ඔබේ කසාදය හරියයිද? වරදියිද?

දෙදෙනෙක් විවාහ වීමට කලින් ඒ දෙදෙනාගේ ජන්ම පත්‍ර පරීක්ෂා කර බලා මේ දෙදෙනාට විවාහ ජීවිතයක් පවත්වාගෙන යෑමට හැකිදැයි සොයා බලන සිරිතක් ආදි කාලයේ සිටම අප රට තුළ පැවිතිණි. පොරොන්දම් බැලීම ලෙස හැඳින්වෙන මෙම ක්‍රියාවලියේදී පොරොන්දම් 20ක් ගැන අවධානය යොමුකරනු ලැබේ.

මෙම පොරොන්දම් විස්සෙන් පළමුවැන්නේදී ස්ත්‍රිය උපන් නැකතේ සිට පිරිමියා උපන් නැකත කීවෙනි නැකතකදැයි සොයා බලා එයින් 2, 4, 6, 8, 9, 11, 13, 15, 17, 18, 20, 22, 24, 26, 27 යන නැකතට වැටේ නම් සුබ ලෙස සලකනු ලබයි.

දෙවැනි පොරොන්දමේදී ස්ත්‍රී පුරුෂ දෙදෙනාගේ ගණ එකම වීම බුධ ලෙසද මනුෂ්‍ය දේව ගණ දෙකට අයත් නම් මධ්‍යම ලෙසද, දේව රාක්ෂ ගණ දෙකට අයත් වීම හෝ මනුෂ්‍ය රාක්ෂ ගණ දෙකට අයත් වීම අසුබ ලෙසද හඳුන්වාදී ඇත.

මහේන්ද්‍ර පොරොන්දමේදී ස්ත්‍රිය උපන් නැකතේ සිට පුරුෂයා උපන් නැකත 4, 10, 13, 22 යන අංකයට වැටේ නම් සුබ වේ. ස්ත්‍රී දීර්ඝ පොරොන්දමේදී ස්ත්‍රිය උපන් නැකතේ සිට පිරිමියා උපන් නැකත, 13න් එහා සුබ නම් සුබවේ. යෝනි පොරොන්දමේදී එකිනෙකාට සතුරු වන යෝනි, අසුබ ලෙස සලකණු ලබයි. රාශි පොරොන්දමෙන් රාශි අතර සතුරු මිතුරුකම්ද රාශි අධිපති පොරොන්දමෙන් රාශි අධිපතින් අතර සතුරු, මිතුරුකම්ද, මහා පොරොන්දමේදී රාශි අතර වශී වීම ගැනද සොයා බලනු ලබයි.

රජ්ජු පොරොන්දමෙන් විවාහයේදී දෙදෙනා අතර බැඳීම ගැනද, වේද පොරොන්දමෙන් නැකැත් අතර ඇති විරුද්ධතාවයන්ද, වෘක්ෂ පොරොන්දමෙන් දරුඵල ගැනද ආයුෂ පොරොන්දමෙන් කවරෙක් වැඩිකල් ජීවත් වන්නේද යන වගද පක්ෂි පොරොන්දමෙන් පංච පක්ෂි ශාස්ත්‍රයට අනුව දෙදෙනෙක් ගැළපීමද, භූත පොරොන්දමේදී පංච මහා භූතයන්ට අනුව දෙදෙනාගේ ගැළපීමද, ගෝත්‍ර පොරොන්දමේදී දෙදෙනා ගෝත්‍ර දෙකක වීම සුබ ලෙසද, වර්ණ පොරොන්දමේදී පුරාණ ඉන්දියාවේ පැවැති සමාජ මට්ටම් අනුව ගැළපීමද, ලිංග පොරොන්දමේදී දෙදෙනා අතර ලිංගිකව ගැළපීමද, නාඩි පොරොන්දමේදී, වාතය, පිත, සෙම යන දෝෂ ගැනද දින පොරොන්දමේදී සතියේ දින පදනම් කරගෙන දෙදෙනාගේ උපන් දින ගැළපීමත්, ග්‍රහ පොරොන්දමේදී, කේන්දර දෙකේ සිටින පාප ග්‍රහයන්ගේ පිහිටීම ගැන සැලකීමක්ද කරනු ලැබේ.

