‘සුරක්ෂා’ රක්ෂණාවරණය නැවතත් ශ්‍රී ලංකා ඉන්ෂුවරන්ස් වෙතින්

අධ්‍යාපන අමාත්‍යාංශය මගින් සියලුම පාසැල් සිසුන්ට නොමිලේ ලබා දෙන “සුරක්ෂා” රක්ෂණ ආවරණය සඳහා පහසුකම් සැපයීම නැවත ශ්‍රී ලංකා ඉන්ෂුවරන්ස් වෙත ප්‍රදානය කර තිබේ.

මෙම ‘සුරක්ෂා‘ රක්ෂණ ආවරණය නිල වශයෙන් ප්‍රදානය කිරීම 2020 ජනවාරි 4 වන දින අධ්‍යාපන අමාත්‍යාංශයේ දී සිදු වූ අතර ගරු අධ්‍යාපන අමාත්‍ය මහාචාර්ය ජී.එල්. පීරිස් මහතා, පාසල් කටයුතු පිළිබඳ අතිරේක ලේකම් එල්.එම්.ඩී. ධර්මසේන මහතා, ශ්‍රී ලංකා ඉන්ෂුවරන්ස් සභාපති ජගත් වැල්ලවත්ත මහතා සහ ශ්‍රී ලංකා ඉන්ෂුවරන්ස් ප්‍රධාන විධායක නිලධාරී චන්දන එල්. අලුත්ගම මහතා සහභාගි වූහ.

මෙම සුවිශේෂී “සුරක්ෂා” රක්ෂණාවරණය අධ්‍යාපන අමාත්‍යාංශයේ සහ ශ්‍රී ලංකා ඉන්ෂුවරන්ස් ආයතනයේ සහයෝගීත්වයෙන් 2017 වර්ෂයේදී ආරම්භ කරන ලදී. මේ සඳහා පහසුකම් සපයන්නා බවට නැවත පත්ව ඇති ශ්‍රී ලංකා ඉන්ෂුවරන්ස් ශාඛා 158කින් යුතු සිය ශාඛා ජාලය හරහා මේ සඳහා පහසුකම් සපයන අතර මෙම රක්ෂණ ආවරණය රජයේ පාසල්, පෞද්ගලික පාසල්, ජාත්‍යන්තර පාසල් සහ පිරිවෙන් අධ්‍යාපනයේ යෙදෙන පූජ්‍ය පක්ෂයද ඇතුළුව මිලියන 4.5ක සමස්ත ශිෂ්‍ය ප්‍රජාව සඳහා රැකවරණය සලසයි.