හාත්පස අඳුර පැතිර යමින් තිබිණි. ජයන්ති කාමරයට දිව ආවේ දරුවාගේ කෙඳිරිගෑම ඇහිලාය. ඇය යහන අසලට ගොස් එහි නිදාගෙන කෙඳිරිගාන කුඩා දරුවා අසල වාඩිවූයේ දරුවාගේ හිස අතගාමිනි.
‘දොස්තර මහත්තයාගෙ බෙහෙත්වලටත් මේ දරුවගෙ හිසේ කැක්කුම අඩුවෙලා නෑනේ දෙයියනේ…’
ජයන්ති දැඩි වේදනාවකින් කියනු ඇසී ඇගේ මවද එතැනට ආවේ කලබලයෙනි.
‘ඔය දරුවට වතුර ඩිංගක් පිරිත් කරලා පොවමු දුවේ බලන්ඩ…’
ජයන්තිගේ මව ආපසු ගොස් වතුර වීදුරුවක් රැගෙන බුදු පහන අසලට ගියේ කලබලයෙනි. බුදු පහන අසලට ගොස් ජල බඳුන ඒ අසල තබද්දී ඇගේ ඇස ගැටුණේ කලකට පෙර ජයන්තිගේ සැමියා කතරගම ගොස් ආපසු එන විට රැගෙන විත් කතරගම දේව රූපයට පලඳා තිබූ කරඬු මල් මාලයයි. තමන් ආ කාරණය මඳකට පමා කළ ඇය එම මල් මාලය ඉතා භක්තියෙන් යුතුව අතට ගෙන දරුවා අසලට ගියාය.
‘ඇයි අම්මේ හරිද…?’
ජයන්ති ඇසුවේ දරුවාගේ උදරය පිරිමදිමිනි. ඇගේ මව තම අත තිබූ මල් මාලය දරුවාගේ හිස මත තබා මොහොතක් නිහඬව දරුවාට ඇති අපහසුතාව සුව කරදෙන්නැයි කතරගම දෙවියන්ගෙන් ඉල්ලා සිටියාය.
ඇය එසේ කළේ කතරගම පෙරහැරේ කරඬු මල් මාලයේ යම් බලයක් ආශීර්වාදයක් ඇති බව අසා දැන තිබූ හෙයිනි. වැඩි වේලාවක් යන්නට පෙර දරුවාගේ කෙඳිරිය නතර විය. දරුවාට ඇති අපහසුතාව අවසන් බව එයින්ම පැහැදිලි වූ අතර ජයන්ති සිය මව දෙස විමතියෙන් බලා සිටියාය.
‘දෙයියනේ පුතාගේ හිස කැක්කුම හරිගියාද පුතේ…’
ජයන්ති විමතියෙන් අසද්දී දරුවා හිස සෙලෙව්වේ ඔව් යැයි කියන්නටය. මව යළිත් මල් මාලය ගෙන ගොස් ආරක්ෂිතව තැන්පත් කර ආපසු ආවේ පෙරහැර කරඬුවේ මල් මාලාවකට ඇති අසීමිත බලය ගැන මෙනෙහි කරමිනි. එදින සිට ඔවුන්ගේ සුළු සුළු අසනීපවලට මෙන්ම මහා දැවෙන ප්රශ්නවලටත් ආශීර්වාද පතා එම මල් මාලාව භාවිත කිරීමට ජයන්තිලා පුරුදු වූහ.
මේ එක් කතාවකි. කතරගම පෙරහැරේ කරඬුව මල් මාලාවල ඇති අසීමිත ශක්තියත් බලයත් ප්රයෝජනයට ගන්නා සහ එහි ආශීර්වාදය ලබාගන්නා විශාල පිරිසක් රට තුළ විසිර සිටින බව රහසක් නොවේ. එමෙන්ම මෙම පෙරහැර කරඬුවේ මල් මාලායක් හෝ මල් මාලා කැබැල්ලක් තමන් සතු කරගෙන ධනවතුන් වූවන් ගැනද අසන්නට ලැබේ.
කෙසේ නමුත් පෙරහැර කරඬුවේ මල් මාලා ලබාගැනීම ගැන ඇත්තේ හරි අපූරු කතාවකි. එය එක්තරා ආකාරයකට අපූරු අත්දැකීමකි.
