උපන් දිනයෙන් හෙළිවන ජීවන රහස්

උපන් දිනය අප සියලු දෙනාටම සුවිශේෂී දිනයකි. විශේෂයෙන්ම අපගේ වෘත්තියට අදාළව නිවෙසක වාස්තු පරීක්‍ෂාවක් සිදුකරන විටදී හෝ නිවාස සැලසුමක් සකස් කරන විටදී මෙන්ම, වෙනත් ව්‍යාපාරික ස්ථාන ගැටලු, කර්මාන්ත ශාලාවල ගැටලු, අධ්‍යාපනය කරනු ලබන දරුවන්ගේ මෙන්ම අන් ඕනෑම අයකුගේ ජීවිතයට අදාළ ගැටලු තත්ත්වයන් නිරාකරණය කිරීමට අප භාවිත කරන ප්‍රධාන මෙවලම වන්නේ උපන් දිනය, උපන් වේලාව හා උපන් ස්ථානය අනුව ජීවන පලාපල විමර්ශනය කිරීමයි. මෙම ලිපිය සකස් වී ඇත්තේ උපන් වසරේ අංකය, උපන් මාසයේ අංකය, උපන් දිනයේ අංකය (ජීවන අංකය) හා උපන් දිනයට අදාළ සියලු අංක එකට එකතු කළ විට ලැබෙන තනි අංකය හෙවත් දෛව අංකය භාවිත කර ජීවන තොරතුරු විග්‍රහ කිරීමයි.
පහත උදාහරණය බලන්න. (සියලුම අංක තනි අංකයක් ලැබෙන තුරු එකතු කරන්න)
උපන් දිනය : 1987-06-23
(1.) වසරේ අංකය-1987-1+9+8+7 = 25
2+5 = 7 (වසරේ අංකය)
(2.) මාසයේ අංකය-06 = 6 (මාසයේ අංකය)
(3.) උපන් දිනයේ අංකය (ජීවන අංකය)-23 = 2+3 = 5
(4.) දෛව අංකය-1+9+8+7+6+2+3 = 36
(1987-06-23) 3+6 = 9 (දෛව අංකය)
දැන් ඔබගේ වසරේ අංකය, මාසයේ අංකය, ජීවන අංකය, දෛව අංකය හා උපන් දිනයට අදාළ සියලු අංක එක පෙළට ලියන්න.
7, 6, 5, 9, 1, 9, 8, 7, 6, 2, 3
දැන් එක් වරකට වඩා වැඩියෙන් ලියා ඇති අංක එක වරක් පමණක් ලියවෙන ආකාරයට අංක සකස්කර ගන්න.
7, 6, 5, 1, 9, 8, 2, 3
1 සිට 9 දක්වා අංක සහිත වගුවක් සකස් කර ඉහත ලබාගත් අංක සමඟ සසඳන්න. ඉතිරිවන අංක මොනවා දැයි සොයාගන්න. ඔබගේ උපන් දිනයේ අංක වගුව සමඟ සැසඳීමේදී යම් අංකයක් හෝ අංක කිහිපයක් ඉතිරි වන්නේ නම්, එම අංකවලට අදාළ කරුණු ඔබගේ ජීවිතයේ දීර්ඝකාලීන ජීවන දුර්වලතාවක් ලෙස ප්‍රකාශ වෙයි.
උදා : 7, 6, 5, 1, 9, 8, 2, 3
1 2 3 4 5 6 7 8 9
× × × ? × × × × ×
ඉහත උදාහරණයේ අංක 04ට අදාළ කරුණු එම උපන් දිනය හිමි තැනැත්තාගේ ජීවන දුර්වලතාවකි.
අංක 1- ඔබගේ වෘත්තීමය තත්ත්වය / ව්‍යාපාරයේ තත්ත්වය, රැකියාව හෝ ව්‍යාපාරය ඔබට ගැළපෙනවාද? ජීවිතයේ සාර්ථකත්වය අංක 01 මඟින් ප්‍රකාශ වෙයි.
අංක 2- ජීවන සහකරු හෝ සහකාරිය අතර පවතින සැබැඳියාව. නෑදෑයන්, ඔබගේ මවුපියන්ගෙන් හා සහකරු හෝ සහකාරියගේ මවුපිය පාර්ශ්වයෙන් ඔබට ලැබෙන සහයෝගය, රැකියා හෝ ව්‍යාපාරික ස්ථානයෙන් හා එහි සේවක පාර්ශ්වයෙන් ලැබෙන සහයෝගය, වෘත්තීයමය හෝ ව්‍යාපාරික හවුල්කරුවන් මොන තරම් දුරට ගැළපේද යන කරුණු අංක 02 මඟින් ප්‍රකාශ වෙයි.
අංක 03- යම් කටයුත්තක් කිරීමේදී ඔබ බුද්ධිය මෙහෙයවා කටයුතු කිරීම. ඔබගේ පවුල් ජීවිතය හා පවුල් පසුබිම. ශාරීරික හා මානසික නිරෝගීභාවය අංක මඟින් ප්‍රකාශ වෙයි.
අංක 04- ඔබ කරනු ලබන රැකියාව හෝ ව්‍යාපාරය මඟින් ඔබ ලබා ඇති ආර්ථික තත්ත්වය, මූල්‍ය ස්ථාවරත්වය, ලෞකික ජීවිතය, ජය ගැනීමට ඇති හැකියාව, ජීවිතයේ ඉසුරුමත් භාවය හා වාසනාව අංක 04 මඟින් පෙන්නුම් කරයි.
අංක 05- යම් කටයුත්තක් කිරීමේදී ඔබ ගනු ලබන තීරණවල සාධාරණ බව හා ජීවිතයේ සමබරතාවය, අධ්‍යාපනික, ආධ්‍යාත්මික හා ආර්ථික පසුබිම, සෞඛ්‍ය තත්ත්වය, ස්ථිර අධිෂ්ඨානයෙන් කටයුතු කිරීමට ඇති හැකියාව අංක 05න් ප්‍රකාශ වෙයි.
අංක 06- විදේශගත වීමට ඇති වාසනාව, යහපත් මිතුරන් ලැබීම, සැපවත් ලෞකික ජීවිතයක් ගතකිරීමට ඇති වාසනාව. අලුතින් ආරම්භ කරන කටයුතුවල සාර්ථකත්වය අංක 06 මඟින් ප්‍රකාශ වෙයි.
අංක 07- ඔබට දරුඵල හිමිද, අහිමිද, දරුවන් මවුපියන් අතර පවතින සැබැඳියාව, නිර්මාණාත්මක හැකියාව, ව්‍යාපෘතිවල සාර්ථකත්වය අංක 07න් ප්‍රකාශ වෙයි.
අංක 08- නව ව්‍යාපෘති ආරම්භ කිරීමට ඔබට ඇති දැනුම, උපායශීලීව කටයුතු කිරීමට ඇති හැකියාව, යම් දෙයකට ඉදිරිපත් වීමට ඇති හැකියාව, උනන්දුව, උත්සාහය, අප්‍රතිහත ධෛර්ය අංක 08න් ප්‍රකාශ වෙයි.
අංක 09- ආර්ථික, සමාජයීය, ආධ්‍යාත්මික යන සියලු අංශවලින් ජය ගැනීමට ඇති හැකියාව, කරනු ලබන කටයුතුවලින් ලැබෙන ප්‍රසිද්ධිය, ජනප්‍රියත්වය, කීර්තිය හා යසස අංක 09න් ප්‍රකාශ වෙයි.
ප්‍රවීණ ජ්‍යොතිෂවේදී අරෝෂ ජේ. වඩුගේ