කෙනකුට ජීවිතයේ අංගසම්පූර්ණ වාසනාවක් හිමිකර දෙනු ලබන ප්රධාන සාධකයක් ලෙස නිවෙස හඳුන්වාදිය හැකිය. නිවෙසක සුබ අසුබ පිහිටීම මෙන්ම වාසනා ගුණය අනුවත් ඒ ඒ නිවාසවල පදිංචිකරුවන්ගේ ජීවිතවල යහපත උදාවීම සිදුවන බව හඳුනාගෙන තිබේ. එහෙයින් නිවෙසක් සෑදීමේදී මෙන්ම නිවෙසක් මිලදී ගැනීමේදීත් එහි වාස්තුවල තත්ත්වය ගැන සැලකිලිමත් වීම වැදගත්ය.
කෙනකුට තමාගේ ජන්ම නැකැතට ග්රහචාරයට අනුව සියල්ල බලා ඉදිකළ නිවෙසක් පසුකාලීනව විකිණීමට තීරණය කරතත් එම නිවෙස මිලදීගත්තකුට එය කෙතරම් ගැළපේද යන්න අතිශය ගැටලුසහගතය. මන්ද එම නිවෙස සකසා ඇත්තේ එහි මුල්ම පදිංචිකරුවා හෝ එහි හිමිකරුවාගේ උපන් නැකැතට සුබ වීම සඳහා මිස පසුව එය ලබාගන්නා අයට යහපතක් වන්නට නොවන බැවිනි.
නිවෙසක් මිලදී ගැනීමේදී මේ තත්ත්වය ඉතා බුද්ධිමත්ව තේරුම් ගැනීම සෑම කෙනකුගේම වගකීමකි. එසේ නැතහොත් ඔබට සිදුවන්නේ අනුන්ගේ ඇඳුමක්, සපත්තු දෙකක් ඉල්ලාගත් විට විඳින්නට සිදුවන නොගැළපීම්වල අපහසුතා විඳදරා ගැනීමටය. එසේ විඳගත්තද එය වැඩි කාලයක් පවත්වාගෙන යන්නට ඔබට හැකියාවක් නොලැබෙනු ඇත. මන්ද අනුන්ගේ නිවෙසක ඔබට සිදුවන නොගැළපීම් ඇඳුමක් සපත්තු දෙකක් මෙන් සරලව ගත නොහැකි දේවල්ය.
වාස්තු දෝෂ ඇතිවීම මත ඔබගේ ධනය බලය සහ ශක්තියද ගිලිහී යෑම දුරස් වීම ආදිය විඳින්නට සිදුවන අතර ඔබ සතු සියල්ල ඔබට අහිමි වීමටද එයම හේතුවක් වනු ඇත.
මෙහිදී වඩාත් වැදගත් වන තවත් සාධක කිහිපයකි. විවිධ අය විවිධ රුචි අරුචිකම් දක්වන අතර කෙනකු සංකීර්ණ වටපිටාවකට ප්රිය කරද්දී තවත් කෙනකු ප්රිය කරන්නේ පරිසරහිතකාමී වටපිටාවකටය. ඇතැම් විට නිවෙසක් විකුණා දමන්නට වාස්තු දෝෂ බලපායි. ඉන්නම බැරි නිවෙසක් විකුණා දමනවා හැර වෙන කළ හැකි දෙයක් නොවන අතර නිවෙස මිලයට ගත්තකු මේ ගැන ඉතා බුද්ධිමත්ව තේරුම්ගත යුතුය.
ඇතැම් ඉඩම්වල භූත දෝෂ එමටය. නිවෙස්වල ඉඩම්වල පෙර පදිංචිකරුවන් මියගොස් එම ඉඩම්වලම භූතයන් ප්රේතයන් වී ඉපදීම හේතුවෙන්ද ඇතැම් නිවාස කිසිවකුට යානොදෙයි. මිනිසුන් දිවිනසාගත් නිවාසද බොහෝ තිබෙන අතර ඒවාද නිතර නිතර අලෙවි වන තත්ත්වයේ පවතින නිවාස සේ පෙනීගොස් ඇත. මේ තත්ත්වය හඳුනාගෙන නිවෙසක් මිලදී ගැනීම සෑම කෙනකුටම යහපතට හේතුවකි.
නිවාසවල බ්රහ්ම පාදය අතිශය වැදගත් වන අතර සමහර නිවාස බ්රහ්ම පාදයට හානි ගෙන දෙන අයුරින් ඉදිකරවීම මත සියල්ල නරක අතට හැරී තිබේ. මෙවැනි නිවාස මිනිස් වාසයට කෙසේවත් සුදුසු නොවේ.
බොහොමයක් නිවාස මිලට ගන්නන් බාහිර ඔපයට රැවැටී නිවාස මිලට ගැනීම සිදුකරන අතර එයද නිවෙසක් තෝරාගැනීමට සුදුසු ක්රමයක් නොවේ.
පදිංචියට කලබලයට නිවාස මිලට ගෙන ඔබත් කබලෙන් ළිපට වැටීමට උත්සාහ නොකර ඉතා බුද්ධිමත්ව සිතාබලා කාලයට ගැළපෙන ලෙස කටයුතු කිරීම විශ්වාසදායක ක්රමවේදයකි. මේ නිසා ඔබ මිලට ගන්නා නිවෙස මුලින්ම ඔබගේ උපන් නැකැතට ගළපා බලා සූක්ෂ්මව කටයුතු කළහොත් ඉතා වාසනාවන්ත අනාගතයකට මඟ පාදාගන්නට ඔබටත් හැකි වනු ඇත.
ප්රවීණ ජ්යොතිෂවේදී, ජය ශ්රී නන්ද කුමාර
