මේ සතියේ ඔබට මොකද වෙන්නේ

2020 මාර්තු 01 ඉරිදා සිට 07 සෙනසුරාදා දක්වා

මේෂ – ඇවිදීමට ප්‍රිය කරයි
මේ සතිය තුළදී ඔබ වැඩි උනන්දුවක් දක්වන්නේ ගමන් – බිමන් යෑම සඳහාය. ලග්නාධිපති කුජ පුණ්‍ය ස්ථානය වන 9 වැන්නේද, සඳු 1, 2, 3, 4 භාව හරහාද ගමන් ගනී. විනෝද වීමටත්, පින්දහම් කර ගැනීමටත් අවස්ථාව උදාවෙයි. කලකට පෙර ආරම්භ කරන ලද වැඩක් නිමකර ගැනීමටද ඔබට හැකිවෙයි. විරුද්ධ අදහස් ඇති අය සමඟ වාද – භේදවලට නොයා යුතු කාලයකි. සුළු සුළු අසනීප ඇති මේෂ ලග්න හිමියන් නිතරම වෛi උපදෙස් මත ක්‍රියා කළ යුතු සතියකි.
ජය අංකය : 1, ජය වර්ණය : දම් පැහැය

වෘෂභ – ඥාතීන්ගෙන් ඈත්වීමක්
ඥාතීන් කිහිප දෙනකුම සමඟ තිබුණු සමීප සම්බන්ධතා දුරස්වන ආකාරයේ සිදුවීමකට මුහුණ දීමට සිදුවෙයි. ලග්නාධිපති සිකුරු වැය ස්ථානය වන 12 වැන්නේද, සඳු 12, 1, 2, 3 භාව හරහාද ගමන් ගනිමින් සතිය ගෙවී යයි. නිතර සිත් තැවුලෙන් කාලය ගෙවීමට සිදුවන අතර, ආදායම් තත්ත්වය වෙනදාට වඩා පහළ යන බවක් පෙනේ. භාරගත් වැඩක් කලට, වේලාවට නිමකර ගැනීමට නොහැකි වීමෙන් ඔබ ගැන තිබුණු විශ්වාසය පලදුවෙයි.
ජය අංකය : 3, ජය වර්ණය : කොළ පැහැය

මිථුන – තනි තීරණ
තම මතයට පමණක් ගරු කරමින් තනි තීරණ ගෙන වැඩ කටයුතු කරන අතර, බොහෝ දුරට එම කටයුතු සාර්ථක වෙයි. ලග්නාධිපති බුධ පුණ්‍ය ස්ථානය වන 9 වැන්නේද, සඳු 11, 12, 1, 2 භාව හරහාද ගමන්ගනී. වෙනදාට වඩා හිතමිතුරන් සමඟ සමීපව කටයුතු කිරීමට සිදුවන අතර, අනාගත දියුණුව සඳහා අඩිතාලමක් දමා ගැනීමට උත්සාහ දරයි. සමාජයේ උසස් තත්ත්වයක් ලැබෙනවා ඇත. විවාහ වීමට සුදුසු වයසේ සිටින මිථුන ලග්න හිමියන්ට මංගල යෝග උදාවෙයි.
ජය අංකය : 9, ජය වර්ණය : කහ පැහැය

කටක – මූලිකත්වය ගනී
පොදු වැඩකටයුත්තක මූලිකත්වය ඔබ වෙත පැවරේ. ලග්නාධිපති සඳු 10, 11, 12, 1 යන ස්ථාන හරහා ගමන් ගන්නා සතිය ඔබට තරමක කාර්ය බහුල බවක් ඇති කරයි. අතමිට මුදල් යහමින් ගැවසෙන අතර, වියදම්ද අධික වෙයි. මේ සතිය තුළදී මවුපිය ආදී වැඩිහිටියන්ගෙන් යම් ලාභයක් ලැබීමටද ඉඩ තිබේ. සතිය මැද යෙදෙන විශේෂ උත්සව අවස්ථාවකදී ඔබට ප්‍රමුඛ තැනක් හිමිවෙයි. සෞඛ්‍ය තත්ත්වය එතරම් යහපත් නොවන අතර, අසනීප මැදම වැඩ කටයුතු කරගෙන යෑමට සිදුවෙයි.
ජය අංකය : 1, ජය වර්ණය : සුදු පැහැය

