බෞද්ධ පුනරුදයට පරම ධම්මචේතිය පිරිවෙන

18 වැනි සියවස අග භාගයේ කිතු දහම ප්‍රචාරය උදෙසා විවිධ පොත්පත්, සඟරා ආදිය මුද්‍රණය වුවද බෞද්ධ ආගමේ ප්‍රචාරයට සහ එහි පුනරුදය උදෙසා එවැනි පහසුකමක් නොතිබිණි. මේ තත්ත්වය මනාව තේරුම්ගත් භික්‍ෂුන් වහනසේලා පන්සල්වල තමන්ට හැකි අයුරින් බෞද්ධ ආගම ප්‍රචාරයට සහ බුදුදහමේ පැවැත්ම උදෙසා කටයුතු කළහ. එහෙත් එයම ප්‍රමාණවත් නැතැයි වටහා ගත් වැලිවිට සරණංකර මාහිමියෝ බෞද්ධ පුනරුදය උදෙසා මහා කැපවීමක් කළහ. ඒ හා සමග වලානේ ශ්‍රී සිද්ධාර්ථ හිමියන් විසින් රත්මලානේ පිහිටුවන ලද පරම ධම්ම චේතිය පිරිවෙන 19 වැනි සියවස ආරම්භයේම බෞද්ධ පුනරුදයට මහා පිටිවහලක් සැපයීය.