අලියාන්ස් ලංකා – මෙගා පේ පුරෝගාමීත්වයෙන් තෙවන පාර්ශ්වීය මෝටර් රථ රක්ෂණ

කොළඹ, 2021, ජනවාරි . ශ්‍රී ලංකාවේ ප්‍රමුඛතම රක්ෂණ සේවා සැපයුම්කරුවකු වන අලියාන්ස් ඉන්ෂුවරන්ස් ලංකා ලිමිටඩ් (අලියාන්ස් ලංකා) එහි තෙවන පාර්ශ්වීය රථ වාහන රක්ෂණ ආවරණ සඳහා වන ප්‍රවේශයන් ඉහළ නැංවීම වෙනුවෙන් නව්‍ය ගෙවීම් ක්‍රියාවලියෙහි ප්‍රමුඛ පෙළේ සැපයුම්කරුවකු හා ගෙවීම් එකතූන් සඳහා තාක්ෂණික විසඳුම් සලසන්නකු වන මෙගා පේ ආයතනය සමඟ පුරෝගාමී හවුල්කාරීත්වයකට එළඹුණ බව පසුගියදා නිවේදනය කරන ලදී.

දිවයින පුරා පිහිටි 850කට අධික මෙගාපේ Pay & Go කියෝස්ක් තුළින් අලියාන්ස් පාරිභෝගිකයන් හට දැන් 24 x 7 x 365 පුරා තෙවන පාර්ශ්වීය රථ වාහන රක්ෂණ හිමිකම් මිලදී ගැනීමේ අවස්ථාව ලැබෙනු ඇත. රාජ්‍ය ආයතන, ත්‍රිවිධ හමුදා කඳවුරු සහ මූලස්ථාන, සුපිරි වෙළෙඳසැල්, වෙළෙඳ සංකීර්ණ, ඇඟලුම් කම්හල් සහ මහජනයා නිරන්තරයෙන් පැමිණෙන තවත් පොදු ස්ථාන රැසක මෙම කියෝස්ක් යන්ත්‍ර ඉතා පහසු ලෙස පිහිටුවා ඇත.

ශ්‍රී ලංකාවේ තෙවන පාර්ශ්වීය රථ වාහන රක්ෂණාවරණය වෙනුවෙන් මේ ආකාරයේ හවුල්කාරීත්වයක් ගොඩනගා ගත් ප්‍රථම අවස්ථාව මෙය වන අතර ඒ තුළින් සිය ගනුදෙනුකරුවන්ට සේවාවන් සැලසීම සඳහා අලියාන්ස් ලංකා සමාගම සුවිශේෂී නව මාවතක් විවිර කර දෙන ලදී.