පොලිස් විශේෂ කාර්ය බළකායේ අණදෙන නිලධාරී නියෝජ්ය පොලිස්පති වරුණ ජයසුන්දර එක්සත් ජාතීන්ගේ සාම සාධක හමුදාවේ සේවයට එක්වීමට යොමු කළ අයදුම්පත පොලිස් මූලස්ථානය විසින් ඉවත දමා ඇත.
පොලිස් විශේෂ කාර්ය බළකාය වැනි පොලීසියේ සුවිශේෂී අංශයක සේවයේ නිරතව සිටින මෙයට පෙර සිටි කිසිදු අණදෙන නිලධාරියෙක් විශේෂ කාර්ය බළකාය අතහැර මේ ආකාරයට විදෙස් ගත සේවයකට යන්නට උත්සහ දරා නැතැයි පොලිස් තොරතුරු අනාවරණය කළේය.
වරුණ ජයසුන්දර විශේෂ කාර්ය බළකා ප්රධානියා ලෙස පත්වන්නේ පසුගිය ජූනි 11 වෙනිදාය. 45 වියේ පසුවන ඔහු විශේෂ කාර්ය බළකා ඉතිහාසයේ ලාබාලතම අණදෙන නිලධාරියාය. 2001 වසරේ ආධුණික සහකාර පොලිස් අධිකාරීවරයෙක් ලෙස පොලිස් සේවයට එක්වූ ඔහු වැඩිම කාලයක් සේවය කර ඇත්තේ විශේෂ කාර්ය බළකා බුද්ධි අංශයේය. සහකාර පොලිස් අධිකාරීවරයෙක් ලෙස පොලිස් සේවයට එක්වූ නිලධාරියෙක් විශේෂ කාර්ය බළකායේ මුල්පුටුවට මෙයට පෙර පත්ව නැත.
ජයසුන්දර මහතා එක්සත් ජාතීන්ගේ සාම සාධක හමුදා සේවයේ මෙයට පෙරද සේවය කර ඇති අතර වසරක කොන්ත්රාත්තුවකට අනුව එම බදවා ගැනීම සිදුවේ.
වරුණ ජයසුන්දර මෙවර එක්සත් ජාතීන්ගේ සාම සාධක හමුදාවට එක්වීමට අයදුම්කර ඇත්තේ සුඩානයේ සේවය සදහාය. ඒ සදහා ශ්රී ලංකා පොලීසියේ නිලධාරීන් විශාල පිරිසක් ඉල්ලුම්කර ඇතත් ඒ අයගෙන් වරුණ ජයසුන්දර ඇතුළු වැඩි පිරිසකගේ අයදුම්පත් පොලිස් මූලස්ථාය විසින් ප්රතික්ෂේපකර තිබේ.
ඒ අනුව පොලිස් මූලස්ථානය විසින් අයදුම්කරුවන් අතරින් නිලධාරීන් 160 දෙනෙකුගේ ලැයිස්තුවක් සකස්කර එම ලැයිස්තුව එක්සත් ජාතීන්ගේ සාමසාධක හමුදාවේ බදවා ගැනීමේ අංශයට යොමුකර ඇත. එම ලේඛනයේ නම් සදහන් නිලධාරීන්ගෙන් සුඩානයේ සේවයට බදවා ගැනෙන්නේද නිලධාරීන් 12 දෙනෙක් පමණි.
