“රට පුරාම QR” දෙවන අදියර කොළඹදී

ශ්‍රී ලංකා මහබැංකුව ප්‍රමුඛ පෙළේ මූල්‍ය ආයතන හා විදුලි සංදේශ සමාගම් සමඟ එක්ව ක්‍රියාත්මක කරන “රට පුරාම QR” ප්‍රවර්ධන වැඩසටහනේ දෙවන අදියර පසුගිය ජනවාරි 23 වැනි දින කොළඹදී උත්සාවාකාරයෙන් දියත් කෙරිණි. මෙම දීප ව්‍යාප්ත ප්‍රවර්ධන වැඩසටහන LANKAQR ක්‍රමය හරහා ඩිජිටල් ගෙවීම් සිදු කිරීමේ වාසිය, පහසුව සහ ආරක්ෂාව පිළිබඳව මහජනතාව දැනුවත් කරමින්, ශ්‍රී ලංකාව මුදල් නෝට්ටු රහිතව ගනුදෙනු කරන සමාජයක් බවට පරිවර්තනය කිරීම ඉලක්ක කරගත් ව්‍යාපෘතියකි. එමෙන්ම ශ්‍රී ලංකාව පුරා ජනතාව මූල්‍යකරණය තුළට ඇතුළත් කරගැනීම මෙහි අනෙකුත් අභිලාෂයයි.

බත්තරමුල්ල, දියත උයනේ පැවති මේ අවස්ථාව සඳහා ප්‍රධාන අමුත්තා වශයෙන් ගරු මුදල්, ප්‍රාග්ධන වෙළෙඳපොළ සහ රාජ්‍ය ව්‍යාපාර සංශෝධන රාජ්‍ය අමාත්‍ය අජිත් නිවාඩ් කබ්රාල් මහතා, ශ්‍රී ලංකා මහබැංකුවේ නියෝජ්‍ය අධිපතිනිය සහ ජාතික ගෙවීම් කවුන්සිලයේ සභාපතිනිය වන යුවට් ප්‍රනාන්දු මහත්මිය, ශ්‍රී ලංකා මහබැංකුවේ ගෙවීම් සහ පියවීම් අංශයේ අධ්‍යක්ෂ ඩී. කුමාරතුංග මහතා සහ SDB බැංකුවේ ප්‍රධාන විධායක නිලධාරී, ශ්‍රී ලංකා මහබැංකුව විසින් පත්කළ LANKAQR කමිටුවේ සභාපති තිලක් පියදිගම මහතා ඇතුළු ගෞරවණීය අමුත්තන් පිරිසක් සහභාගී වූහ.

කොළඹ ප්‍රවර්ධන වැඩසටහනේ සමාරම්භක අවස්ථාවට ශ්‍රී ලංකාවේ ප්‍රමුඛතම බැංකු හා මූල්‍ය ආයතන සහභාගී වූ අතර ඒ හරහා කොළඹ හා තදාසන්න ප්‍රදේශවල LANKAQR ඩිජිටල් ගෙවීම් ක්‍රමය ප්‍රවර්ධනය කිරීම ඉලක්ක කෙරිණි.