රූපවාහිනී චැනල් අඩු ගාණට විකාර විකුණනවා

මහාතලා හටන, චක්‍රායුධය යන ටෙලි නාට්‍ය කර්මාන්තයට එළියක් ගෙන දුන් තවත් දැවැන්ත නිර්මාණ කිහිපයක්. ඉතින් පසුගියදා අපට ආරංචි වුණා මේ ටෙලි නාට්‍ය නිර්මාණය කළ අනුර මාධව ජයසේකර අසනීප වී සිටින බව. ඉතින් හොඳ ජවයක් තිබුණු මේ දැවැන්තයාට මොකද වුණේ කියලා දැනගැනීමට අපි ඔහුට කතා කළා.
අනුර හදිසියේම මොකද වුණේ?
හෘදවස්තුවේ පීඩනයක් ඇතිවෙලා. සතියක් විතර ප්‍රතිකාර කරන්න සිද්ධ වුණා. දැන්නම් විවේකීව ගෙදරට වෙලා ඉන්නවා. ටික කාලයක් විවේකීව ඉන්න කියලා වෛද්‍යවරු උපදෙස් දුන්නා.
පසුගිය දවස්වල බරටම වැඩද ඒ කියන්නේ?
අපෝ නැහැ. වැඩ නැති එක ගැන හිතලා මානසිකව වැටුණා. ඒ විතරක් නෙවේ කරපු නාට්‍ය විකාශය නොවනකොටත් ප්‍රශ්න. මොකද අපි ජීවත් වෙන්නේ මේ නිර්මාණ කරලා තමයි. ඉතින් ආර්ථික ප්‍රශ්න එනකොට දහසක් ප්‍රශ්න මතුවෙනවා. ඒවා හිතන කොට ලෙඩ වෙනවා. මට විතරක් නෙවේ ගොඩාක් නිර්මාණකරුවන්ට මේ ප්‍රශ්නය බලපානවා.
“ඔය දොර අරින්න” ටෙලි නාට්‍යයටත් තවම දොර විවර වුණේ නැහැ නේද?
දොර විවරවෙලා නැවත දොර වැහුණා. මමත් මඟ බලාගෙන ඉන්නේ කවද්ද විකාශය වෙන්නේ කියලා. දැන් ඉතින් නිර්මාණවලට දේශපාලන බලපෑම එල්ලවෙන නිසා සමහර ඒවා කතුරට හසුවෙනවා. ඒ වෙලාවට නිර්මාණකරුවන්, නිෂ්පාදකවරු අසරණ වෙනවා. ඔය දොර අරින්න ළඟදීම විකාශය වෙයි කියලා මම හිතනවා ස්වාධීන රූපවාහිනියේ.
නිර්මාණ දේශපාලනයට කඬේ යනවා කියන්නේ ඇත්තද?
දැන් කොතැනත් දේශපාලන බලපෑම්. රූපවාහිනියෙත් නිර්මාණ කරන්න දෙන්නෙ තෝරාගත්ත පිරිසකට විතරයි. සමහර අයට ටෙලි නාට්‍ය විකාශය වෙන්නත් කලින් ගාන නියම කරලා ඉවරයි. ඉතින් මේ හැම දෙයක් පිටුපසම තියෙන්නේ දේශපාලන තල්ලු තමයි.
දේශපාලනයට යටවුණු නිර්මාණවල හරයක් නැති බවයි අපට හිතෙන්නේ?
ඉස්සර ජාතික රූපවාහිනිය වුණත් ටෙලි නාට්‍යවල ගුණාත්මක බව බැලුවා. හොඳ තෝරා ගැනීම් කමිටුවක් යටතේ තමයි ටෙලි නාට්‍යය විකාශය වුණේ. දැන් සිද්ධ වෙන්නේ අධ්‍යක්‍ෂවරු තෝරාගෙන නාලිකාවලට අවශ්‍ය විදියට නිර්මාණ කරනවා. නාලිකාවලින් නිර්මාණ කරන්න කතා කළත් ඔවුන්ගේ බජට්වලට නිර්මාණ කරන්න බැහැ දැන්. අපේ බජට්වලට නාලිකාවලින් කැමැති නැහැ නිර්මාණ කරන්න. අඩු ගානකට විකාර නිර්මාණ විකුණනවා. ඔය හේතූන් නිසා ක්‍ෂේත්‍රයේ වැඩ කරපු හොඳ පිරිසක් දැන් නිහඬවෙලා ඉන්නේ.
සද්දබද්ද නැතුව හිටියාම තවත් ප්‍රශ්න. අදහසක් නැතිද නිර්මාණ නැවත කරන්න?
නිර්මාණ කරන්න අදහසක් තියෙනවා. දැනටමත් පිටපත ලියලා ඉවරයි. හිටිය නිෂ්පාදකවරු පවා අහිමි වෙලා ගියා මේ දේශපාලන මංකොල්ලය නිසා. මොකද මට බැහැ නිෂ්පාදකවරු අමාරුවේ දාන්න. හොඳ වාතාවරණයක්, හොඳ පරිසරයක් ලැබුණු සැණින් මම නැවත නිර්මාණ කරනවා.
ඔබට තිබෙන්නේ ටෙලි නාට්‍යවල ප්‍රශ්නනේ. වෙනසකටත් එක්ක චිත්‍රපටයක් කළොත් නරකද?
මාසෙකට චිත්‍රපට දෙකක් විතර එළියට එනවා. හැබැයි සතියෙන් දෙකෙන් ගැලවෙනවා. ඉතින් ප්‍රේක්‍ෂකයා ඇලුම්කරන, සිනමා ශාලාවට ගෙන්නගන්න පුළුවන් හොඳ නිර්මාණයක් කරන්න වෙනවා. ටෙලි නාට්‍යයක් කොහොම හරි විකාශය කරගන්න පුළුවන්. චිත්‍රපටයක් වගේ ලොකු බැරෑරුම්කමක් නැහැ.
වසන්ත විතාරණගේ