ලෙඩ හංගන වාස්තු

රසිකා නීතිවේදිනියක්. නීතිමය උපදෙස් ලබා දෙන ආයතනයක් ඇය සතුවුණා. රසිකාගේ සැමියා සිසිර රජයේ උසස් රැකියාවක් කළා. ඊට අමතරව සිසිරට පවුලේ ව්‍යාපාරයක් වූ වාහන අලෙවි ව්‍යාපාරයකින් මුදල් හිමි වුණා. ඔවුන් ජීවත් වුණේ හලාවතට ආසන්න ප්‍රදේශයක. පදිංචිවෙලා හිටිය නිවෙසේ ඉඩකඩ, පහසුකම් මදි හින්දා අලුත් කොටස් කිහිපයක් එකතු කළා. ටික දවසක් යද්දී රසිකාගේ ශරීරයේ තැනින් තැන සැරින්සැරේ වණ, විසප්පු වගේ ගෙඩි දාන්න පටන් ගත්තා. හිටි හැටියේ රසිකා ක්ලාන්තේ දාලා වැටෙනවා. ලක්‍ෂ ගාණක් වියදම් කරලා විවිධ පරීක්‍ෂණ කළත් ලෙඬේ හරියට හොයාගන්න බැරි වුණා.

පස්සේ රසිකාගේ සුදු රුධිරාණු මට්ටමත් වැඩි වෙන්න පටන් ගත්තා. අසනීප නිසා රසිකාගේ රැකියාව සම්පූර්ණයෙන් කඩාවැටුණා. බිරියගේ අසනීප නිසා සිසිරට රැකියාව කරගන්න තරම් මානසිකත්වයක් තිබුණේ නැහැ. අන්තිමේදී නමක් නොදන්නා, සුව නොවන රෝගයට ප්‍රතිකාර කරන්න ගිහින්, ආදායම් අඩුවෙලා රසිකාගෙයි, සිසිරගෙයි ජීවිත සම්පූර්ණයෙන් කඩාවැටුණු නිසා තමයි ඔවුන් නිවෙසේ වාස්තු පරීක්‍ෂා කරන්න හිතුවේ. එක් උදෑසනක එම නිවෙස පරීක්‍ෂා කිරීමට ගිය මට සියල්ලට හේතු සාධක වූ වාස්තු දෝෂ සොයා ගැනීමට හැකි වුණා. පැවැති වාස්තු දෝෂ සහ ඒවා නිරාකරණයට මා උපදෙස් ලබාදුන්නේ මෙසේය.

නිවෙස තුළ වැසිකිළි වළ
අලුතින් සැදූ මුළුතැන්ගෙයි තුළ වැසිකිළි වළ පිහිටා තිබිණි. යම් නිවෙසක් තුළ වැසිකිළි වළ පිහිටි විට සොයා ගැනීමට නොහැකි දරුණු රෝගාබාධ සෑදේ. කොතරම් ප්‍රතිකාර කළත් රෝග සුවනොවේ. නිවැසියන්ගේ ජීවිත කායික, මානසිකව පිරිහෙයි. එනම් කිසිදු දියුණුවක් නොමැතිව එකතැන පල්වෙන ජීවිත නිර්මාණය වෙයි. පරණ ගෙදරට අලුත් කොටසක් සම්බන්ධ නොවෙන්න කියලා හිතන් රෙජිෆෝම් තියලා තමයි බිත්ති බැඳලා තිබුණේ. එය හිත රවටා ගැනීමක් පමණි. නිවෙසක් පරිවාර ගෘහයකින් වෙන්වීමට නම් මනුෂ්‍යයකුට යෑමට හැකි වන පරිදි ඉඩ තැබිය යුතුය. වැසිකිළි වළ ඉවත් කිරීමෙන් දෝෂය ඉවත් වෙයි. රසිකාට හඳුනාගත නොහැකි රෝගයක් සෑදීමට මූලික වශයෙන් හේතු වූයේ නිවෙස තුළ වැසිකිළි වළයි.

වේධාන්තර දෝෂය
නිවෙස ඉදිකිරීමේදී අත්තිවාරම පසුපසට ගෙන ප්‍රධාන දොර තබා තිබිණි. එවිට ප්‍රධාන දොර බ්‍රහ්ම පාදයේ සිට විහිදෙන වේධ රේඛාවකට ප්‍රධාන දොර කැපිණි. මෙය ගෘහමූලිකයා දැඩි පිරිහීමට ලක්කරන්නකි. කොතරම් මුදල් හරි හම්බ කළද ඉතිරියක් නැතිවෙයි. මොනදේ තිබුණත් ජීවිතයේ සැනසීම අහිමි කරයි. මෙම නිවෙසේ ප්‍රධාන දොර ගලවා සුබපාදයකට ඊසානට තැබීය.

විකලාංග දෝෂ
විකලාංග දෝෂ ලෙස හඳුන්වන්නේ අත්තිවාරම් ඇදට දැමීමයි. මෙම නිවෙසේ තැන් කිහිපයක අත්තිවාරම අටපට්ටම් හැඩයකට දමා තිබුණේ අලංකාරය පිණිසය. ශරීරය, අත-පය, කොරව, ආබාධිත තත්ත්වයකට පත්ව ඇති ආකාරයට අත්තිවාරම් ඇදට දැමූ නිවෙසක් සමාන කළ හැකිය. ශරීර අංග ආබාධිත වූ විට ක්‍රියාකාරී ජීවිතයක් ගතකිරීමට නොහැකි මෙන් අත්තිවාරම් ඇදට දැමූ නිවෙස්වල මානසික සතුට නැතිව යයි. ජීවිතයේ ක්‍රියාකාරී බව, වේගවත් බව අඩාළ වී බාධා ඇති වෙයි. විකලාංග දෝෂය ඉවත් කළ හැකි එකම ක්‍රමය බිත්ති කෙළින්කර සැකසීම පමණි.

පැවැති දෝෂ නිරාකරණයෙන් පසු රෝග හඳුනා ගැනීමට හැකි වූ අතර, රසිකා සුවපත් භාවයට පත්ව රැකියා කටයුතුවල නිරත වෙමින් සිසිර සමඟ සතුටින් ජීවත් වෙයි.
ජ්‍යොතිෂවේදී අමාලි අගස්පතිරණ