කතරගම පෙරහැරේ දෙවියන් වැඩමකරවන කරඬුව වැඩමවන ඇතා ඇතුළු මාලිගයට ගමන් කරනතුරු බොහෝ පිරිසක් බලා සිටිනුයේ නොඉවසිල්ලෙනි. ඇතා දැන් දැන් ඇතුළු මාලිගයට කරඬුව වැඩමවනු ඇතැයි සිතමින් රැස්කමින් සිටින ජනතාව අතරේ යම් ඉලක්කයක් සිතේ තබාගෙන බලා සිටින පිරිසක්ද වෙයි. ඒ අනුව ඇතා මාලිගයට කරඬුව වැඩම කළ විගස ඒ විශේෂ සිතුවිල්ල සිතේ තබාගෙන සිටි පිරිස ඇතාව වටකරගත්තෝය. ඔවුන්ගේ එකම අරමුණ කරඬුවට පලඳා ඇති මල් මාලයක් තමන් සතු කරගැනීමය. ඒ සඳහා මහා සටනක් කරන්නාක් මෙන් විශාල පිරිසක් ඇතා වටකරගත්තද සම්පූර්ණ මල් මාලයක් එක් අයකුට අයත් වන්නේ කලාතුරකිනි. බොහෝ දෙනකුට අයිති වන්නේ මල්මාලයක කුඩා කැබැල්ලකි. එයත් එතැනට වටවන පිරිසෙන් සුළු පිරිසකට පමණි.
මෙලෙස පෙරහැරේ දෙවියන් වඩම්මවන කරඬුවේ පැලඳි මල් මාලාවකින් කොටසක් හෝ තමන් සතුකර ගැනීම මහා භාග්යයක් සේ සිතා බැතිමතුන් ඉතා ගෞරවයෙන් යුතුව එම මල් මාලා කොටස රැගෙන ගොස් තමන් නිවෙසේ වැඳුම් පිදුම් කරන ස්ථානයක තබා වැඳුම් පිදුම් කරන්නට පෙලඹෙන්නේ ඉතා භක්තියෙනි.
පෙර සඳහන් කළ කතාවේදී ජයන්තිගේ සැමියා රැගෙන විත් තිබුණේ එම කරඬුවේ පැලඳි මල් මාලාවකි. මෙලෙස වසරින් වසර එම මල් මාලාවක් හෝ මල් මාලා කොටසක් තමන් සතු කරගැනීම උදෙසාම කතරගම වන්දනාවේ යන පිරිසක්ද සිටිති. ඔවුන් සෑම වසරකම නොවරදවාම කතරගම යන්නේ සිය අරමුණ සඵල වේවායි දෙවියන්ට භාරහාර වෙමිනි.
කතරගම දෙවියන්ගෙන් කළ ඉල්ලීම් දෙවියන් කිසිදා පැහැර නොහරින බවත්, නිසි ගෞරව සහිතව දෙවියන් පුදන අයට දෙවියන් නිබඳවම පිහිටවන බවද බොහෝ දෙනා අත්දැකීමෙන් දනිති.
ඇතැම් ප්රදේශවල මෙම මහා බලයක් සහිත මල් මාලා කොටස් වසර ගණනක් පුරා තමන් සතු කරගත් පිරිස් සිටින අතර ඔවුන්ට ඒවායේ ආශීර්වාදය ලැබීමෙන් ජීවිත ඉතා යහපත් වූ පුවත්ද අසන්නට දකින්නට තිබේ. ස්වභාවික ආපදා අවස්ථාවලද එවැනි මල් මාලා තැන්පත් කර තිබූ නිවාස ව්යාපාර ස්ථාන ආදිය ආරක්ෂා වී තිබූ අයුරු පසුගිය කාලය පුරාම වාර්තා විය.
එමෙන්ම එම නිවාසවල ජීවත්වූ සහ එම මල් මාලාවලට ගෞරව කරමින් ආගම ධර්මය අදහමින් සිටියවුන් විශාල පිරිසක් විවිධ ව්යසන, රෝග පීඩා ආදියෙන් ආරක්ෂා වූ බවක්ද බොහෝ තැන්වලින් අසන්නට ලැබී තිබේ.
එදා මෙදාතුර කාලය පුරා බොහෝ පිරිසක් මේ විස්මිත බලයක් සහිත මල් මාලා ගැන විශ්වාසය පළ කරමින් සිටින අතර බහුතරයක් නොදත් මේ රහස අද වෙද්දී විශාල පිරිසකට සුවිශේෂ ලැබීම් ඇතිකළ ගුප්තමය ආශීර්වාදයක් බවට පත්ව තිබෙනුද දැකිය හැකිය.
කෙසේ නමුත් කතරගම දෙවියන් තම නිවෙසට වැඩමකරනවා වැනි ආරක්ෂාවක් තමන්ට ඉන් ලැබෙන බව මේ මල් මාලා තමන් සතු කරගන්නෝ ඉතා විශ්වාසයෙන් ප්රකාශ කරති.
කුමාර රත්නායක
