මට ගැලවීමක් නැහැ

⬤ මගේ ජීවිතේ එක්ක නිදන්ගත වෙලා…

සාරංග දිසාසේකර ටෙලි සිනමාවට පැමිණියේ සහ එහි තරුවක වූයේ, මුදු ගති ඇති සියුමැලි පෙම්වතුන්ගේ චරිත හරහාය.
කඩවසම් පෙනුම සේම සිත් ඇදගන්නා රංගන රටාව හරහා ප්‍රේක්‍ෂක සිත් ඇදබැඳ ගත් සාරංග,
මෑතක සිට දුෂ්ටයාගේ චරිත තුළින් ටෙලි තිරය ආක්‍රමණය කරලීමට පටන් ගත්තේය.
‘ලංසුපතිනියෝ’හී ‘කෙසෙල් සුසා’ සහ ‘අග්නි පියාපත්’ හී මනුරංග සේනානායක ඊට හොඳ නිදසුන් වේ. ඒ සියල්ල අතර මියුසික් වීඩියෝ ඔස්සේ සාරංග සිය ගායන හැකියාවද ඔප්නැංවීම ආරම්භ කොට හමාරය. ඒ.., ‘සාරංග ඩිනක්ෂි ඔන්ලයින් යූ ටියුබ්’ චැනලය හරහාය. සුවිශේෂීව ඒ ගැන ඔහුගෙන් තොරතුරු අසා දැනගන්නට ‘මව්රට – හදවත’ තුළින් අප මෙලෙස ඔහු වෙත සමීප වූයෙමු.

