ඉහළට යන පඩිපෙළ ඔබව පහළට වට්ටයි

අද වෙද්දි මහල් නිවාස ඉදිකිරීම එක්තරා රැල්ලක් බවට පත්වෙමින් තිබෙනවා. අනවශ්‍ය ඉඩකඩ සීමා වීම හේතු කොටගෙන නාගරිකව ඉදිකෙරුණු මහල් නිවාස සංකල්පය මේ වෙනකොට විශාල ඉඩම් පිහිටි ප්‍රදේශවලටත් ව්‍යාප්ත වීමට හේතුවෙලා තියෙන්නනෙ එම රැල්ලයි. කෙසේ නමුත් මහල් නිවාස ඉදිකිරීමේදී බොහෝමයක් දෙනාගේ මූලික අවධානය යොමුවන්නේ අලංකාරයටයි. එහෙම වුණාම ඇතැම් වාස්තු කරුණු මඟහැරී යන්නේ කාටත් නොදැනීමයි. ඒ විදියට මඟහැරෙන දෙයක් තමයි මහල් නිවෙසට යොදන පඩිපෙළ. බොහෝ විට නිවෙස තුළට ගියාම ලස්සනට පෙනෙන විදියට තමයි පඩිපෙළ දාන්න හදන්නේ. එය තීරණය කරන්නෙ නිවැසියාම. ඇතැම් විට වාස්තු ශිල්පියා කියූ තැන හරි නැහැ කියලා නිවාස හිමියාට සිතෙන තැනක් තෝරා ගැනීම කරන අවස්ථාත් තියෙනවා. එහෙත් එයින් යෙදෙන වාස්තු දෝෂ බරපතළ බව අමතක කරන්න හොඳ නැහැ.

යම් නිවෙසක ඉතා සුබ ආකාරයට පියගැටපෙළ යොදනවා නම් එය උතුර හෝ නැඟෙනහිර දිසාවෙන් ආරම්භ කිරීමයි වඩාත්ම හොඳ. ඒ වගේම එම පඩිපෙළෙහි අවසන් පඩිය දකුණු දෙසට හෝ බටහිර දෙසට යොමු වෙනවා නම් වඩාත් හොඳ වෙනවා. එය ඉතාමත් සුබ තත්ත්වයක්. නමුත් පඩිපෙළ උතුර, නැඟෙනහිර බිත්තිවලට සම්බන්ධ නොකළ යුතුයි. පඩිපෙළ සහ බිත්ති අතර අඩුම තරමින් අඟල් තුනක්වත් පරතරය තිබීම වැදගත් වෙනවා.

යම් ගොඩනැඟිල්ලක හෝ නිවෙසක උතුරු හෝ නැඟෙනහිර දිශාවන්ට මුහුණලා බැසීමට හැකි පඩිපෙළක් නිර්මාණය කරගත හැකි නම් එය එම නිවැසියන්ට සුබපල ළඟාකර දෙන්නක්. තරප්පුවක් නිර්මාණයේදී ඉහළ සහ පහළ වැසීමට හැකි දොරටු දෙකක් තිබේ නම් එයද වැදගත්. මෙම දොරටු උතුරට සහ නැඟෙනහිරට මුහුණලා සකස් විය යුතුයි. ඒ වගේම ඉහළ පිහිටි දොරටුව පහළ දොරටුවට වඩා අඟල් කිහිපයක් කුඩා වීම ඉතාමත් වැදගත්ය.

ඇතැම් නිවෙස්වල පඩිපෙළ කවාකාරවයි යොදන්නේ. එවිට එය දක්‍ෂිණාවර්තව යෙදීම ඉතාමත් වැදගත්. එනම් නැඟෙහිර සිට දකුණු දෙසට හෝ දකුණ සිට බටහිරට, උතුර සිට නැඟෙනහිරට ආදී ලෙසයි. යම් ගොඩනැඟිල්ලක ඉහළට යෑමට සහ පහළට බැසීමට පඩිපෙළ දෙකක් ඇත්නම් ඒවා වෙන වෙනම ඉදිකළ යුතුයි. මෙය බලපාන්නේ පොළොව යට බිම් මහලක් ඇති නිවාස සඳහායි. එසේම පඩිපෙළ නිවෙසක ඉදිරිපස මැදකොටසේ නොවිය යුතුයි. එසේම ප්‍රධාන දොරටුව ඉදිරිපස හෝ ප්‍රධාන දොරටුව හරහා යන ලෙසද තරප්පු පෙළ නොදැමිය යුතුය.
බොහෝමයක් නිවෙස්වල තරප්පු පෙළ යට ඇති ඉඩකඩ තුළ ආගමික පුදපූජා ස්ථාන, සේප්පු හෝ මුදල් කටයුතු, එසේත් නැත්නම් පොත්පත් රාක්ක, මංගල ඡායාරූප ආදිය තැබීමට භාවිත කරයි. එය නොගැළපේ.

එම ස්ථානය එවැනි කිසිදු කටයුත්තකට ප්‍රයෝජනයට ගත හැකි හොඳ ස්ථානයක් නොවේ. ඊළඟට තරප්පුවක පඩි ගණන ඉරට්ටේ වීමද ඉතාමත් වැදගත් කාරණයකි. එසේම නිවෙසක පියගැටපෙළ භාවිත කිරීමේදී හඬක් නැඟේනම් එය අසුබ තත්ත්වයක් සේ සැලකෙයි. මෙය යකඩ හෝ ලී තරප්පුවල දක්නට ලැබේ. විශේෂයෙන්ම ඊට පිළියම් නොකළහොත් විවිධ ප්‍රශ්න ඇති විය හැකිය.

නිවෙසක පියගැටපෙළන් ගොස් එක්වරම කාමර තුළට ඇතුළු වන ලෙස සැකසීමෙන් නිවැසියන්ට නරක ප්‍රතිඵල ගෙනදෙයි. එය කාන්තා පාර්ශ්වයට වඩාත් අසුබ වෙයි. බොහෝ දුරට සුළු සුළු කරුණු යැයි සිතා සිටින ඇතැම් කාරණා නොදැනුවත්වම විශාල හානිදායක තත්ත්වයක් ඇති කරන බැවින් ඒ ගැන දැන සිටීම වගේම වාස්තු ගැන දන්නා කියන අයකු සම්බන්ධ කරගෙන වාස්තු දෝෂ ඉවත්කර ගැනීමත් වැදගත්.

බොහෝමය පිරිස් සිය දියුණුවේ මධ්‍යම අවස්ථාවේ දෙමහල් නිවාස ඉදිකිරීමට පෙලඹෙන අතර, නිවෙස ඉදිකිරීමෙන් පසු දියුණුව අඩාළ වීමට බලපාන්නේ මෙවැනි වාස්තු දෝෂ බව නොදනිති. ඒ නිසා ඔබගේ නිවෙසේත් එවැනි දෝෂ නැතැයි සනාථ කරගැනීම ඔබට යහපතකි.
ජ්‍යොතිෂවේදී සත්‍යජිත් සම්පත්