කුජ අපලෙන් මිදෙන්න පහසුම ක්‍රමය

කුජ කියද්දිත් ඇතැම් අය දක්වන්නේ අසීමිත බියකි. ජ්‍යොතිෂයේදී කුජට හිමිවන්නේද ප්‍රබල ස්ථානයකි. ඒ කුජට කළ හැකිදේ අසීමිත බැව් බොහෝ ජ්‍යොතිෂ ක්‍රමවේදයන්ට අනුව පිළිගැනෙන බැවිනි. භූමිපුත්‍ර යනුවෙන්ද, මංගල යනුවෙන්ද කුජ ග්‍රහයා හඳුන්වන අවස්ථා ඇති අතර මංගල කටයුතුවලදී කුජ යම් විදිහක ප්‍රබලයෙකි. එසේත් නැතහොත් සියල්ලේ තීන්දුකාරයාය.

කුජ විවිධ කරදර ගෙනදෙයි. ඒ අතර සතුරු කරදර කලකෝලහල අවි ආයුධ ප්‍රහාර මෙන්ම ලේ සෙලවීම, තුවාල සිදුකිරීම, කැපීම්, කෙටීම්, වැටීම් වගේම ප්‍රියජනක දේවලින් දුරස් කිරීම කුජගේ සිරිතකි.

මේ කොතරම් නරක කරන, අසුබ කරන ග්‍රහයකු වුවත් කුජ යම් ජන්මියකු සුබව පිහිටියහොත් දෙනු ලබන පල සුබය. එවිට සතුරු කරදර දුරුකරවනු ලබයි. සතුරන් දණගස්වයි. එසේම ශරීර ශක්තිය, නිර්භීතකම, රාජ්‍ය සම්මානද ජන්මියාට ලබාදීමට සමත්වෙයි. බොහෝ විට භූමියෙන් ලාභ ධන ලාභ ආදිය ලබා දීමටද කුජ දෙසැරයක් සිතන්නේ නැත.

කුජ ග්‍රහයා යුද්ධයට අධිපතීත්වය දරන උනන්දුව සහ උදf්‍යා්ගය සපිරි ග්‍රහයෙකි. එසේම වික්‍රමාන්විත ග්‍රහයෙකි. එසේ හෙයින් කුජ සුබපල දෙන විට එම ජන්මියාට විශිෂ්ට ප්‍රතිරූපයක් සකසා දෙයි. පෙර ආත්ම භාවයන්හි අධිකව කෝප ස්වභාවයක් දැරූ අන් අයට කරදර පීඩා කළ අයට මෙම භවයන්හි කුජ හිරිහැර කරන බවත් විශ්වාසයක් වෙයි. එසේ හිරිහැර කරන අතර ජන්මියාට කැපුම් කෙටුම් මගින් අනතුරු ඇති කිරීමට කුජ උත්සාහ කරයි. ඇතැම් අයට ලියුකේමියාව නමැති රෝගය වැලඳෙන්නේ කුජගේ දෝෂය නිසා බවටද පැවසේ. එසේම පෙර භවයන්වල සියලු අකුසලවලට විපත් සහ විපාක ගෙනදීමේ ප්‍රධානියාද කුජය.

එනිසා සෑම ජන්මියකුටම කුජ විවිධ ආකාරයට පලදෙන අයුරින් උත්පත්ති කේන්දරවල පිහිටනු ලබන්නේ පෙර භවවල පින්, පව් අනුවය. පෙර භවවල පින් කළ අයගේ ජන්ම පත්‍රවල කුජ සුබපල දෙන ග්‍රහයකු ලෙසත්, පව් කළ අයගේ ජන්ම පත්‍රවල අසුබ පල දෙන ස්ථානවලත් කුජ පිහිටන බවට ජ්‍යොතිෂයේදී හඳුන්වයි. එනිසා සෑම කෙනකුම අනෙක් ආත්ම භවයට හෝ පින් රැස්කර ගන්නට පෙලඹිය යුතු බව අවබෝධ කරදීමටද කුජගේ ඇතැම් ක්‍රියාකාරකම් ඉවහල් වෙන බව හඳුනාගත යුතුය.

