ආසියාවේ ප්රථම තැපැල් රථය කොළඹ සිට නුවරට
ආසියානු ඉතිහාසයේ ස්වර්ණමය සටහනක් තබමින් පණිවුඩ හුවමාරුව ඇතුළු තවත් විශේෂ කරුණු කාරණා රැසකට ප්රයෝජනවත් දායකත්වයක් සපයමින් ආසියානු කලාපයේ ප්රථම තැපැල් රථ ධාවනය 1831 දී මෙරටදී ආරම්භ කෙරුණු අතර එය කොළඹ සිට මහනුවර දක්වා ගමන් ගනිමින් සිය මුල්ම ගමන් වාරය සනිටුහන් කරමින් ඉතිහාස පොතට එක්ව තිබේ.
සිංහලේ අන්තිම රජු මදුරාසියේදී සමුගනී
මෙරට අවසන් රජු ලෙස සැලකෙන ශ්රී වික්රම රාජසිංහ රජු ඉංග්රීසීන්ට හසුවී සිරභාරයට පත්ව මධුරාසියේ වෙල්ලෝර් කොටුවේ දිවිගෙවා 1831 දී සිය අවසන් සුසුම් පොද වාතලයට මුසුකළේ මෙරට රාජාවලියට නැවතීමේ තිත සනිටුහන් කරමිනි. ඒ අනුව මෙරට ජනතාවට සිය රජකු පිළිබඳව බලාපොරොත්තු අවසන් කළ වසර ලෙසටද 1831 වසර ඉතිහාසයට එකතු විය.
හෙළයන්ට පත්තර හුරුකළ කලම්බු ජර්නල්
රජය ඉංග්රීසි ගැසට් පත්රය ලෙසින් 1831 දී ආරම්භ කෙරුණු කලම්බු ජර්නල් ගැසට් පත්රය පසු කලෙක මෙරට ජනයාට පුවත්පතක අත්දැකීම සපයමින් එය මෙරට පළමු පුවත්පත ලෙස මුද්රණය කිරීමට කටයුතු කෙරිණි. එහෙත් 1833 රජයේ වැරැදි පළකිරීම හේතුවෙන් 1834 මුද්රණය නතර කරන්නට නියෝග කෙරිණි. ඉන්පසු මෙරට ජනතාවට පුවත්පත් පිළිබඳව තිබූ අත්දැකීම් යළිත් අමතක කර දමන්නට සිදුවිය.
හෙළයින්ට ගනුදෙනු පහසු කළ සේවිංස් බැංකුව
මෙරට ජනතාව එදිනෙදාට අවශ්ය මුදල් ගනුදෙනු කරමින් උපයන මුදල් තමන් සන්තකයේ අරපරිස්සමට තබා ගැනීමට හුරුවූ පිරිසක් වූ අතර ඔවුන්ට බැංකු ගැන අත්දැකීමක් තිබුණේ නැත. ව්යාපාරිකයන්ට ගනුදෙනු පහසු කිරීමට එකල පාලකයින්ට බැංකු පිළිබඳ සංකල්පය හෙළයන්ට හුරු කිරීමට අවශ්ය විය. ඒ සඳහා ආරම්භයක් ලෙස ආණ්ඩුවේ සේවිංස් බැංකු පිහිටුවීම 1831 ආරම්භ කරන ලදි.
