ජීවිත දස දහසක් එළිය කරන්නට ප්‍රයිම් සමූහයෙන් සමාජ සත්කාරයක්

නිරතුරුව ශ්‍රී ලාංකීය ජන සමාජය බලගැන්වීමට අඛණ්ඩ දායකත්වය දක්වන මෙරට විශාලතම හා ICRA [A-] ස්ථාවර ණය ශ්‍රේණියක් හිමි එකම දේපළ වෙළෙඳ සමාගම වන ප්‍රයිම් සමූහය සිය කාර්යමණ්ඩලයේද දායකත්වයෙන් දියත් කළ ‘එක් දවසක් සිත් දහසක්’ සමාජ සත්කාරක ප්‍රවේශය තුළින් කෝවිඩ් වසංගතය හේතුවෙන් ජීවනෝපාය අහිමි වූ මොරටුව ප්‍රදේශයේ අඩු ආදායම්ලාභි පවුල් වෙත වියළි ආහාර ද්‍රව්‍ය ලබාදෙන ලදී.

මෙම ‘එක් දවසක් සිත් දහසක්’ සමාජ සත්කාර ප්‍රවේශයේ පළමු අදියර යටතේ අත්‍යාවශ්‍ය වියළි ආහාර ද්‍රව්‍ය තොගයක් මොරටුව සුනාමි මහල් නිවාස සංකීර්ණයේ ජීවත්වන පවුල් 320ක් වෙත පරිත්‍යාග කිරීම ජුනි 23 වැනි දින සිදු කළ අතර මෙහි සංකේතාත්මක අවස්ථාවට කොළඹ දිස්ත්‍රික් ලේකම්, ප්‍රදීප් යසරත්න, මොරටුව ප්‍රාදේශීය ලේකම් ඉසංකා උඩවත්ත, උයන දකුණ ග්‍රාම නිලධාරී එච්.ආර්.එම් ප්‍රියන්ජිත්, දිස්ත්‍රික් ආපදා කළමනාකරණ ඒකකයේ සහකාර අධ්‍යක්ෂ වින් කමාන්ඩර් මහේෂ් ගුණරත්න සහ ප්‍රයිම් සමූහයේ විධායක කමිටු සාමාජිකයින් ද සහභාගි වූහ. රජය මගින් ප්‍රකාශයට පත්කර ඇති නිරෝධායන නීති සහ සමාජ දුරස්ථභාවය පවත්වා ගනිමින් ප්‍රාදේශීය සෞඛ්‍ය බලධාරීන්ගේ අධීක්ෂණය යටතේ මෙම පරිත්‍යාගය සිදුවිය. ප්‍රයිම් සමූහයේ සමස්ත සේවක මණ්ඩලයේ කැපවීම මත ඇරඹි මෙම මාහැඟි සමාජ සත්කාරක ප්‍රවේශය සමග තවත් සමාජ සත්කාරක ව්‍යාපෘතීන් දෙකක් නුදුරේදීම දියත් කිරීමට සැලසුම් කර ඇත.