නවග්‍රහ අපලෙට සන්තෝෂමක්

අපල යන වචනයෙන් හුදෙක්ම නිර්වචනය වනුයේ ඵලයක් නොමැති බවයි. ග්‍රහ අපල හෙවත් පීඩාකාරී තත්ත්වයන් උදාවූ විටදී වැස්ස අපට නවත්වන්නට නොහැකි නිසා කුඩයක්, වැහි කබායක්, තල් අත්තක්, හබරල කොළයක් හෝ කෙසෙල් අත්තකින් ආවරණය ලැබීමට පෙලඹේ.
ග්‍රහයන්ගෙන් වන අපල පීඩාවලදී ඒවායින් තරමක් දුරට හෝ පීඩා නොවිඳීමට යම් යම් ක්‍රමවේද ඉපැරැණි ඍෂිවරුන් විසින් ලොවට ප්‍රකාශිත ශාන්තිකර්ම රැසක් ග්‍රන්ථාරූඪ කර ඇත. කලින් සියලු සැප සම්පත්වලින් පිරී ඉතිරී ඇති අතර පසුව ඒවා සියල්ලම විනාශ වන තැනට කරුණු යෙදුණත් පැමිණි දුක් පැණි රසයි සිතා තම ජීවන ගමන යෑමට අදහස් කරන්නේ නම් එය ඉතා ප්‍රශස්ත කරුණකි.

ජ්‍යොතිෂයේ හරය දැනෙන්නේ ඇතැමුන්ට දුක් කරදර ළඟාවූ විටයි. එහෙත් ඒ ගැන අල්ප මාත්‍රයක්වත් නොසිතයි. ජ්‍යොතිෂය නොව අටලෝ දහමද පිළිගන්නේ වැටුණුදාටයි.
ගෙවී යන දශා, අන්තර් දශා මෙන්ම ග්‍රහයන්ගේ ගෝචරත්වයද සැලකිල්ලට ගෙන වඩාම අපලකාරී ග්‍රහයා තේරුම් ගෙන වැඩකටයුතු කිරීම බුද්ධිමත්ය. කේන්දරය පවා විශ්වාස නොකරන ඇතැම් අය කේන්දර බැලීමට සිතන්නේ තමන්ගේ වැඩකටයුතු අවුල් වූ විටයි. නව ග්‍රහයන් උදෙසා කළ යුතු ප්‍රතිකර්ම, පූජා විධි, ශාන්තිකර්ම පහතින් දක්වමු. ශනි අපලයට කාක නිල් ගලක් මුදුවට අල්ලා පැලඳීමට ඔබට කියූ විට ඔබට ලැබෙන්නේ මැග්නීසියා බෝතලයේ වීදුරුවකින් කපන ලද වීදුරු කාක නිලක් නම් ඉන්පසු සිදුවන්නේ කුමක්ද කියා බැලීම බුද්ධිමත්ය. ගෝමේද කපන්නේ බීර බෝතලයක වීදුරුවකින් විය හැකිය. ඊටත් වඩා වාලම්පුරි සාදන්නේ පිඟන් මැටි සෙරමික්වලින්ය. ලංකාවට පිටරටින් ගෙන්වන වීදුරු බාර්වලට ලේසර් කිරණ ඇතුළු කොට විවිධ හැඩතල අනුව කැපීම, වර්ණක වාලම්පුරි නිර්මාණය කරන බව ප්‍රසිද්ධ රහසකි. අපේ ඇස රවටන කෘත්‍රිම මෙවලම් අද වෙළෙඳ පොළේ ඕනෑ තරම් දක්නට ඇත. මේවාට රැවටෙන අයද කොතෙකුත් සිටින බවද නොරහසකි. අපි අද කතාබහක යෙදෙන්නේ වටිනා අදහස් රැසක්ම පාඨකයාට ඉදිරිපත් කිරීමටයි. ඒවා ඉපැරැණි ඍෂිවරුන් ලොවට හඳුන්වා දුන් අඟනා උපදේශයන්ය. ඔබත් මුදල් වැය නොකර ඔබටම කරගත හැකි මෙම ශාන්තිකර්මවලින් ඔබට යහපත සලසා ගන්නා මෙන් ඉල්ලමු.