මීට අමතරව දෙදෙනාගේ ජන්ම පත්‍රවල සඳහන් වන විශේෂ ගැළපීම් කීපයක් ගැන පැරැණි ජ්‍යොතිෂ මූලාශ්‍රවල දක්නට ලැබුණද දැනට අප රටේ පොරොන්දම් ගළපන අය අතුරින් අතලොස්සක් පමණක් එම කරුණු ගැන සොයා බලන බව පෙනේ. එම කරුණු ගැන දීර්ඝ කාලයක් කරන ලද පරීක්ෂණවලින් පෙනීගිය කරුණක් නම් ඉතාමත් කලාතුරකින් හමුවන ඉතා සාර්ථක විවාහ ජීවිත ගතකරන්නන් හට මෙම ගැළපීම යෙදී ඇති බවයි. අද මෙම මව්රට ‘සක්වල’ ලිපියේ ප්‍රධාන අරමුණ වන්නේ එම විශේෂ අවස්ථා කීපයක් ඔබ අතට පත්කිරීමයි.
එක කේන්දරයක කුජ සිටින රාශියේ අනිත් කේන්දරයේ සිකුරු සිටී නම් දෙදෙනා දැඩි ආදර බැම්මෙන් බැඳී ඉතාමත් සාර්ථක විවාහ ජීවිතයක් ගත කරන බව සඳහන් වේ. එක කේන්දරයක සූර්යයා අනෙක් කේන්දරයේ සඳු සිටින රාශියේ සිටින විට ඒ දෙදෙනාගේ විවාහය ඉතාමත් වාසනාවන්ත බව සඳහන් වේ. තවදුරටත් පැහැදලි කරනවා නම් අපි හිතමු පිරිමි කේන්දරයේ රවි ඉන්නේ මේෂ රාශියේ කියලා. එතකොට මෙම පිරිමි කේන්දරයට ගළපන ස්ත්‍රි කේන්දරයේ සඳු මේෂ රාශියේ සිටි විට මෙම ගැළපීම යෙදේ. මෙවැනි දෙදෙනකුගේ විවාහය ආදරයෙන් බැඳුණු ඉතා රසවත් එකක් බව දැකගත හැකිවේ.

ලග්නය ඇසුරු කරගෙනද සාර්ථක විවාහ ජීවිත ගැන සොයා බලන නිවැරැදි ක්‍රමයක් තිබේ. තමන්ගේ ලග්නයේ සිට මේෂ, වෘෂභ, මිථුන, කටක, සිංහ, කන්‍යා, තුලා, වෘශ්චික, ධනු, මකර, කුම්භ, මීන යන අනුපිළිවෙළට ගැනගෙන යන විට තමන්ගේ ලග්නයේ තුන්වැනි, පස්වැනි, නවවැනි හෝ එකොළොස්වැනි ලග්න හිමි අයකු සමඟ විවාහ වූ අය ඉතාමත් සාර්ථක විවාහ ජීවිත ගත කරන බව සඳහන් වේ.

එක කේන්දරයක සූර්යයා අනෙක් කේන්දරයේ සඳු සිටි ස්ථානයේ සිට ගැනගෙන යන විට 3, 5, 9, 11 යන අංකයට වැටුණු විටද වෙනස් නොවන ස්ථිර සම්බන්ධයක් ඇති විවාහයයි.

කේන්දර ගැළපීම සාර්ථක ජීවිතයකට ඉතාමත් වැදගත් බව දීර්ඝ කලක් කේන්දර පරීක්ෂා කරන කෙනකුට පැහැදලිව පෙනෙන කරුණක්. ඒ වගේම විවාහක දෙදෙනා සම සීල, සම ත්‍යාග, සම ප්‍රභූ යන කරුණුවලින් යුක්ත වීම සාර්ථක යුග දිවියකට මගපෙන්වන බවයි බුදු දහමේ ඉගැන්වීම.

ජ්‍යොතිෂවේදී අගලවත්තේ චන්දන වීරක්කොඩි