නිවෙසක නැවුම් බව පවත්වා ගැනීම යනු එම නිවෙස තුළ ජීවත් වන්නා වූ පිරිසගේ සෞඛ්‍ය තත්ත්වය, මානසික තත්ත්වය මෙන්ම ආර්ථිකය පැත්තටත් සුබවාදී වෙනසක් එක් කළ හැකි කාරණයක් ලෙස පෙන්වා දිය හැකිය. ඒ අනුව සෑම කෙනකුම තම තමන්ගේ නිවාස ගැන යම් සැලසුමක් සහිතව කටයුතු කිරීම වැදගත් වේ. නිවෙසක වාස්තු දෝෂ ඇතත් නැතත් එම නිවෙස ඇතුළත තත්ත්වය, ගෘහ භාණ්ඩ රැඳවීම් ආදිය නිසි පරිදි සිදු නොවේ නම් සිදුවන්නේ සුබ දෙයට වඩා අසුබ දෙයකි. එහෙයින් වඩාත් හොඳින් සුබ පල ලබන්නට නිතරම නිවෙස තුළ ඇති ධනාත්මක ස්වභාවය වර්ධනය කරගත යුතු වෙයි.
ඒ සඳහා නිතරම නිවෙස ඇතුළත නැවුම් ස්වභාවය වැඩිකිරීමත්, ඒකාකාරී ස්වභාවය අවම කිරීමත් වැදගත් වේ. මේ කාරණයේදී විවිධ මාස සහ කාල වකවානු අනුවත් විවිධ වෙනස්කම් සිදුකළ හැකි බැවින් මෙම මැයි මාසය සඳහා වඩාත් සුදුසු වෙනස්කම් මොනවාද යන්න
විමසා බලමු.
නිවෙසේ සාලය
නිවෙසේ සාලයේ දියඇලි, මාළු ටැංකි ඇත්නම් ඒවායේ නැවුම් බව පවත්වා ගැනීම සඳහා ජලය මාරුකර පිරිසිදු කරන්න. විශේෂයෙන්ම ටැංකි තුළට ගෝල්ඩ් ෆිෂ් මාළුන් කිහිප දෙනකු එක් කරන්න. ටැංකිය තිබූ ස්ථානය වෙනස් කරන්න. එය උතුරු දිශාවට බරව ස්ථානගත කරන්න.
විවිධ ආකාරයෙන් තබා ඇති ගෘහ භාණ්ඩ එම පිහිටීමෙන් වෙනස් කර වෙනත් ආකාරයට ස්ථානගත කරන්න. වීදුරු සහිත ගෘහ භාණ්ඩ නැගෙනහිරට මුහුණලා බටහිර දෙසින් තබන්න. විද්‍යුත් උපකරණ සාලයේ ඊසාන දෙසින් තැබීමත් මේ මැයි මාසයට ගැළපේ.
මාසයෙන් මාසයට ඔබේ නිවෙසේ ආලේපිත වර්ණ වෙනස් කිරීම පහසු කටයුත්තක් නොවේ. එනිසා ඔබට පහසු පරිදි සුදු විදුලි ආලෝක දැල්විය හැකි අතර නැතිනම් කහ පැහැති බල්බයකුත් සාලයේ දල්වන්න.
අලුත් මල් දැමූ බඳුනක් නිතරම සාලයේ නැගෙනහිර දිශාවේ තබන්න. එයට දිනපතා ස්වභාවික මල් දැමිය හැකි නම් වඩාත් සුබ වේ.
කෑම කාමරය
කෑම මේසය වටේ පුටු ගණන 6, 8 හෝ 9ක් තබන්න. එය වාසනාව කැන්දන ක්‍රමයකි.
කෑම මේසය අසල විශාල කණ්ණාඩියක් සවිකරන්න. එවිට කෑම මේසයේ ඇති කෑම දෙගුණ වී පෙනෙනු ඇත. ඇතැම් ආපන ශාලාවල දෙපසට කණ්ණාඩි බිත්ති සකසා ඇත. හොඳින් බලන්න. එවැනි කඩ දියුණුවෙන් දියුණුවට පත්වේ. මේ රහස ඔබේ නිවෙසටත් භාවිත කරන්න.
කෑම කාමරය අසල නාන කාමර හෝ කුස්සිය තිබීම සුදුසු නොවේ. ඔබගේ හෝ අසල්වැසි නිවෙසක එවැනි දේ ඔබේ කෑම කාමරයට කෙළින් ඇත්නම් එය ආවරණය කරන්න.
ඔබේ කෑම මේසය නිවෙසේ පිටතට නොපෙනෙන්නේ නම් ඒ මත අලුත් මල් බඳුනක් සහ අලුත් පලතුරු සහිත වට්ටියක් තබන්න.
කුස්සිය
ඉතා හොඳින් ආලෝකය විහිදුවන විදුලි බුබුළක් කුස්සියට සවිකරන්න. ආලෝකය කුස්සියට අත්‍යාවශ්‍ය දෙයකි. එය දියුණුවට රහසකි.
ශීතකරණය මේ මාසයේ පුරවා තබන්න. අලුත් පලතුරු එළවළු ආදිය පිරුණු ශීතකරණය ඔබගේ නිවෙසට ධනය සහ වාසනාව කඳවනු ඇත. සාලයේ සිටින අයට කුස්සිය ඇතුළත පෙනෙනවා නම් පමණක් එය නොපෙනෙන ලෙස ආවරණය කරන්න. එවිට වාසනාව පහසුවෙන් ළඟා වේ.
නාන කාමරය
මේ මාසයේ නාන කාමරයේ දොර අනවශ්‍ය අවස්ථාවලදී වසා තබන්න. එයින් ඔබගේ ආර්ථිකය සහ වාසනාව වර්ධනයට හේතු යෙදේ. නාන කාමරයේ වැසිකිළි පියන නිතරම වසා තබන්න. නාන කාමරයේ කණ්ණාඩියක් එල්ලන්න. එසේ ඇත්නම් එය බටහිර පැත්තේ හෝ වයඹ පැත්තේ බිත්තියට මාරු කරන්න.
නිදන කාමර
නිදන කාමරයේ ඇති අනවශ්‍ය බඩු කිහිපයක් හෝ අඩු කරන්න. ඇඳෙහි මෙට්ටය හෝ එසේ නොමැති නම් අඩුම තරමේ අලුත් ඇඳ ඇතිරිලි කිහිපයක් හෝ ඇඳට භාවිත කරන්න.
නිදන ඇඳ ජනේලය අසලින් ඉවතට ගෙන වෙනත් තැනක ස්ථානගත කරන්න.
මාළු ටැංකි හෝ ජලයට සම්බන්ධ චිත්‍ර ඇත්නම් වහාම ඉවත් කරන්න.
විදුලි බල්බය මඳ ආලෝකයක් විහිදුවන එකකට මාරු කරන්න.
ඉහත සඳහන් කරුණු මැයි මාසය පුරා කළ හැකි නම් එහි සුබ ප්‍රතිඵල මාසය අවසන් වීමට ප්‍රථමයෙන් අත්දැකීමෙන් දැනගත හැකි වනු ඇත. එසේම වෙනදාට වඩා ඔබගේ ආර්ථිකය ශක්තිමත් වෙනවා සේම ඊට සමාන්තරව සිතේ නිදහස ක්‍රියාශීලී බව, නිරෝගී සුවයත් වර්ධනයට හේතු යෙදෙනු ඇත.
