සැබෑ කරගැනීම සඳහා ඔබ පෙරුම් පුරණ සිහින රැසක් තිබේ. ඔබගේම නිවසක් තනාගැනීම ඉන් එක් ප්රධාන සිහිනයකි. තමන්ගේම නිවසක් තනාගැනීමට හැකි වීම වාසනාව ඔබ සතුව ඇති බව නිසැකව කියා පාන්නකි.
අප මෙහි ඉදිරිපත් කරන්නේ ඔබේ සිහින නිවස ගොඩනැගීම සඳහා ඔබට ඉතා සරලව අවබෝධ කරගත හැකි හා ප්රායෝගිකව භාවිත කළ හැකි වාස්තු සිද්ධාන්ත පහකි.
- භූමිය කැනීම ඊසාන දෙසින් අරඹන්න
ඔබේ නිවසේ හෝ ඉඩමේ ඊසාන දෙස කොටස අනෙකුත් කොටස්වලට සාපේක්ෂව සැහැල්ලුව තිබිය යුතුය යන්න වාස්තු ශාස්ත්රානුකූල සිද්ධාන්තයයි. ඉතා විශාල ගස්, කොන්ක්රීට් ඉදිකිරීම් වැනි බර දේ ඊසාන දිග ප්රදේශයෙන් ඉවත් කළ යුතුයි. බටහිර, නිරිත, දකුණ ඒවා තිබීමට යහපත් ප්රදේශයි. සාපේක්ෂව ගත් විට නිරිත, බටහිර හා දකුණු දිශාවලට වඩා ඊසාන දිශාව බරෙන් සැහැල්ලු විය යුතුවේ. පොළව යටට යන පදනම සඳහා අගල් කැපීම වැනි කැනීම් කටයුතු නිරිත දෙසින් ඇරඹුවහොත් යම්කිසි අවස්ථාවක අගල් කපා පස් ඉවත් කිරීම නිසා ඊසාන දෙසට වඩා එම පෙදෙස සැහැල්ලු විය හැකි අතර එය ඉතා අයහපත් ප්රතිඵල දෙන කාරණාවකි. දිශාවන් අතර තිබිය යුතු සමබරතාව ඉන් බිඳෙන බැවිණි. - ගොඩනැගිල්ල ඉදිකිරීම නිරිත දිග දෙසින් අරඹන්න
මෙය ඉහත දැක් වූ අදහසේ විරුද්ධ අදහසයි. පොළව යටට යන විට ඊසාන දෙසින් ඇරඹිය යුතු වුවත් පොළවෙන් ඉහළට යන විට එම කටයුතු නිරිත දෙසින් ආරම්භ වී ක්රම ක්රමයෙන් ඊසාන දෙසට ගෙන ආ යුතුය. දිශාවන් අතර සමබරතාව රැකෙන්නේ එවිටය. ඔබගේ නිවසේ පොළවෙන් ඉහළට යන කටයුතු එනම් ඉදිකිරීම් ආරම්භ කරන්නේ ඊසාන දෙසින් නම් යම් අවස්ථාවක ඊට සාපේක්ෂව බරෙන් වැඩි විය යුතු නිරිත හා දකුණු දෙසට වඩා ඊසාන දිශාවේ බර වැඩි විය හැකිය. එසේ වූ විට ඉදිකිරීම් කටයුතු දිගට කරගෙන යාමේ අපහසුතා ඇති වේ. මුදල් ප්රශ්න, කම්කරු ප්රශ්න, අධික වර්ෂාව ආදී කුමන හෝ හේතුවක් නිසා නිවසේ වැඩ කටයුතුවලට අවහිරතා ඇති විය හැකිය. - පඩිපෙළ නිවැරැදි තැනක සාදන්න
ඔබේ නිවස සැලසුම් කිරීමේදී අතිශයින්ම සැලකිලිමත් විය යුතු කරුණක් වන්නේ පඩිපෙළ නිර්මාණය කරන දිශාව හා ස්ථානයය. වැරැදි තැනක ඉදිකෙරෙන පඩිපෙළ නිවස එක දිගට සාදා ගෙන යාම කෙසේ හෝ වළක්වාලයි. නිවසේ අංග තිබිය යුතු වාස්තු ජ්යොතිෂයට අනුකූල නිසි ආකාරයක් තිබේ. නිසි ආකෘතියක් තිබේ. ඒ සියල්ල අතරින් පඩිපෙළ වඩාත්ම වැදගත් වීමට හා වැරැදි දෙසක තිබෙන පඩිපෙළ අන් සියලුම වාස්තු වැරැදිවලට වඩා භයානක වීමට පැහැදිලි හේතුවක් තිබේ. නිවසේ මුළුතැන්ගෙය, නාන කාමරය හෝ නිදන කාමරය වැනි අංගයන් භාවිතයට ගන්නේ නිවස ඉදිකිරීම අවසන් කර නිවසට ගෙවැදීමෙන් පසුවය. එම නිසා එම අංගයන්වල දෝෂ හටගන්නේ ඒවා භාවිතය ආරම්භ කළ පසුය. නමුත් පඩිපෙළ නිර්මාණය කළ පසු එහි කිරීමට ඉතිරිවන්නේ අවසන් සුමට කිරීම පමණි. එය සෑදූ මොහොතේ සිට එම නිවසේ කටයුතු කෙරෙහි එය බලපායි. බොහෝ නිවෙස්වල වැඩ කටයුතු අඩක් නිමකර නවතා දමා තිබෙනු අපට දැකිය හැක. ඒ නිවෙස්වල ඉදිකිරීම කටයුතු නිරීක්ෂණය කරන ඔබට අනිවාර්යයෙන්ම දැකිය හැක්කේ පඩිපෙළ වැරදි තැනක නිර්මාණය කර තිබෙන බවයි.