නවග්‍රහයන් දෙන අපලවලින් බේරෙන ක්‍රමවේද
රවි අපලයට
ස්වර්ණ, තඹ ආදියෙන් නිමවන භාණ්ඩ, රත් පැහැති මල් වර්ග, නෙලුම් මල් ආදිය පූජා කිරීමෙන් දේව, භූත, ප්‍රේත ආදීන්ට පින් දීමෙන්, කහ පැහැති වස්ත්‍ර, ගිතෙල්, කුරුඳු පොතු, උක් හකුරු, මුංඇට දන් දීමත් යෙහෙකි. ඊට අමතරව වැඩිහිටි අයට සංග්‍රහ කිරීමෙන් පද්මරාග මැණික් ඇති තඹ මුදුවක් පැලඳීමෙන් ශිව ශීලම්බරී මෘතුංජය, ජිනපංජරය ආදී යන්ත්‍ර රන් හෝ තඹ පත්‍රවලින් ලියා නියමිත වාර ගණනින් ජපකොට පැළඳීමත් ඉතාම යහපත්ය.
සඳු අපලයට
පිච්ච මල්, සුදු මල්, ජලයේ පිපෙන මල් වර්ග, බෝධියට පූජා කිරීමෙන් පිරිත් දේශනා කරවීම සහ ඇසීමත්, සතුන්ට කිරි, පොරි වර්ග කෑමට දීමද සිල්වත් මෑණිවරුන්ට දන් දීමත් නවගුණ යන්ත්‍රය, රතන යන්ත්‍රය, 1000 වර ජප කර පැලඳීමෙන් මහා මංගල, රතන සූත්‍රය සහ කරණීයමෙත්ත සූත්‍රය උදේ, සවස භාවිතා කිරීමත් මැනවි.
කුජගෙන් වන අපලයට
රතු පැහැති මල්, රත් වස්ත්‍ර පූජා කිරීම, උක් හකුරු, තිරිඟු රත් හඳුන්, තඹ, පබළු, කණේරු මල්, රත්මල් මාලාවලින් තෙරුවන් පුදා ගිතෙල් සහ අබ තෙල් පහන් දැල්වීමත්, කතරගම දෙවියන්ගේ නම ආරූඪ කොට සෙත් කවියක් සාදා කියවීමද, මෘතුජය, අභිසම්භිධානය අඝෝර වැනි යන්ත්‍ර ජපකර පැලඳීමද යහපත්වේ.
බුධගෙන් වන අපලයට
ඇත් දත්, සල්මල් වර්ග, ධාන්‍ය වර්ග පිරිනැමීමත්, සුවඳ වර්ග, කණේරු මල්, බුලත්, පහන් වර්ග පූජාවන්, රිදී, පච්ච මැණික් පැලඳීමත්, නාමල් තලමල් පූජාවත් යහපත් ප්‍රතිඵල ගෙනෙන අතරම විෂ්ණු අඝෝරය, නීල මණ්ඩලය වැනි යන්ත්‍ර ජපකර පැලඳීමද, කොහොඹ ගසකට සාත්තු කිරීමද ගස ස්පර්ශ කිරීමද ඉතාම යහපත්ය. අපල දුරුවේ.
ගුරුගෙන් වන අපලයට
පුෂ්පරාග මැණික් මුදුවකට අල්ලා පැලඳීමද, සමන්පිච්ච මල්, සුදු මල්, සුදු අබ, ඉද්ද කොළ, වැල්මීවලින් තැම්බූ ජලය නෑමද, බෝ ගසට සාත්තු කිරීමද, බෝ ගසක් මුල තමන්ගේ නමට සෑදූ සෙත් කවියක් කියැවීමද ඉතා යහපත්ය.
