ඔබට මට හෝ වෙනත් කාට වුවද ග්රහයන්ගේ සහ සූර්යයාගේ කිරණවලින් බේරීමට හැකියාවක් නැත. එනිසා ජන්මියකු උපදින මොහොතේ ඔහුගේ ජීවිතයට මේ ග්රහයන් බලපාන ආකාරය පිළිබඳ සොයාබලා කේන්දරයක් සකසනු ලබන්නේ ඉදිරි කාලය එම ජන්මියාට ග්රහයන්ගේ සුබ අසුබ පල දැන උපක්රමශීලීව ජීවත් වීම පහසුකරවීම සඳහායි. මේ තත්ත්වය නිසි ලෙස තේරුම් ගත් පුද්ගලයා ඉතා සූක්ෂ්මව කටයුතු කර සියලු ග්රහ උපද්රවයන්ගෙන් බේරී කටයුතු කරනු ඔබ දැක ඇතුවාට සැකයක් නැහැ.
වර්තමානය වෙද්දී ලෝකයට මෙන්ම අප රටටද යම් තරමක අශුභවාදී ග්රහ තත්ත්වයන් බලපවත්නා මුත් ජන්මියකු ලෙස ඔබට ඔබේ ජීවිතය සාර්ථක කරගන්නට ක්රම ඇත.
පුරාණයේ ඍෂිවරුන් නුවණින් බලා උදාවිය හැකි ග්රහ අපල තත්ත්වය හඳුනාගෙන, ඒවායෙන් ආරක්ෂා වීම පිණිස විවිධ ක්රමවේද හඳුන්වාදී ඇති අතර අප මේ ඉදිරිපත් කරන බලගතු රන් තැඹිලි තෙලද එවැන්නකි. මෙම තෙල භාවිතයෙන් ඔබට ධනය, බලය, ශක්තිය මෙන්ම ජීවිතයේ සිතූ පැතූ සම්පත් උදාකර ගැනීම පහසු කරවන බවද ඍෂි මතයයි.
මෙම තෙල සකසා ගැනීමට සිතන ඔබ හෝ වෙද මහතා කිලි කුණුවලින් වැළකී සති දෙකක කාලයක් පේවී පිට පොත්ත කොළ පැහැති, මදය රතට හුරු රන් තැඹිලි ගසක් සොයාගත යුතුය. පසුව එම ගස අවට පිරිසිදු කොට ගස වටා සුදු රෙදිකඩක් ඔතා, ගසට සතියක් පුරා උවටැන් සත්කාර කළ යුතුය.
රන් තැඹිලි ගෙඩි කඩාගැනීමට අවශ්ය යැයි ඔබ තීරණය කරන දිනයේ පිරිසිදුවී පේවී, ආගමික වතාවත් ඉටුකොට ඔබට මෛත්රී නැකැත උදාවන සූක්ෂ්ම ගුරුගේ හෝරාවක ගෙඩි කඩාගත හැකිය. එහිදී වඩාත් සැලකිලිමත් විය යුතු කාරණා කිහිපයක් ගැන ඍෂිවරු සඳහන් කරති. එනම් ගසට නැඟ අතින්ම ගෙඩි කඩා බිම නොවැටෙන ලෙස උරයකට දමාගත යුතු අතර කටයුත්ත සිදුකරන්නා සියලු කටයුතු අවසන් වන තුරු කතා නොකිරීමට වගබලා ගත යුතුය.
ඉන් පසුව ඔබට පහසු පරිදි පන්සලේ හෝ පහසු වෙනත් බෝධියක් අසල උඩට උඩුවියන් යටට යටි වියන් බැඳ ලී උලකින් ලෙලි ගසා ගත් තැඹිලි ලී මිටකින් බිඳ ලී දැති සහිත උපකරණයකින් ගාගැනීම වටී.
මේ සියලු කටයුතු මුඛවාඩම් බැඳ, කිරි මිරිකා, අලුත් මැටි මුට්ටියක දමා තෙල් සිඳීම කළ යුතු අතර තෙල් මුට්ටිය තනි නොකිරීම වෙද මහතාගේ ප්රධාන රාජකාරිය වේ. තෙල පැසීගෙන එද්දී විෂ්ණු ස්තෝත්ර කළ ප්රාණජීව දලු ස්වල්පයක් ඊට එකතු කළ හැකි නම් වඩාත් සුබ වේ.
තෙල සිදඟත් පසු එම තෙල දිනකට එක්දහස් අට වර බැගින් බුදුගුණවලින් ජීවම් කරගත යුතු අතර එම ජීවම් කරන දින ගණන වැඩිවන තරමට තෙල්වල ගුණය බලය වර්ධනය වන බව දත යුතුය.
යම් කෙනකුට මෙම තෙල පලඳින්නේ නම් අවශ්ය අයගේ කේන්ද්රයට අනුව සුදුසු ස්තෝත්ර ගයමින් ශරීරයේ පපු ප්රදේශයේ ගෑවෙන ලෙස සුරයක දමා පැලඳීම සුදුසු වේ.
මෙමගින් කෙනකුගේ අපල දුරු කෙරෙනවා සේම සිතේ ඇති යහපත් අරමුණු ඉටුකර ගැනීමට ශක්තියක් ලැබෙන බවද දත යුතුය.
ජ්යොතිෂවේදී ටී බණ්ඩාර