නිවසක පඩිපෙළ ඉදිකළ යුතු නිවැරැදිම ස්ථානය නිරිතදිග කොටසයි. එය කිසිසේත්ම නිවසේ ඊසාන දෙසින් නොතිබිය යුතුය. නැගෙනහිර හෝ උතුරු දෙසින් ඉදිකිරීමද අයහපත් වන්නේ බොහෝවිටම එසේ ඉදිකිරීමේදී ඊසාන දෙසටද හානි වන බැවිනි. එසේම නිවසේ මැද ප්රදේශයද පඩිපෙළ ඉදිකිරීම සඳහා කිසිසේත්ම සුදුසු ස්ථානයක් නොවේ. වැරැදි දෙසක සාදනු ලබන පඩිපෙළ සඳහා සරල වාස්තු ප්රතිකර්ම තිබෙන නමුත් වඩාත්ම සුදුසු වන්නේ එසේ ප්රතිකර්ම කිරීමට වඩා එම පඩිපෙළ කඩා ඉවත් කිරීමයි.
සර්පිලාකාරව සාදනු ලබන පඩිපෙළ නිවෙස් සඳහා සුදුසු නොවන අතර නිවෙසක ඇතුළතට කිසිසේත්ම සුදුසු නැත. එසේම නිවසේ ප්රධාන දොරටුවට මුහුණලා පඞ්පෙළ ඉදිකිරීමද ඉතා බලවත් වාස්තු දෝෂයකි. වාස්තු ශාස්ත්රයේදී පවසන්නේ එසේ තිබෙන විට නිවසට වාසනාවේ දෙව්දුවගේ පැමිණීම අවහිර වන බවයි. - මුළුතැන්ගෙය නිවැරැදි තැන තබන්න
මුළුතැන්ගෙය සඳහා සුදුසුම දිශාව වන්නේ ගිනිකොණයි. එය ගිනි තත්ත්වය පාලනය කරන දිශාව බැවිනි. සිකුරු ග්රහයා මෙම දිශාවට අධිපතිත්වය දරයි. බිරිය හා සැමියා යන දෙදෙනාම සිකුරුගෙන් නියෝජනය වන හෙයින් මුළුතැන්ගෙය මෙම දිශාවේ තිබෙන විට බිරියට එහි කටයුතු සඳහා සම්පූර්ණ නිදහස ලැබේ. ගිනි තත්ත්වය ශක්තිය හා බලය නියෝජනය කරයි. ඒ කුජගේ පාලනය යටතේය. ඔබේ නිවස සැලසුම් කරන විට මුළුතැන්ගෙය ගිනිකොණ දිශාවට තැබීමට හැමවිටම සැලකිලිමත් වන්න. එවිට පසුව එහි වෙනස් කිරීමක් හෝ වෙනත් ගැටලුවක් මතුවන්නේ නැත. ගැටලු සහිත බොහෝ නිවෙස්වල මුළුතැන්ගෙය වැරැදි දිශාවක තිබෙනු දකින්නට ලැබේ. සමහර නිවෙස්වල මුළුතැන්ලෙය වෙනුවට ගිනිකොණ නිදන කාමර තනා තිබෙනු දැකිය හැකිය. එය අතිශයින්ම හානිකර පිහිටීමකි.
එසේම ගිනිකොණ දිගින් ජලය විහාල ප්රමාණයක් ගබඩා කර තැබෙන වතුර ටැංකි ආදිය තිබීමත් ආහාර ද්රව්ය විශාල ලෙස ගබඩා කර තැබීමත් යහපත් නොවේ. එය නිවසේ කාන්තාවන්ගේ ශරීර සෞඛ්යයට ඉතාම අහිතකර ලෙස බලපානු ඇත. එසේම කටකතා ආදියට ගොදුරුවීමටද සිදුවිය හැක. - වැසිකිළිය නිවැරැදි තැන තබන්න
මේ සඳහා වඩාත්ම සුදුසු වන්නේ නිවසේ වයඹ දිග කොටසයි. ඊසාන, නිරිත යන දිශාවනුත්, නිවසේ මැදත් මේ සඳහා කිසිසේත්ම යෝග්ය නොවේ. එම නිසා ඔබේ නිවස සැලසුම් කරන විට වැසිකිලිය නිවැරැදි ලෙස දිශාගතවී තිබේද යන්න පිළිබඳ සැලකිලිමත් වන්න.
ජ්යොතිෂවේදී ජනක මාධව නවරත්න