සිකුරුගෙන් වන අපලයට
එන්සාල්, මනෝසීල, කුංකුමජපු, කර්කංකශීංග්‍රි විෂ්ණුක්‍රාන්ති, සුවඳ කොට්ටන් තැම්බූ ජලය ස්නානය කිරීමද, නවනාථ සීලම්බරී, සංජීවනි යන්ත්‍ර 1000 වර ජපකර පැලඳීමද මැනවි. දියමන්ති, සුදු මැණික්, රිදී මුදුවකට අල්ලා පැලඳීම යහපත්වේ. කරඳ ගසක් සිටුවා වතුර දමා ස්පර්ශ කිරීමද ඉතාම සුබයි.
ශනිගෙන් වන අපලයට
කළු තල, අංජන ඇට, ලොත් සුඹුල්, බැබිල, වී, පොරි, සතකුප්ප, ඊතණ, දේවදාර, වදකහ තැම්බූ ජලය නෑමද යහපත්වේ. නිල් කාකනිල ගලක් ඇල්ලූ මුදුවක් පැලඳීමත්, නීල මණ්ඩලය විෂ්ණු අඝෝරය. ශනි මෘතුංජය යන්ත්‍ර ජපකර පැළඳීමත් මැනවි. ලග්න ප්‍රදීප පූජාව, තව බෝ පත්‍ර පූජාව ඉතාමත් යහපත්වේ.
රාහු අපලයට
රත් පැහැති මල් වර්ග, වැටකෙයියා මල්, තල තෙල්, ගිතෙල් පහන් දැල්වීම, මල් වර්ග බෝධියකට පූජා කිරීම, ගෝමේද ගලක් යකඩ හෝ තඹ මුදුවකට අල්ලා පැලඳීම, සෙත් කවි විෂ්ණු, කතරගම දෙවියන්ගේ නම් යොදා කියවීම. නාග මාලය, පාතාල මෘතුංජය යන්ත්‍ර පැලඳීම, කෙසෙල් ගසට සාත්තු කිරීම, වතුර දැමීම ඉතාම සුබයි. නාගර්ජුන යන්ත්‍රය පැලඳීම හා ලග්න ප්‍රදීප පූජාව තඹ බෝපත්‍ර පූජාව ඉතාම යහපත්ය.
කේතුගේ අපලයට
වෛරෝඩි මැණික් පැලඳීමත්, කෙසෙල් ගසට සාත්තු කිරීමත් සුබයි. ඊතණ, කොලොන්, මයිල, කලාඳුරු අල, සතකුප්ප, තල, පොරි, ගෝ මුත්‍රවලින් තම්බා ස්නානය කිරීම යහපත්වේ. නාග මාලය, අඝෝරය,පාතාල මෘතුංජය, යන්ත්‍ර ජපකර පැලඳීම යහපත්වේ.

ග්‍රහ අපල දුරුකර ගැනීම සඳහා ඉහත සඳහන් වතාවත් කිරීම ඉතා යහපත්ය. වැලිමළුවක ඇඟිල්ලෙන් බිම කේන්දර කොටුව ඇඳ සබ්බ පාපස්ස අකරණං ගාථාව 21 වරක් කියමින් පැපොල් පහන් 10ක් දැල්වීම ඉතා සුබයි. තඹ කොළයක් බෝපත්‍ර 9ක් තළා එතුළ ‘සබ්බ පාපස්ස’ ගාථාව පන්හිඳෙන් ලියා කපු නූලක දවටා බෝධිය අසල එල්ලන්න. දින 21ක් ඇතුළත ග්‍රහ අපල දුරුවී සෙත සැලසේ. ශ්‍රී ඉෂ්ඨාර්ථ සිද්ධි සාධනීය ත්‍රිකෝණ පිරමීඩ හැඩැති මහා බලගතු යන්ත්‍රය ඇද කපු පුළුන්වලින් සඳුන් තෙල්, රන් තැඹිලි තෙල් 1000 වර ජපකර පාවිච්චි කිරීමෙන් ඔබේ අපල දුරුවී එදිනෙදා මුදල් අතට ලැබේ. අත්දුටු කෙම් යන්ත්‍රයකි.
ජ්‍යොතිෂවේදී ටී. හෙන්රි බෙම්මුල්ල