නාසය කවාකාර නම් තත්ත්වය බරපතළයි

කෙනකුට තවත් කෙනකු ගැන දැනගත හැකි මාර්ග රාශියකි. ඒ අතරින් විවිධ අය කියන කටකතා එහෙමත් නැතිනම් ඒ අයම තමන් සමඟ කියන දේවල් ඇසුරින් බොහෝ දේ දැනගනී. එහෙත් මේවාට අමතරව කිසිවකු නොකියා කිසිවකුට නොදැනී කෙනකු ගැන දැනගැනීමට හැකි ශාස්ත්‍රයක් ලෙස අංග ලක්‍ෂණ ශාස්ත්‍රය හඳුන්වා දිය හැකිය. ඒ අනුව එකිනෙකාගේ ශරීරයේ විවිධ වූ අංගයන් භාවිත කර බොහෝ දේ හඳුනා ගැනීමට හැකි අයුරින් නූතන ඍෂිවරු මෙම ශාස්ත්‍රයේ කරුණු පෙන්වා දී තිබේ. අංග ලක්‍ෂණ ශාස්ත්‍රයේදී ස්ත්‍රි ශරීරාංග ගැන වැඩි ඉඩක් වෙන්කර ඇති බවකුත් පෙනෙන්නට තිබෙන අතර, ස්ත්‍රීන් සම්බන්ධව ඉතා නිවැරැදිව හඳුනාගැනීමක් කරන්නට එම කරුණු ඉවහල් වී ඇති බවක් පැහැදිලි වෙයි. එසේම පුද්ගල ගතිගුණ ගැන ඉතාමත් නිවැරැදිව හඳුනා ගැනීමටද අංග ලක්‍ෂණවලින් හැකි බව ඍෂි මතය වී ඇත. එහිදී පිරිමි පුද්ගලයන්ගේ ගතිගුණවලට වඩා ස්ත්‍රීන්ගේ ගතිගුණ ගැන සමාජයේ වැඩි අවධානයක් යොමු වන අතර, ඒ අනුව ස්ත්‍රියකගේ නාසයේ හැඩයෙන්, පෙනුමෙන් හෙළිවන තොරතුරු මොනවා දැයි බලමු.

පහතට එල්ලෙන හැඩයේ නාසය
සැමියාගේ වැරැදිම සොයමින් ඔහු කරන සියල්ලට විරුද්ධව කටයුතු කරන්නියක් වන අතර, පරපුරුෂ ඇසුරට ආශා කරන්නියකි.

සිහින් සිදුරු ඇති දික්වූ නාසය
දුර – දිග සිතා බලන බුද්ධිමත්, අයකු වන අතර, සමාජයෙන් ගරු නම්බුනාම සහ උසස් තනතුරු ලබන්නට වාසනාව ඇත.

අග මහත්වූ රතු පැහැති නාසය
විවාහය අසාර්ථක වීමට හේතු යෙදෙයි. සැමියාගේ ප්‍රතික්‍ෂේප කිරීමට ලක්වෙයි. ජීවිතයේ ප්‍රශ්න, කරදර නිමාවක් නැත.

පැතැලි නාසය
කපටිකම් හොඳින්ම දන්නීය. ස්ත්‍රීන්ගේ මායම් ඉතා හොඳින් දන්නීය. ධනය සෙවීමේ දක්‍ෂතා දක්වන අතර, ආත්මාර්ථකාමීය. ජීවිතයේ අවසන් කාලය සතුට අඩු වෙයි.

උල් වූ සිහින් නාසය
ඉගෙනීමට, කලාවට දක්‍ෂය. බුද්ධිමත් බවින් යුතු අතර, ආත්මාර්ථකාමීය. අනුන්ට උදව් කිරීමට අකැමැතිය. නිතර අනුන්ගේ සිත රිදවන්නීය.

මොළොක් වූ නාසය
සමාජශීලීය. එහෙත් ඉන් ප්‍රයෝජන නොගන්නා අතර, චාම් ජීවිතයකට ප්‍රිය කරයි. ඇය නිවෙසට වාසනාව ගෙන එන්නීය.

නාසයේ අග පැතැලි ස්ත්‍රිය
බුද්ධිමත් නැත. බාල කාලයේම අතවර විඳින්නීය. ජීවිතය ගැන ගැඹුරින් නොසිතයි. ලැජ්ජා, බය නැත. හැඟීම්වලට වහල් වන්නීය.

මධ්‍යම ප්‍රමාණයේ සාමාන්‍ය නාසය
බුද්ධිමත් කාන්තාවකි. යුක්තිගරුකයි. මෙවන් ස්ත්‍රිය දයාවෙන්, කරුණාවෙන් පිරිපුන්ය. දරු මුනුපුරන්ගේ ආදරය ලබන්නීය. දිළිඳුකම් දුරලා ධනය ලැබීමේ වාසනාව ඇත.

රවුම් හැඩැති දික්වූ නාසය
බොහෝ දෙයට දක්‍ෂය. ආගමට – දහමට ළැදිවෙයි. ගුණවන්තය. ඉක්මනින් කෝප වෙයි. සැමියාගේ වැරැදි දුටුවිට කිපෙයි. දඬුවම් දෙයි.

සිහින් හැඩ මැදින් වළගැසුණු නාසය
සැමියාගේ ආදරය නොලබයි. අවාසනාවන්ත වෙයි. සමාජයේ ගෞරවය නොලබයි. නිතර නිතර පසුතැවීම් ඇති වෙයි.

අග මහත මැදින් වළගැසුණු නාසය
මේ අය අන් අයට ඊර්ෂ්‍යාකාර, ගතිගුණ වැඩි වෙයි. අන් අයගෙන් පළිගන්නාසුලු වෙයි. ඕපාදූප සොයන්නට සමතුන්ය.
ජ්‍යොතිෂවේදී ජයශ්‍රී නන්ද කුමාර