කාලෙකින් ටෙලිනාට්‍ය වැඩ කළේ නැහැ

මනුස්සකම් පිරුණු මනුෂ්‍යයන් අතර සොඳුරු කලාකරුවෙක් තමයි ඔහු. සනත් විමලසිරි කියන්නේ වේදිකාව තුළ වසර ගණනාවක් තම දහදිය වගුරමින් ආ ඔහු, මනමේ කුමරු, සිංහබාහු ලෙසට අදටත් ජීවය දෙනවා. ඒ විතරක් නෙවේ සුවිශේෂී ටෙලිනාට්‍ය රැසකට දායක වුණු ඔහු අද ටෙලිනාට්‍යවල දකින්නට නැති තරම්. ඉතින් ඒ සොඳුරු මිනිසාගේ ඉදිරි කලා දිවි ගැන අපි මෙලෙස සනිටුහන් කළා.
ඔබ නිර්මාණකරණයේ සුවිශේෂී රංගනයන් අප දැක තිබුණත්, දැන් නිර්මාණවල දකින්නට නැති තරම් ඔබව?
වේදිකාවේ නම් එදා වගේම අදටත් වැඩ කටයුතු කරගෙන යනවා. ටෙලිනාට්‍ය, චිත්‍රපටවලට දායකත්වය නම් අඩුයි. නිර්මාණවලින් ඈත්වෙලා නෙවේ. නිර්මාණකරණයේ මනුෂ්‍යකම් නැති වුණාට ඒ නිර්මාණවල වැඩ කිරීමට හිතට තෘප්තියක් නැහැ. මනුෂ්‍යකම් තිබෙන නිර්මාණවල තමයි මම වැඩ කරන්නේ.
ඉතින් මේ දවස්වල කොහොමද ඔබගේ වැඩකටයුතු?
ටවර්හෝල් පදනම යටතේ පසුගියදා නාට්‍ය උළෙලක් පැවැත්වූවා. එයට සම්බන්ධ වෙලා වැඩ කටයුතු කළා. නාට්‍යකරුවන්ට නාට්‍ය පෙන්වීමට බැරි කාලවකවානුවක. ප්‍රේක්‍ෂකයන්ට ප්‍රේක්‍ෂකාගාරයට ඒමට බැරි කාලවකවානුවක උත්සාහයක් කරලා බැලුවා වෙනසකටත් එක්ක.
ඒ නාට්‍ය උලෙලට අලුත් නාට්‍ය කිහිපයකුත්, ළමා නාට්‍ය කිහිපයකුත් නිර්මාණය කළා.
ඔබ එදා වගේම වේදිකාව වෙනුවෙන් කැපවෙන සුවිශේෂී කලාකරුවෙක්. එහෙත් ටෙලිනාට්‍ය තුළින් ඔබව දකින්න නැහැ?
එහෙම අඩුවීමක් නැහැ. කාලෙකින් ටෙලිනාට්‍ය වැඩ කළේ නැහැ. මේ දවස්වල සුමිත් රත්නායකගේ නවතම නිර්මාණයකට සම්බන්ධ වෙලා වැඩකටයුතු කරගෙන යනවා. මම කලින් පැවැසූ විදිය සුන්දර හදවතක් තියෙන මනුෂ්‍යකම් පිරුණු කෙනෙක්ගේ නිර්මාණවල වැඩ කරන කොට ඒ නිර්මාණයේ සුන්දරත්වයක් අපි දකිනවා. සමහරු නිර්මාණවලට ආරාධනා කරලා කතා කරන ඇමැතුමෙන්ම එපාවෙනවා.
ඔබ මෙයට පෙරත් සුමිත් රත්නායකගේ නිර්මාණ කිහිපයක වැඩ කළා. ඔහු සමඟ වැඩ කිරීමේ විශේෂත්වය?
ඔහු ඔහුගේ නිර්මාණය සාර්ථක කරගැනීමට උත්සාහ කරන කෙනෙක්. ඒ නිසා ඔහුගේ නිර්මාණවලට සම්බන්ධ වෙන කොට මම පිටපතවත් බලන්නෙ නැහැ.
කලාව තුළ ජීවිතය විඳින්න පුළුවන් බව ඔබ විශ්වාස කරනවද?
මොකද නැත්තේ. එයට ප්‍රබලම අවස්ථාව වේදිකාව තුළයි. ඒ විඳින සතුට මිල කරන්න බැහැ. ප්‍රේක්‍ෂකයා එය රස විඳිනවා කියලා දැනුණාම මොන තරම් ආශ්වාදයක් ලබනවාද. අපි වේදිකාව තුළ වැරැදි හද හදා රඟපාන්න බැහැ. වැරැදුණොත් වැරැැදුණාම තමයි. ඒ සියලුම රංගනයන් ජීවමනායි. ඒ සජීවීව ලබන ප්‍රතිචාරය අපි ජීවිතය තුළ විඳිනවා.
රඟපෑමට හැදෑරීමක් අවශ්‍යමද?
මොකද නැත්තේ. හැදෑරීමක් නැතිව මේ ක්‍ෂේත්‍රයට ආපු නැති අය තුළ තමයි ඔය මනුෂ්‍යකම් නැත්තේ. මේ ක්‍ෂේත්‍රයට සම්බන්ධ වෙනවානම් හැදෑරීමක් ඇතිව ආවනම් මෙයට වඩා හොඳ අත්දැකීමක් තියේවි.
වසන්ත විතාරණගේ