සිංහ – ගුප්ත විiා කටයුතු
ප්‍රශ්නයක් විසඳා ගැනීම සඳහා ගුප්ත විiා කටයුතුවලින් පිහිට පැතීමට යොමුවෙයි. ලග්නාධිපති රවි 7 වැන්නේද, සඳු 9, 10, 11, 12 භාව හරහාද ගමන්ගනී. මේ කාලය තුළදී තමන්ගේ බලාපොරොත්තු කිහිපයක්ම ඉටුවන ලකුණු පෙනේ. සැම අතින්ම යහපත් කාලයකි. පිය පාර්ශ්වයේ ඥාතියකු නිසා විශේෂ ලාභයක් අත්වෙයි. භාවනා කටයුතුවල යෙදී සිත දියුණුකර ගැනීමටද උත්සාහයක් දරයි. සති අන්තයේදී ආගමික කටයුත්තකට සහභාගි වෙයි.
ජය අංකය : 7, ජය වර්ණය : රතු පැහැය

කන්‍යා – උරුමයක් ලැබේ
මියගිය වැඩිහිටි ඥාතියකුගෙන් ඔබට ලැබෙන්නට නියමිතව තිබුණු උරුමයක් නිරවුල් වන බවක් පෙනෙන අතර, ලග්නාධිපති බුධ 6 වැන්නේද, සඳු 8, 9, 10, 11 භාව හරහාද ගමන් ගනී. හදිසි හෘදයාබාධයක් ඇති වීමේ අවදානමක් පවතින බැවින් ශරීර සෞඛ්‍ය ගැන ඉතාමත් කල්පනාකාරී විය යුතු සතියකි. මුදල් තත්ත්වය යහපත් වන අතර, අනාගතය වෙනුවෙන් මුදලක් ඉතිරිකර ගැනීමටද හැකිවෙයි. ප්‍රීති සාදයක, ගමන්-බිමන්, රසවත් ආහාරපාන ආදිය ලැබෙන සතියකි.
ජය අංකය : 6, ජය වර්ණය : කහ පැහැය

තුලා – තරගකාරී බවක්
රැකියා කටයුතුවල, ව්‍යාපාරික කටයුතුවල වෙනදාට වඩා තරගකාරී බවක් ඇති වන සතියකි. සඳු 7, 8, 9, 10 භාව හරහාද, ලග්නාධිපති සිකුරු, 7 වැන්නේද ගමන්ගනී. විවාහකයාගේ අසනීපයක් වෙනුවෙන් කාලය ගතකිරීමට සිදුවෙයි. ආදර බන්ධන පිළිබඳව බලාපොරොත්තු කඩවන සතියකි. තමන්ට නොගැළපෙන අය සමඟ ඇසුරට යෑමෙන් අනවශ්‍ය කරදර ඇති විය හැකිය. ශරීරයේ ඇති වන උෂ්ණාධික බව නිසා වෛi ප්‍රතිකාර ගැනීමට සිදුවිය හැකිය.
ජය අංකය : 7, ජය වර්ණය : නිලි පැහැය

වෘශ්චික – කරදර බාධක
එදිනෙදා කටයුතුවලට බලාපොරොත්තු නොවූ කරදර, බාධක එල්ල වන අතර, ලග්නාධිපති කුජ 2 වැන්නේද, සඳු 6, 7, 8, 9 භාව හරහාද ගමන් ගනිමින් සතිය ගෙවී යයි. මේ සතිය තුළදී ඔබ වැය කරන මුදල්වලින් වැඩිහරියක් නිෂ්ඵල ලෙස අපතේ යෑමට ඉඩ ඇති බැවින් වියදම් කිරීමේදී කල්පනාකාරී විය යුතුය. උගුර, කන, නාසය ආශ්‍රිතව ඇතිවන ආබාධයකට ප්‍රතිකාර ගැනීමට සිදුවෙයි. තමන් අකැමැති අය සමඟ ඇසුරු කිරීමටත් ඔබත් සමඟ කරන ගනුදෙනුවකින් පාඩු විඳීමටත් සිදුවෙයි.
ජය අංකය : 2, ජය වර්ණය : දුඹුරු පැහැය