කෙසේ නමුත් කුජගේ අපල දුරුකර ගැනීම සඳහා කළ හැකි වත්පිළිවෙත් බොහෝමයක් වෙයි. ඒ අතරින් මහා අනර්ඝ පල ලැබෙන වත්පිළිවෙත් ලෙස රෝගීන්ට වැඩිහිටියන්ට ගිලනුන්ට උපස්ථාන කිරීම ප්‍රධාන වෙයි. බෙහෙත් වර්ග දන්දීම, ආබාධිත අයට පිහිට වීම, අසරණ වූ අංගවිකල අයට පිහිටවීම, යුධමය අවස්ථාවලින් ආබාධයට ලක්වූවන්ට පිහිට වීම ආදිය තුළින් කුජගේ අපලයට සහනයක් උදාකරගත හැකිය. කෙසේ නමුත් කුජගෙන් අපල ඇත්තාට වෛරය, ක්‍රෝධය සිතට නැඟෙයි. සතුරන්ගෙන් පළිගන්නට සිතෙයි. එසේ වුවද මෛත්‍රිය වඩවමින් නිතර භාවනා කටයුතු කරමින් සිත දියුණු තියුණු කරගෙන කටයුතු කළ හැකි නම් අපල සපල කරගැනීම ඉතාමත් පහසු කාරණයක් වන්නේය.

මීළඟට වඩාත් වැදගත්ම දෙය වන්නේ කුජ අපල ඇත්තන්ට අසරණ රෝගීන් වෙනුවෙන් ලේ දන්දෙන්නට හැකි නම් එය මහා පල ලැබෙන පිළිවෙතකි. අසරණ තත්ත්වයට පත්ව මරණයේ දොරකඩ සිටින අයට ජීවිතය දීමෙන්ද, මරණයට කැපවූ සතුන් මුදා ගැනීමෙන්ද කුජ අපලයෙන් සහනය උදා කරගත හැකි වන්නේය. මෙම භවයේ කරන පින්කම් නිසා පෙර භවයන්හී කළ පව් දුරුවේවායි සිතීමත්, ප්‍රාර්ථනා කිරීමත් තුළින් කුජගේ අපලය දුරු කරගත හැකි වන්නේය.

මීට අමතරව ඉතා පහසුවෙන් කුජ අපලවලින් මිදීමට ඇති හොඳම විසඳුම වන්නේ රතු මල්මාලා පුද පූජා සඳහා යොදා ගැනීමය. පොකුරු රතු වදමල්, රතු අරලියා, රතු කනේරු, නෙලුම් මල්, රත්මල් මේ කටයුතු සඳහා යොදාගන්නේ නම් ඉතාමත් උසස් ප්‍රතිඵල ලබාගත හැකිය. එසේම රත්හඳුන් මිශ්‍ර සුවඳ වර්ග, රතු වස්ත්‍ර සහ ආභරණ, රතු පැහැගත් පලතුරු වර්ග, රතු කිරිබත්, රතුබත් ආදිය දන්දීමෙන්ද කුජගේ අපලය දුරු කරවාගත හැක.

කෙසේ වෙතත් කුජ අපල කරන කාලවලදී ඉවසීමේ ගුණය පිරිහේ. එනිසා නිතරම කලබල නොවී සිටිනවාය යන සිතුවිල්ලෙන් යුතුව ජන්මියා කටයුතු කිරීම වැදගත්ය. බෞද්ධ සම්ප්‍රදායට අනුව අභිසම්භිධාන යන්ත්‍රය දහස් වර පිරිත් කර පැලඳීම ඉතාමත් සුබ ප්‍රතිඵල ගෙනදෙයි. හැකි සෑම විටම කුමන හෝ පුද පූජාවක නිරත වීම ඉතාමත් සුබය. කතරගම, කිරිවෙහෙර වැනි ස්ථානයන්ට පුද පූජා තැබීම, එළඟිතෙල්, තලතෙල්, බෙහෙත් තෙල්, පහන් හත බැගින් පූජා කර තුන්සූත්‍රය, ධජග්ග පිරිත තෙවරක් ගායනා කර දෙවියන්ට පින් දීම තුළින්ද කුජ අපලය ඉතා පහසුවෙන් මඟහරවාගත හැකිය.
ජ්‍යොතිෂවේදී ජයශ්‍රී නන්දකුමාර