ස්ථිර රැකියාවක් නොතිබුණද ඉන් අධෛර්යවත් නොවුණු විජිත, ඉන් පසු පරණ යකඩ, බෝතල්, තඹ ආදී අබලි ද්රව්ය තැනින් තැනට ගොස් එකතු කොට විකිණීම සිය රැකියාව කරගත්තේය. ඉතා අසරණභාවයට පත්ව දුක්ඛිත ජීවිතයක් ගත කළද කෙටි කලකින් ධනවත් ව්යාපාරිකයකු බවට පත්වීමට ඔහුට හැකි වූයේ සිය අපරිමිත උත්සාහය හා කැපකිරීම මතය.
ඔහුගේ නව නිවෙස ගොඩනඟන විට ජීවිතයේ කිසිදු අඩුපාඩුවක් නොවිණි. එමෙන්ම ගෘහ නිර්මාණ ශිල්පියා නිවෙස වාස්තු විද්යානුකූලව සකස් කොට ඇතැයි පැවැසීම නිසා එහි වාස්තු බැලීමටද ඔහුට අවශ්ය නොවීය. නිවෙසේ පදිංචිවී වසර 4ක් පමණ වනතුරු කිසිදු ගැටලුවක් නොවීය.
ඔහු, ඒ වන විට විවිධ ආයතනවලින් කොන්ත්රාත් මගින් යකඩ, තඹ වැනි අබලි ද්රව්ය මහා පරිමාණයෙන් මිලදී ගත්තේය. නිවෙසක් සුබ අසුබ පල දීමට නම් වසර තුනක කාලයක් පමණ ගතවේ. එය ප්රමුඛ වාස්තු සිද්ධාන්තයකි. නිවෙසේ ගෙවන හතරවැනි වසර වන විට ගෘහ මූලිකයාගේ කොන්ත්රාත් සඳහා අසීමාන්තික බාධා පැනනැඟුණු අතර ව්යාපාරය මූල්යමය පාඩු ලබන තත්ත්වයටද පත්විය. නමුත් ඒ වන විටත් ඔහුගේ ධෛර්යය හීන නොවී තිබිණි. එම නිවෙස වාස්තු පරීක්ෂා කිරීමට හේතු වූයේ එයයි. එවන් බිඳවැටීමක් ඇති වීමට හේතු සාධක වූ වාස්තු දෝෂ සහ ඒවාට යෙදූ පිළියම් මෙසේය.
පර්ශු නාම ගෘහ
සංස්කෘත බසින් පර්ශු යනු පොරවයි. නමුත් මෙම නිවෙසේ තිබුණේ සාමාන්ය ඇසට හසුවන පොරව හැඩයේ දෝෂයක් නොවේ. අප සමාජයේ පොරව හැඩයේ නිවෙසක් ලෙස සලකන්නේ ඍජුව ‘ඕ’ හැඩයේ හෙවත් පොරවක් ආකාරයේ නිවෙසකි. එමෙන්ම මේ හැඩ මඟහැරීමට අත්තිවාරම් කෑලි එක් කිරීම සුලබ දසුනකි. එමෙන්ම නිවෙසක පොරව හැඩය භංග වීමට එවැනිම කොටසක් එකතු කිරීම සෑහේ යැයි බොහෝ දෙනකු සිතන්නේ නොදැනුවත්කම නිසයි.
මෙම නිවෙසේ කොටස් විශාල ප්රමාණයක් තිබුණද ඒ එකදු කොටසක්වත් වඩු රියනක ප්රමාණයක් නොගත්තේය. සෑම විටම පොරව හැඩය භංග වීමට නම් වඩු රියනක් (අඟල් 31ක්) ඉක්මවන ප්රමාණයක් තිබිය යුතුය.
මෙම නිවෙසේ පොරව හැඩය ඇති කරන ආකාරයේ අඩි 10ක පමණ කොටසක් තිබූ අතර අනෙක් සියලු කොටස් වඩු රියනක් නොඉක්ම විය. මෙවන් තත්ත්වයක් ඇතිවීමට හේතු සාධක වූයේ ගෘහ නිර්මාණ ශිල්පියාගේ නොදැනුවත්කමයි.
මෙවැනි නිවෙසකින් ජීවිතය කැපි කැපී වැටීමක් සිදුවේ. නිවැරැදි ලෙස නිවෙසට නව කොටසක් එක් කර එම දෝෂය භංග කළේය.
බේස්මන්ට් එක හෙවත් භූගත මහල අපිරිසිදු වීම
ඔහුගේ නිවෙසේ භූගත මහල නිවෙස කොතරම් අලංකාර වුවත් දැඩි සේ අපිරිසිදු වී තිබිණි. එය කිසිදු විටෙක භාවිත නොකර නිවෙසේ ඉවතලන ද්රව්ය ගොඩගසා තිබිණි. එය පැවැතියේ නිසි වාතාශ්රයක් නොලැබෙන පරිදි මුද්රා තැබුණු විලාසයකිනි.
නිවෙසක බිම් මහලත් සමග භූගත මහලක් පිහිටීමේදී එය පිරිසිදුව හා ආලෝකවත්ව තැබීම ඉතා වැදගත්ය. මෙලෙස භූගත මහල තැබීමෙන් බ්රහ්ම පාදය දැඩිව පීඩාවට පත්වේ. එය නිවැසියන්ගේ කායික මානසික පිරිහීමට මූලික හේතුවක් වන්නේය. මෙය නිවෙස තුළ වැසිකිළි වළක් පැවැතීමේ දෝෂයට සමානය.
භූගත මහලේ තිබූ සියලු අබලි ද්රව්ය ඉවත් කොට හොඳින් වාතාශ්රය ලැබී හිරු එළියෙන් ආලෝකවත් වන පරිදි ජනෙල් යෙදවීය. පසුව ඔවුහු එය මනුෂ්ය වාසයට එක්කර ගත්හ.
ගිනිකොන දිශාවට පත්වූ ඉඩම
මෙම ඉඩම්හිමියාගේ වත්තේ ගේට්ටු දෙක තුනක් තිබූ අතර ඉඩමේ වැහි වතුර බස්නාව සකස් කොට තිබුණේ ගිනිකොන දිශාවේ තිබූ ගේට්ටුවෙන් පාරට යන පරිදිය. ගිනිකොනට ඉඩමේ බස්නාව පැවැති විට එය නිවැසියන්ගේ සියලු දේ විනාශ වීමට හේතුවක් බව වාස්තු ශාස්ත්රයේ සඳහන් වේ. ඉඩමේ බස්නාව සහ මිදුල සකස් කර බස්නාහිර ගේට්ටුවෙන් වතුර බැස්සවීමට කටයුතු කරන ලදී. ඉහත වාස්තු දෝෂයන් සකස් කිරීමෙන් අනතුරුව මාස 6ක පමණ කාලයක් ගතවීමෙන් පසු ටිකෙන් ටික නැවත ව්යාපාර සාර්ථක තත්ත්වයට පත් කරගැනීමට හැකියාව හා භාග්ය විජිතට උදාවිය.
වාස්තුවිද්යා, ජ්යොතිෂවේදී අමාලි අගස්පතිරණ
