ඇයි තාමත් දරුවෙක් නැත්තේ?

දරු සම්පත් පිළිබඳ කතා කිරීමේදී ස්ත්‍රියකගේ මාසික ශුද්ධියට අදාළව කුජ සඳු උභය ග්‍රහයන්ගේ බලය උපයෝගී වේ. කාන්තාවකගේ වන්ද්‍ර රාශියෙන් (1,2,4,5,7,8,9,12) යන අනුපචය රාශියකට කුජ ගිය විට ගැබ්ගැනීම සිදුවේ. එසේම කේන්දරයක 3,6,10,11 උපචය රාශියකට සඳු ගිය විට ගුරු විසින් සඳු දකිනු ලැබූයේ නම් එවිට පුරුෂයකුට සිය පිය පදවියට යහපත් වූ අවස්ථාවකි.

එවන් දිනෙක එක්වීම හරහා දරුවකු පිළිසිඳ ගනී. එසේ නොමැතිව අසංවිධානාත්මකව එක්වීමෙන් ලබන දරුවන් කායික මානසික විපරීත බවට පත්වන බැව් දැක ඇත්තෙමු.
ලග්නයෙන් 7 වැන්නෙන් මෛථුන්‍යය ගැන කියැවේ. 7 වැන්න මූලාධාර වන්නේ දාරක සම්පත පිළිබඳවය. 7 වැන්න පාප පීඩිත වී නම් බලහත්කාරකමකින් විය හැකි පිළිසිඳගැනීමකි. සුබ ග්‍රහ හැසිරීම් රටාවක් වේ නම් ඉතා වාසනාවන්ත දරු උපතකට මඟ පෑදේ. රවි පුරුෂකාරකයි. සඳු ස්ත්‍රීකාරකයි.

රවිගෙන් 7 වැන්නට ගිය ශනි නිසාම රෝගී දරුවකු පිළිසිඳ ගැනීමට මඟ පෑදේ. සඳුගෙන් 7 වැන්නට ගිය කුජ නිසා ස්ත්‍රිය රෝගී වේ. තවද රවිගෙන් 2ට 12 ගිය ශනි නිසාත් සඳුගෙන් 2ට 12ට ගිය කුජ නිසාත් ඔවුනොවුන් රෝගී විය හැකිය.

ස්ත්‍රියකගේ ඔසප් වීමෙන් දින 4කින් එක්වීම අසුබයි. මාස් ශුද්ධියෙන් 6,8,10,12,14,16 පුතුන් ලැබීමට සුදුසු දිනයන්ය. 5,7,9,11,13,15 දිනවල දූවරුන් ලැබීමට යහපත්ය. ඒ ඒ දිනයන්හි පිළිසිඳ ගන්නා දරුවන්ට ග්‍රහ කිරණ හරහා යම් සුබ හා අසුබ ශක්ති පදාහයක් ගොඩනැගේ. තවද නපුංසක දරුවන් උපදින යෝග 6ක් ගැන පැරැණි පොත්වල දැක්වේ. නිවුන් දරුවන් උපදින යෝග 6ක්ද වේ. කුජ බුධ ගුරු පුරුෂ රාශිවල සිටීම සඳු ශුක්‍ර ස්ත්‍රී රාශිවල සිටීම ලග්නය හා සඳු ස්ත්‍රී රාශිවල සිටීම හරහා පුරුෂ ග්‍රහයකු දැකීම ස්ත්‍රී රාශිවල ප්‍රබල කුජ බුධ ගුරු ලග්නගත වීම, ස්වක්ෂේත්‍ර රැසකට නවාංශකයකුට පැමිණ බුධ දැකීම පළමු කී උභය රාශියකට ග්‍රහයන්ට පෙනීම සම අංශකවල සිටි ග්‍රහයන් නිසා සමලිංගික දරුවන් උපදියි.

දරුවකු මවු කුස පිළිසිඳගත් විට එකී දරුවාගේ භාරකාරත්වය ග්‍රහයන් නවදෙනාට පැවරේ. ඒ මෙසේය.

පළමු මාසය සිකුරුය. දෙවැනි මාසය කුජ අඟහරුය. තෙවැනි මාසය ගුරුගේ පාලනයටද, සිව්වැන්න රවිටයි. අස්ථි ශක්තිමත් කරයි. පස්වැනි මාසය සඳුට අයත් වේ. සම වැඩීම සිදුවේ. හයවැනි මාසයේදී ශනිට අයත්වේ. හිසකෙස් වැඩේ. හත්වැනි මාසය බුධට පැවරේ. බුද්ධි වර්ධනය, මොළයේ ක්‍රියාකාරීත්වය ඇතිවේ. මොළයේ දකුණු අර්ධය කලාව සෞන්දර්යය තර්ක විද්‍යාව නියෝජනය වේ.