🔴 අවුරුද්දට සැරැසෙන කඩිමුඩියේ ඔන්න අපිත් ආවා ඔබ ගැන තොරතුරු ටිකක් අසා දැනගන්නට?
ඒ පැමිණීම සාදරයෙන් පිළිගන්නවා… මම කොහොමත් මාධ්‍ය සමග හැමදාමත් සුහදයි. මගේ ජංගම දුරකතනයද මාධ්‍ය වෙනුවෙන් ‘හෙලෝ’ කිව්වේ හැමවිටම බොහොම සුහදවයි.
🔴 එහෙනම් ඉතින් කියන්න, ඔබේ අලුත් තොරතුරු එහෙම කොහොමද?
‘අග්නි පියාපත්’ අවසන් කොටස් කිහිපය සහ ‘අකුරු මැකී නෑ’ ටෙලිනාට්‍යයෙහි රූගත කිරීම් මේ දවස්වල සිදුවෙනවා.
ඒ අතර, ශිවගුරුනාදන් මහතාගේ අධ්‍යක්‍ෂනයෙනුත් ‘හිරු’ නාලිකාව විසිනුත් නිර්මාණය කරන්නට යන අලුත් ටෙලිනාට්‍යය දෙකක වැඩකටයුතු මැයි මස මුල් හරියේ ආරම්භ වීමට නියමිතව තිබෙනවා. තවම ඒ ටෙලිනාට්‍යවලට නම් තැබීමක් සිදුව නැහැ.
🔴 මියුසික් වීඩියෝවක් ගැන අලුත් ආරංචියක් අසන්නට ලැබුණා සාරංග?
ඔව්… ආරංචිය නම් හරි… හැබැයි ඒක අලුත් නම් නැහැ. මොකද නත්තල වෙනුවෙන් ‘අපි’ මියුසික් වීඩියෝවක් කළා. ඒ වාගෙම ඒක හුඟක් ජනප්‍රිය වුණා. දෙවැනි ගීතය නිර්මාණය වූයේ එළඹෙන සිංහල අලුත් අවුරුද්ද වෙනුවෙනුයි.
🔴 ‘අපි…’ කිව්වේ කවුද සාරංග… රූපවාහිනී චැනලයක් සහ ඔබද?
නැහැ… නැහැ… මේ වෑයමට රූපවාහිනී චැනලයක සම්බන්ධයක් නැහැ.., අපි යන අදහස දුන්නේ ‘මම සහ ප්‍රියසාද් පවුල මේ නිර්මාණයට එක්ව ඇති නිසයි.
🔴 සංගීත අධ්‍යක්‍ෂණය සහ රූප රචනය ගැන තව විස්තර ටිකක් කියමුද සාරංග..?
මියුසික් වීඩියෝවක් ලෙස මෙය නිෂ්පාදනය වන්නේ සාරංග ‘ඩිනක්ෂි ඔන්ලයින් යූ ටියුබ්’ චැනලය ඔස්සෙයි… මෙහි ගීත රචනය දුමින්ද අලහේන්ද්‍ර, රූප රචනය අධ්‍යක්‍ෂණය පැතුම් ඒකනායක, සංගීතය අශාන් ප්‍රනාන්දු.
මම ඩිනක්ෂි සමඟ ශේෂාද්‍රි, ශනුද්‍රි, ඉෂාන් මෙයට සහභාගි වෙනවා. නත්තල් ගීතයක් කළේ අපි කට්ටියම තමයි. හිතුවාට වඩා එය ප්‍රේක්‍ෂකයන්ගේ හිතට වැදුණා. සිංහල අවුරුදු ගීතයත් එහෙම ජනප්‍රිය වෙනවා කියන විශ්වාසය හිතේ තියෙනවා.
🔴 මේ වාගේ මියුසික් වීඩියෝවක් කරන්න හිතුණේ ඇයි කියලා ඇහුවොත්?
කාටවත් අමතක නැහැ මම හිතන්නේ, 2020 සිංහල අවුරුදු මතකය කොයිතරම් කටුකයිද කියලා. තවම වුණත් ‘කොවිඩ්-19’ අවදානමෙන් අපි හරියටම බැහැර වෙලා නැහැ. බොහෝ පිරිස් දවස ගෙවන්නේ යම් පීඩාකාරී මානසික මට්ටම් මතයි. ඉතින් අපට හිතුණා 2021 සිංහල අවුරුදු උත්සවය සමග එළඹෙන අලුත් වසර නිදුක්, නීරෝගී දවස ගෙවන්නට හැකි සෞභාග්‍යමත් සමයක් උදාවේවා… සියලු දුක් කරදර අවම වේවාය කියන සුබ ප්‍රාර්ථනය මත මෙවැන්නක් නිර්මාණය කරන්න. ගීතයක් ලෙස සුන්දරව එය ප්‍රේක්‍ෂකයන් අතරට ගෙන ආවොත් එය ඔවුනගේ හිතට දැනේවි කියන සිතුවිල්ල අප හැමෝටම දැනුණා.., අනෙක මෙය කලාවට හිතැති පවුල් දෙකක් එක්ව කළ සොඳුරු මෙහෙවරක්.
🔴 ‘සාරංග ඩිනක්ෂි ඔන්ලයින් යූ-ටියුබ් චැනලය’ මගින් විතරද මෙය ප්‍රේක්‍ෂකයන්ට නරඹන්නට ලැබෙන්නේ?
අපොයි නැහැ.., එහෙම කරන එක අසාධාරණයි නේද..? ඒ නිසාම අපි හැමෝගෙම මනාපය තුළ මේ ගීතය රූපවාහිනී චැනල් සහ ගුවන්විදුලි සේවාවන් ඔස්සේද විකාශනය වීමට සැලසුම් කරලා තියෙනවා. ‘2021 වසර සමග සාමය, සෞභාග්‍යය රටට උදාවේවා’ කියන තේමාවෙනුයි එය නම්කර තිබෙන්නේ.
🔴 කළඑළි දැක්ම අප්‍රේල් මස 13 හෝ 14ද සාරංග..?
බොහෝ විට මේ ‘මව්රට’ මුද්‍රණයත් සමගම වාගේ එය කළඑළි දකීවි. අප්‍රේල් 11 හෝ 12 තමයි ගීතය දොරට වඩින්නේ. අලංකාර රූප රාමු සමග සුන්දර වචන එකතුවකින් කළ මේ නිර්මාණය ගැන අපි හැමෝම ඉන්නේ විශාල තෘප්තියකින්. ඒ තෘප්තිය මැද කළ මෙහෙවරට ප්‍රේක්‍ෂකයා සතුටින් ප්‍රතිචාර දක්වතැයි යන බලාපොරොත්තුව තුළ තමයි මම ඩිනක්ෂි ඇතුළුව ප්‍රියසාද් පවුලේ හැමෝම මේ දිනවල කාලය ගෙවන්නේ.
🔴 ‘සාරංග ඩිනක්ෂි ඔන්ලයින් යූ-ටියුබ් චැනලය’ නිසා ඔබ රංගනයෙන් ඈත් වෙයිද?
ඒ තරම් ලෙහෙසියෙන් ‘සාරංග දිසාසේකර’ කියන රංගනවේදියාගෙන් මට ගැලවෙන්න ලැබෙන එකක් නැහැ. ඔහු දැන් මගේ ජීවිතය සමග නිදන්ගතවී හමාරයි. ඒ නිදන්ගත වීමට මමද ඉතා ඇලුම් කරනවා.
🔴 දෙවැනි නිෂ්පාදනයට සූදානම්ය කියන කසුකුසුවක් තියෙනවා ඔබ ගැන?
ඒ කසුකුසුව හරියටම හරි නැහැ. මොකද..? තවම මා සොයන කතා වස්තුව මට හොයා ගන්න බැරි වුණා.
🔴 ‘ලංසුපතිනියෝ’ වැනි කතා වස්තුවක්ද ඔබ සොයා යන්නේ?
‘ලංසුපතිනියෝ’ ප්‍රේක්‍ෂකයන් ඉතාම සතුටින් බාරගත් ටෙලියක්. එවැනිම නොවුණත් වෙනස් තාලයක කතා වස්තුවක් තමයි සොයන්නට වෙහෙසෙන්නේ.
🔴 චරිත අතරත් ඔබ දැන් යම් වෙනසක් හොයනවා?
කොහොමටත් මම දැන් බාර ගන්නෙ සහ මට ලැබෙන්නේ එකිනෙකට තරමක් හෝ වෙනස් චරිතයක් තමයි. ‘අග්නි පියාපත්’ හි ‘පාතාල ලොක්කා’ සහ ‘අකුරු මැකී නෑ’ හී සංවේදී ගුරුවරයා එයට හොඳ නිදසුනක්.
ඒ වාගෙම යෞවනයන් ලෙස කලෙක රංගනයට පැමිණි අප… වයසින් මුහුකුරා යන විට ප්‍රේක්‍ෂකයන් අපෙන් යම් වෙනස් දේ බලාපොරොත්තු වෙනවා. ඒ වෙනස අනිවාර්යයෙන්ම අපට ඔවුනට දිය යුතුයි.
දමයන්ති රේණුකා ප්‍රනාන්දු