රටේ ප්රදේශ රැසකටම වැහිබර කාලගුණයක් මාස කිහිපයක සිටම පවතිනවා. වැස්සෙ එළියට බහින එක නම් කාටවත් මිහිරි අත්දැකීමක් නෙවෙයි. ඒ නිසා ගෙදරටම වෙලා ඉන්න තියෙනවා නම් කියලා හිතුවත් ගෙදර ඉඳන් රාජකාරි කරගන්න බැරිකමට යන්නම වෙනවා. වෙනදා තරම් විලාසිතා නැතත්, සරල ඇඳුමක් මේ වැහි කාලයට පහසුයි. හැබැයි ඉතින් කුඩය නම් වරදින්නම බැහැ. වැස්ස නිසා අවට පරිසරය ගැන වැඩි තැකීමක් නැති වුණාට පෙරමඟ නිමිති ගැන හිතන අයට නම් ඒ ගැන හිතන්නම වෙනවා. වැස්ස කියලා පෙරමඟ නිමිති වෙනස් වෙන්නේ නැහැනේ. වැස්සේ කම්මැලිකමේ කුඩයත් ඉහළන් එළියට අඩිය තියද්දී අවට පරිසරය ගැනත් සැලකිලිමත් වෙන්න අමතක කරන්න එපා. යන-එන මඟතොට අසුබ පෙරනිමිති මඟහැරලා සුබ නිමිතිවලින් වාසනාව ළඟා කරගන්න මේ ලිපිය ඔබටත් සහාය වෙයි.
- ගමන ආරම්භයේදී හිස ආබාධයක් ඇති වුණේ නම් බොහෝ දෙනා තමා ප්රිය නොකරයි.
- නිවෙසින් පිටවන විටදීම තද කැස්සක් ඇති වුණේ නම් අතේ තිබූ මුදල නිකරුණේ වියදම කිරීමට සිදුවෙයි.
- ටික දුරක් ගොස් ගෙදර අයට කතා කොට අමතක වූ යමක් ඉල්ලා යයි නම් බලාපොරොත්තු වූ දෙය ඉෂ්ට නොවේ. නැවත යෑමට සිදුවෙයි.
- තම නිවෙසේ අයකුට බැණවදිමින් නිවෙසින් එළියට බැස ගියේ නම් – තදබල පාඩුවක් සිදුවෙයි. ගමනින් සතුටක් නොලැබේ.
- නිවෙසින් එළියට බැස කණ්ණාඩියකින් මුහුණ බලා ගමන ගියේ නම් – බොහෝ අඩුපාඩු සහිත ගමනක් යෑමට සිදුවෙයි. ගමන නිෂ්ඵල වෙයි.
- ගේ-දොර වසා ගමනක් යෑමට සූදානම් වෙද්දී දොර යතුර බිම වැටුණේ නම් – එම ගමන සුබ නොවේ. වංචාවක් සිදුවෙයි.
- ගමන ආරම්භයේදී කුඩා අයකු අත තිබූ දෙයක් කැඩී, බිඳී ගියේ නම් – මඟ අනතුරකට මුහුණ පෑමට සිදුවෙයි. ශාරීරික හානි සිදුවීමකි.
- වඳුරකු ගමනේදී ඇඟට පැන සූරා ගියේ නම් – තම ජීවිතය අහිමි වෙයි. තමන්ට ඉතා නරක මොහොතකි. මාරක අපලයකි.
- ගමන ආරම්භයේදීම දුරකතනයෙන් හෝ කෙනකුගේ පණීවුඩයකින් මරණයක් ගැන අසන්නට ලැබුණේ නම් – බලාපොරොත්තු ගමන යෑමට නොලැබෙයි. අනවශ්ය ගමනක් යෑමට සිදුවෙයි. අධික වියදමක්ද සිදුවෙයි.
- නිවෙසේ සිට යන මාවතේ ගල් පඩිපෙළේ ගලක් ගැලවුණේ නම් – වාහන පහසුකම ගමනේදී නොලැබේ. අධික ශාරීරික මහන්සියක් විඳීමට සිදුවෙයි.
- නිවෙසින් ගමනක් යෑමට එළියට බැස නිවෙසේ අයකුට අවශ්යතාවකට මුදල් දී ගියේ නම් – කරුණ ඉෂ්ටවීමත්, අධික වියදමක් සිදුවෙයි.
- තමන් සමඟ ගමන යන අයකු ගමන ආරම්භයේදීම නිවෙසින් බැස සිගරැට්ටුවක් දැල්වූවේ නම් – පාඩු කිහිපයක් සිදුවෙයි. ගමනින් සතුටක් නොලැබේ.
- ගමනේ ආරම්භයේදීම කුඩා ළමයකු අතින් කෑමට යමක් ලැබුණේ නම් – සතුටුදායක ගමනකි. සුබපල ගමනකි. සියලු කරුණු ඉෂ්ට වෙයි.
- ගමනේ ආරම්භයේදී ඉදුණු කෙසෙල් ගෙඩි කෑමට ලැබුණේ නම් – ධනයෝග පහළ වන ගමනකි. සතුටුදායක ලාභයක් ලැබේ.
- නිවෙසින් බහින විට නිවෙසේ අයකු පරුෂවචන කියනවා ඇසේ නම් – ගමනින් අනතුරකි. වස – විෂ කැවීමට ඉඩ තිබේ. ගිය කරුණ ඉෂ්ට නොවේ.