නැවත 8,9,10 යන මාස රවිට නතුවේ. එතැන් සිට උපත වූ තැන් පටන් සඳු සිටි නැකැතට අයත් ග්‍රහයා ප්‍රමුඛව (අතුරු දශා වශයෙන්) අන්‍ය ග්‍රහයන්ගේ පාලනයට අයත් වේ.
කිසිම සංවිධානාත්මක නොවී අසංවරව බීමතින් කෝපයෙන් විකෘති මනසකින් යහන්ගත වීමෙන් විකෘති මන්ද බුද්ධික හෝ බාලාරිෂ්ඨ යෝගකාරකව දරුවන් උපදී. මේ හරහා බලන විට එවැනි දරුවකු බිහිකිරීමට උපාදන වී ඇත්තේ කුරිරු පීඩාය. පැරැණි කාලයේ ගැබ්ගත් දියණිය සිය මවුපියන්ගේ මහ ගෙදරට කැඳවාගෙන ඒමේ චාරිත්‍රයක් තිබිණි. දරුවකුට මව තරම් ආදරය කරන කෙනකු මිහිපිට නොමැත. සංගීත රාවයන්ට සවන්දී, පිරිත් ශ්‍රවණය කිරීම, ආගමික වතාවත්වල යෙදීම මෙන්ම සෞන්දර්යාත්මක ජීවන රටාවකට යොමුවීම අතිශය වැදගත් වේ. මාස හතයි දවස් 22ක් ගිය විට කුසේ සිටින දරුවාට බාහිර ශබ්ද තරංග ඇසේ. ඒ හරහා දරුවා කුස තුළ චලනය වන්නේය. ජලය වැඩිපුර පානය කළ යුතුය. එසේ නොමැති වූ විට ජල බෑගය තුළ ජලය අඩුවීම නිසා දරුවාට පිහිනීමට නොහැකි වේ. සමහර විට දරුවා පෙකණි වැල ශරීරය වටා ඔතාගනී.

ගැබිනි මවක් තද ඌෂ්ණාධික ආහාර පාන හා අධික ශීතල ආහාර පාන ගැනීමෙන් වැළැකිය යුතුමය. පැරැණි කාලයේ ළිඳෙන් කළය උකුලේ තබාගෙන වතුර ගෙන ඒම, වී කෙටීම, මිරිස් ඇඹරීම වැනි ක්‍රියාවන් නිසා දරුවාට නිසි ව්‍යායාමයක් ලැබේ. මව අධික ලෙස දිවා කාලයේ නිදා නොගත යුතුය. රාත්‍රියේ සුව සේ නිදිය යුතුවේ. දරුවා ගැබ තුළ සිටින කාලයේ අන් කවරදාකටත් වඩා තම සැමියා සමග ආදරයෙන් අල්ලාප සල්ලාපයේ යෙදෙමින් සිටීම අනිවාර්ය වේ. තම බිරිය සුරතල් කරමින් මිහිරි වදන් පවසමින් සිටිය යුතුවේ. අපේ හෙළයේ මහා ගාන්ධර්වයාණන් වූ අමරදේව සූරීන්ගේ සංගීත හඬට සවන් දීම ඉතාම සුබයි. තවද රවිශංකර් සූරීන්ගේ සිතාර් වාදනයට සවන් දීමෙන් ගැබේ සිටින දරුවා මානසිකමය උපරිම රස වින්දනයක් ලබනු ඇත.

කේන්ද්‍ර පරීක්ෂා කිරීමේදී ගැබ් ක්ෂය වීමට හේතුව සේවීමේදී මව හා පියාගේ දාරක සම්පත් හිමි 5 වැන්න පාප පීඩිත බැව් පෙනේ.

5 වැන්නේ කුජ රාහු වැනි ග්‍රහයකුගෙන් හෝ 22 වැනි දෙර්කාණාධිපති ග්‍රහයාගෙන් හෝ සමහර විට 8 අධිපතියාගෙන් හෝ පීඩා ලත් විට දරු ඵලවල කටුක අත්දැකීම් පසුකරනු ඇත. 5 වැන්නේ දෘෂ්ටිගතව ඉතා සුබ ග්‍රහයන්ගේ හැසිරීම පිහිටීම ඇත්නම් වාසනාවන්ත ආයු වර්ණ සැප බල ප්‍රඥා යන පංච මහා සම්පත්තිය හිමි දරුවකු හිමිවේ.
විශේෂයෙන් විවාහය සඳහා ග්‍රහ ගැළපීම් බලන විට දරුඵල තිබේද නැද්ද යන්න ගැන ස්ථාවර තීරණයක් ගත යුතුමය.

විවාහයක අග්‍ර ඵලය දරු සම්පතයි. විවාහය ක්‍රීඩා පිට්ටනියක් කර නොගත යුතුය. දෙදෙනකුගේ විවාහය සිදුකිරීමට පොරොන්දම් බලන විට වාසනාවන්ත දරු සම්පත් දෙදෙනාටම හිමිවේද යන්න ධනාත්මකව පැහැදිලිව බලා ස්ථාවර තීරණයක් ගත යුතුය. විවාහවී හැමදාම දරුවන් ලැබේද යන්න කේන්ද්‍ර බල බලා ළතැවෙනවාට වඩා පළමුව නිසි තීරණය ගන්න.

ප්‍රවීණ ජ්‍යොතිෂවේදී දේශබන්දු ටී.හෙන්රි බෙම්මුල්ල