේවය කළ කාලය තුළ ඇය ආර්ථික පර්යේෂණ අංශයේ නියෝජ්‍ය අධ්‍යක්‍ෂ, බැංකු අධීක්‍ෂණ අංශයේ අතිරේක අධ්‍යක්‍ෂ සහ අවදානම් කළමනාකරණ අංශයේ අධ්‍යක්‍ෂ ආදී විවිධ අංශයන්හි කටයුතු කර ඇති ආචාර්ය රොෂාන් පෙරේරා, එයට පෙර ප්‍රතිපත්ති අධ්‍යයන ආයතනය, ලෝක බැංකුව සහ එක්සත් ජාතීන්ගේ සංවර්ධන වැඩසටහන වැනි ආයතන සමගද කටයුතු කිරීමෙන් අත්දැකීම් රැසකින් පරිපූර්ණ කෙනෙකි. මෙයට අමතරව ඇය මහජන ව්‍යවසායකත්ව සංවර්ධන අමාත්‍යාංශයේ බැංකුකරණ කාර්යයන් හා සම්බන්ධ අධ්‍යක්‍ෂ වශයෙන්ද කටයුතු කර ඇත.

කොළඹ විශ්වවිද්‍යාලයෙන් ආර්ථික විද්‍යාව පිළිබඳ උපාධිය සහ විශේෂවේදී උපාධිය හිමිකරගත් ඇය ඕස්ටේ්‍රලියාවේ මෙල්බර්න් විශ්වවිද්‍යාලයෙන් ආර්ථික විද්‍යාව සම්බන්ධයෙන් පශ්චාත් උපාධියද හිමිකර ගත්තාය. මෙයට අමතරව ඇය විසින් මෑතකදී රාජ්‍ය පරිපාලනය සම්බන්ධයෙන් හාවඞ් විශ්වවිද්‍යාලයෙන් විශේෂවේදී උපාධියද හිමිකර ගැනීමට සමත් විය.