මම ගොඩාක් බයයි දරුවො වඩාගන්න…
දැන් ඉතින් දරු නැළවිලි ගී තමයි කියන්නෙ…
මුතු වරුසාවක් මැද මුතුගේ නිවෙසට පසුගියදා පුංචි තරුවක් එළිය දුටුවා. ඉතින් මුතුගේ මේ සතුට කිරි සුවඳින් නිවෙස පුරාම පැතිර යන සොඳුරු මොහොත ඒ සතුට ඔබත් සමග බෙදා ගැනීමට ප්රවීණ රංගන ශිල්පිනී මුතු තරංගාට අපි කතා කළා.
මුතු ඉතින් කොහොමද?
ගොඩාක් සතුටින් තමයි ඉන්නේ.
ඒ සතුට තවත් උතුරා යන්නට හේතුවක් බලපෑවා නේද?
ඔව්… අනේ මගේ පුංචි සමනල් පැටියා පසුගියදා අපේ කැදැල්ලට එකතු වුණා. ඒක තමයි මේ සතුටට විශේෂම හේතුව. මගේ පුංචි පුතාට මගේ මුළු ජීවිතයම දැන් කැප කරලා තමයි තියෙන්නේ.
ඔබේ පුංචි පුතුට ලස්සන නමක් එහෙම දැම්මද?
තවම නමක් හැදුවේ නැහැ. හඳහනට ගැලපෙන විදියට නමක් දාන්න තමයි හිතාගෙන ඉන්නේ.
ඔබ දැන් මවක් කියලා හැමදෙනාම කියන කොට ඔබට මොනවගේ හැඟීමක්ද දැනෙන්නේ?
ඒ උත්තරීතර ‘මව්’ පදවි නාමය මට වචනවලින් කියලා නිම කරන්න බැහැ. මේ ලෝකේ අම්මලා වුණු සියලුමදෙනාට දැනුණු හැඟීම මටත් දැනෙනවා. ඒ වගේම දරුවන් බලාපොරොත්තුවෙන් ඉන්න සියලුමදෙනාගේ ප්රාර්ථනාවන් එලෙසම ඉටු වෙන්න කියලා මම ප්රාර්ථනා කරනවා.
මුතුව කාලෙක ඉඳලා නිර්මාණවල දැක්කේ නැහැ. දැන් පුතුගේ වැඩකටයුතුත් එක්ක නිර්මාණවලින් ඈත්වෙලා යාවිද?
මම අවසානයට රඟපෑවේ ‘රැස්’ ටෙලිනාට්යයේ. මම ඒ අවස්ථාවේ ටොලම් අයියාටත් කිව්වේ මගේ චරිතය ගැබ්ගන්න බිරියක් විදියට නිර්මාණය කරන්න කියලා. මොකද මම හිතුවා මේ කාලවල මට මවක් වීමට වාසනාව ලැබෙයි කියලා. දැන්නම් ඉතින් මොන කාල වකවානුවක මම රඟපාන්න එයිද කියලා මට දැන්ම කියන්න බැහැ. මම හිතන්නේ ටික කාලයක් දරුවා සමග මට ඉන්න වෙයි. හැබැයි මම කලාවෙන් ඈත් වෙන්නේ නැහැ. කාලයත් එක්ක මට සුදුසු කාලයක් උදාවෙයි නැවැත නිර්මාණවලට සම්බන්ධ වීමට.
ඒ දවස්වල මුතු දරුවන් වඩාගෙන රඟපෑමට බියක් තිබුණා නේද?
ඇත්තටම ඔව්… සමහර නිර්මාණවල මට එවැනි චරිත තිබුණා නිරූපණය කිරීමට. මම බැහැ කියලා කිව්වා. මොකද මම ගොඩාක් බයයි අතදරුවෙක් වඩාගෙන රඟපාන්න. ඒ කාලවල ගැබිනි මවක් දැක්කත් මට බය හිතුණු අවස්ථා තිබුණා. දැන් ඉතින් මගේම කියලා දරුවෙක් ඉන්න නිසා ඒ හැම දෙයටම මම හුරු වෙනවා. එතකොට ඉදිරියේදී එවැනි චරිතයක් වුණත් රඟපාන්න මම බය නැහැ.
දරුවා ලැබීමෙන් පසු මුතු තවත් ලස්සන වෙලා වගේ?
මම එහෙම රූපය ගැන හිතලා වැඩ කරන කෙනෙක් නෙවේ. සරලව ජීවත් වුණු කෙනෙක් මම. පුතා ලැබුණා කියලා මගේ බාහිර ස්වරූපය වෙනසක් වෙලා නැහැ. හිටියා වගේම ඒ විදියටම මම ඉන්නවා.
‘කොවිඩ්’ ප්රශ්නත් එක්ක පුංචි බයක් තියෙන්න ඇති නේද?
ඇත්තටම ඔව්… ඒ බය අදටත් තියෙනවා. පුතාව බලන්න ක්ෂේත්රයේ ගොඩදෙනෙක් ආශාවෙන් බලන් ඉන්නවා. ඉතින් මේ ඇතිවෙලා තියෙන ප්රශ්නත් එක්ක දැන්ම කවුරුත් ගෙදරට එන්නේ නැහැ. තව මාස කිහිපයකින් විතර මගේ නිවෙස තරුවලින් පිරී ඉතිරී යාවි.
රඟපෑම මඳකට නතර කරපු එකේ ඔබේ ගායන හැකියාවෙන් යමක් කළොත් නරකද?
දැන් ඉතින් දරු නැලවිලි ගී තමයි මම කියන්නේ.
පුතාගේ වැඩකටයුතු මුතුගේ අතින්මද කරන්නේ?
මගේ උදව්වට අම්මාත්, නංගිත් ලොකු සහායක් දෙනවා. ගෙදර උයන, පිහින වැඩකටයුතු නම් කරන්නේ මගේ සැමියා තමයි මේ දවස්වල.
–වසන්ත විතාරණගේ
