ඔබේ දරුවා උගතකු වෙයිද?

දරුවන් සිටින සෑම මවුපියෙක්ම තම දරුවන්ට හොඳින් උගන්වා යහපත් පුරවැසියකු කිරීමට උත්සාහ කරයි. දුප්පත් පවුලක ඉපදුණු දරුවකුට පවා අද අධ්‍යාපන කටයුතු කරගෙන යෑමට පහසුකම් ඇත. නමුත් කොතරම් මහන්සියෙන් දරුවකුට ඉගැන්වීම් කළත් ඉගෙනීම හරියට නොකරන දරුවන්ද ඇත. දුප්පත් පවුලක ඉපදුණු ළමයකු පවා හොඳින් ඉගෙන ගෙන උසස් රැකියාවල් කරන අවස්ථාද ඇත. මෙසේ වන්නේ ඇයි? එසේ නම් ඔබත් ඔබේ දරුවාගේ කේන්දරය පරීක්‍ෂා කරගෙන දරුවාගේ අධ්‍යාපනය කෙසේ වන්නේ දැයි සොයා බලන්න.

අධ්‍යාපනය ගැන කතා කරන විට කේන්දරයක 03 වැන්න, 05 වැන්න හා 09 වැනි භාව පරීක්‍ෂා කළ යුතුය. 03 භාවය පරීක්‍ෂා කිරීම මඟින් දරුවාගේ මූලික අධ්‍යාපනයද, 05 භාවය තුළින් දරුවාගේ ද්විතීයික අධ්‍යාපනයද, 09 භාවයෙන් උසස් අධ්‍යාපනයද දැනගැනීමට පුළුවන.
03 භාවය මඟින් දරුවන්ගේ හැකියාවන් දැනගන්නට පුළුවන. රවි ග්‍රහයා 03 භාවයේ නම් විදේශීය භාෂාවක් පිළිබඳ දැනුම ලබා ගනී. උපන් තත්ත්වයට වඩා උසස් තත්ත්වයක් ලබා ගනී. 03 භාවයේ බුධ නම් ඉගෙනීමට දක්‍ෂය. විද්‍යාවට මෙන්ම ගණිතයටද දක්‍ෂය. සිකුරු 03 භාවයේ නම් කලා කටයුතුවලට ළැදි අයෙකි. 03 භාවයේ කුජ නම් කාර්මික කටයුතුවලට දක්‍ෂය. කේතු 03 සිටීමද ඉගෙනීමට යහපත්ය.

05 භාවය පරීක්‍ෂා කිරීම තුළින් දරුවාගේ ද්විතීයික අධ්‍යාපනය ගැන දැනගැනීමට පුළුවන. දරුවාගේ බුද්ධිමත්භාවයද, 05 වැන්න මඟින් දැනගැනීමට හැකි වෙයි. එසේම 04 භාවයද අධ්‍යාපනය සම්බන්ධව සලකා බලයි. 04 භාවයේ සුබ ග්‍රහයකු සිටීමද අධ්‍යාපනයට යහපත්ය.
09 භාවය පරීක්‍ෂා කිරීම තුළින් දරුවාගේ උසස් අධ්‍යාපන කටයුතු පිළිබඳ සොයා බලන්නට පුළුවන. 03 හා 05 භාව අසුබව තිබුණත් 09 භාවයේ සුබ ග්‍රහයකු සිටී නම් දරුවා උසස් අධ්‍යාපනයට යොමු වෙයි. 09 භාවය තුළ ගුරු, බුධ, සඳු, කේතු වැනි ග්‍රහයන් සිටීම උසස් අධ්‍යාපනයට යහපත්ය.

මෙයට අමතරව ඉගෙනීමට සම්බන්ධ විශේෂ ග්‍රහ යෝගද ඇත. ඒවා සම්බන්ධවද දැනගැනීම වැදගත්ය.

මේ බුධ යෝගය, ගුරු හංස යෝගය, භද්‍රා යෝගය, ඒකාවලී යෝගය, විදුරවි යෝගය, බුධ ගුරු යෝගය වැදගත් තැනක් ගනී. මෙම සුබ යෝග අධ්‍යාපනයට බලපාන භාවයන්වල තිබීමෙන් යහපත් ප්‍රතිඵල ලැබෙයි.
එසේම 03, 05, 09 භාවවලට ලැබෙන සුබ දෘෂ්ටිද සලකා බැලිය යුතුය. උදාහරණයක් වශයෙන් ගුරු ග්‍රහයා ලග්න ගතව සිටින කල ගුරුගේ දෘෂ්ටිය 05 භාවයටද, 09 භාවයටද ලැබේ. එය ඉගෙනීමට යහපත්ය.

දරුවා ඉගෙනීම ලබන කාලයේ ගතකරන දශාවද දරුවාගේ අධ්‍යාපනයට බලපායි. කුජ මහ දශාවෙන් ඉපදුණු දරුවකුට ඉගෙනීම ලබන කාලය තුළ රාහු මහ දශාව ලබයි. රාහු මහ දශාව ඉගෙනීමට අයහපත්ය. රාහු කේන්දරයේ සුබව සිටී නම් එතරම් අයහපත් ප්‍රතිඵල නොලැබෙයි. රාහු මහ දශාව තුළදී ඉගෙනීමට උනන්දුව අඩු වීම හෝ ඉගෙනීම කඩාකප්පල් වීමටද බලපායි. එවිට දරුවා ඉගෙනීමට උනන්දු කළ යුතුය.

ඉගෙනීම ලබන කාලයේ සිකුරු මහ දශාව මෙන්ම කුජ මහ දශාව ලබා තිබීමද අයහපත්ය. නමුත් සිකුරු හෝ කුජ 05 වැන්නාධිපති හෝ 09 වැන්නාධිපති නම් ඉගෙනීමට අයහපත් නැත. උසස් අධ්‍යාපනය ලබන විට සුබ දශාවක් ලැබීමද ඉගෙනීමට යහපත්ය.
ඉගෙනීමට මුලින් අදක්‍ෂ දරුවන් පසුකාලයේදී ඉගෙනුමට දක්‍ෂ දරුවන් වනුයේ ඔවුන්ට ඒ කාලයේදී යහපත් දශාවක් ලැබීමය. ඔබගේ දරුවා ඉගෙනීමට අදක්‍ෂ නම් දරුවාට තරවටු නොකොට දරුවාගේ කේන්දරය බලා කළයුතු ප්‍රතිකර්ම කරවාගන්න.

ජ්‍යොතිෂවේදී එස්.එම්. ගුණවර්ධන