ධනු – රහස් කටයුතු
මුදලක් ඉපැයීම සඳහා නීත්‍යනුකූල නොවන දෙයකට යොමු වන බවක් පෙනේ. සඳු 5, 6, 7, 8 භාව හරහාද, ලග්නාධිපති ගුරු ලග්න භාවයේමද ගමන් ගනී. දරුවන් ඇති ධනු ලග්න හිමියන්ට ඔවුන්ගේ මුරණ්ඩුකම් ගැන දුකට පත්වීමට කරුණු යෙදේ. ගුවන් ගමනක් යෑමට අවස්ථාවක් ලැබිය හැකිය. රහසිගතව මුදලක් ආයෝජනය කිරීමෙන් ආදායමක් උපයා ගැනීමට උත්සාහ දරයි. උදරාබාධයක් නිසා එදිනෙදා වැඩකටයුතුවලට බාධාවක් ඇතිවෙයි.
ජය අංකය : 1, ජය වර්ණය : කොළ පැහැය

මකර – නීතිමය ගැටලුවක්
දේපොළ පිළිබඳ ප්‍රශ්නයක් විසඳා ගැනීමට නීතියේ පිහිට පැතීමට සිදුවෙයි. ලග්නාධිපති ශනි ලග්න භාවයේමද, සඳු 4, 5, 6, 7 යන භාව හරහාද ගමන් ගනිමින් සතිය ගෙවී යයි. ආදායම් තත්ත්වය වෙනදාට වඩා යහපත් වන අතර, දුරදිග බලා කටයුතු කරන බවක් පෙනෙන්නට තිබේ. පැරැණි ණය මුදලක් ලැබීමටද ඉඩ ඇත. පුණ්‍ය කටයුතු සඳහා වැඩි උනන්දුවකින් ක්‍රියා කරන කාලයකි. ගෙදර-දොර අලංකාර කරගැනීමටද කාලය යොදවයි.
ජය අංකය : 1, ජය වර්ණය : නිල් පැහැය

කුම්භ – සැපපහසුව අඩුවෙයි
සඳු 3, 4, 5, 6 භාව හරහාද, ලග්නාධිපති ශනි වැය ස්ථානය වන 12 වැන්නේද ගමන් ගනිමින් ගෙවී යන මේ සතිය තුළදී ඔබට මෙතෙක් පැවැති සැප පහසුකම්වල අඩු වීමක් පෙනෙන්නට තිබේ. රාජකාරී ස්ථානයේ වෙනසක් සිදුවෙයි. ව්‍යාපාර කටයුතුවල යෙදී සිටින අයට එදිනෙදා කටයුතුවලට බාධක එල්ල වී ආදායම අඩු වන බවක් පෙනේ. සෙම් රෝග, උණ රෝග ආදිය ඇති වන කාලයකි. දරුවන්ගේ කටයුතු ගැන වෙනදාට වඩා උනන්දුවෙන් කටයුතු කරයි.
ජය අංකය : 3, ජය වර්ණය : දම් පැහැය

මීන – උසස්වීමක්
ලග්නාධිපති ගුරු 10 වැන්නේද, සඳු 2, 3, 4, 5 භාව හරහාද ගමන් ගනිමින් ගෙවී යන සතිය තුළදී ඔබගේ තත්ත්වයේ උසස් වීමක් බලාපොරොත්තු විය හැකිය. ව්‍යාපාර කටයුතුවල යෙදී සිටින මීන ලග්න හිමියන්ට විශේෂ ලාභ අත්වන කාලයකි. ගෙදරට අවශ්‍ය අලංකාර භාණ්ඩ, ඇඳුම්-පැලඳුම් මිලදී ගැනීමට වැඩි මුදලක් වියදම් කරයි. සති අන්තයේදී දුරබැහැර විනෝද ගමනකට සහභාගි වීමට අවස්ථාව උදාවෙයි. සෞඛ්‍ය තත්ත්වය යහපත්ව පවතී.
ජය අංකය : 1, ජය වර්ණය : කහ පැහැය
ජ්‍යොතිෂ විiා විශාරද, ජ්‍යොතිෂ ශිරෝමනී,
දේශබන්ධු, අගලවත්තේ චන්දන වීරක්කොඩි
0775 489695