විනිසුරුවරුන්ගේ විශ්රාම යෑමේ වයස් සීමාව දීර්ඝ කිරීම සම්බන්ධයෙන් රජය මෙතෙක් කිසිදු සාකච්ඡාවක් පවත්වා නොමැති බව කැබිනට් ප්රකාශක, සෞඛ්ය සහ ජනමාධ්ය අමාත්ය නලින් ජයතිස්ස ඊයේ (09) ප්රකාශ කළේය.Sri Lanka Latest News
සතිපතා පැවැත්වෙන කැබිනට් ජනමාධ්ය හමුවේදී මතු වූ ප්රශ්නයකට පිළිතුරු දෙමින් අමාත්යවරයා සඳහන් කළේ, විශ්රාම වයස් සීමාව ඉහළ දැමීම සඳහා විවිධ පාර්ශ්වයන් යෝජනා ඉදිරිපත් කර තිබුණද, අධිකරණ ක්ෂේත්රය සම්බන්ධයෙන් එවැනි කිසිදු තීරණයක් ගෙන නොමැති බවයි.
“විනිසුරුවරුන්ගේ විශ්රාම වයස දීර්ඝ කිරීම පිළිබඳව රජය තුළ මෙතෙක් කිසිදු සාකච්ඡාවක් සිදුවී නැහැ,” යැයි ඔහු පැවසීය.
වෙනස්වන ජනගහන සහ ආර්ථික තත්ත්වයන් හේතුවෙන් වෘත්තීය ක්ෂේත්ර කිහිපයකින්ම විශ්රාම වයස ඉහළ දැමීමේ ඉල්ලීම් මතුව ඇති බව ඇමැති ජයතිස්ස පෙන්වාදුන්නේය.
“එක් හේතුවක් තමයි අපේ රටේ මිනිසුන්ගේ ආයු අපේක්ෂාව ඉහළ ගොස් තිබීම. මීට අමතරව, ආර්ථික අර්බුදය සහ කොවිඩ්-19 සමයේදී බොහෝ වෘත්තිකයන් රට හැරගියා. මේ කරුණු සහ එම වෘත්තිකයන් සතු පළපුරුද්ද සැලකිල්ලට ගනිමින්, ඔවුන්ට තවදුරටත් රාජ්ය අංශයේ සේවය කිරීමට අවස්ථාව ලබා දිය හැකිද යන්න සොයාබලන ලෙස විවිධ ක්ෂේත්රවලින් යෝජනා ඉදිරිපත් වී තිබෙනවා” යැයි ඔහු පැවසීය.
විශේෂඥ වෛද්යවරුන්, වෛද්ය නිලධාරීන් සහ දන්ත වෛද්යවරුන්ගේ විශ්රාම වයස අවුරුදු 60 සිට 63 දක්වා දීර්ඝ කිරීමට රජය මීට පෙර අනුමැතිය ලබා දී තිබූ බව ද අමාත්යවරයා සිහිපත් කළේය.
“අපි මීට පෙර සෞඛ්ය ක්ෂේත්රයේ විශේෂඥ වෛද්යවරුන්, වෛද්යවරුන් සහ දන්ත වෛද්යවරුන්ගේ විශ්රාම වයස අවුරුදු 60 සිට 63 දක්වා දීර්ඝ කිරීමට තීරණයක් ගත්තා. ඒ හා සමාන ඉල්ලීම් අනෙකුත් වෘත්තීය කණ්ඩායම් විසිනුත් කර තිබෙනවා.”
කෙසේවෙතත්, විනිසුරුවරුන්ගේ විශ්රාම වයස සම්බන්ධයෙන් මෙතෙක් රජයේ අවධානයට ලක් වූ කිසිදු යෝජනාවක් හෝ තීරණයක් ගෙන නොමැති බව ඇමැති ජයතිස්ස අවධාරණය කළේය.
“විශේෂයෙන්ම විනිසුරුවරුන් සම්බන්ධයෙන් ගත්කල, එවැනි කිසිදු තීරණයක් ගෙන නැහැ,” යැයි ඔහු වැඩිදුරටත් පැවසීය.
