වාස්තුව ජීවිතය වෙනස් කරන හැටි

විශාල මුදලක් වැය කර මහන්සියෙන් ගොඩනඟා ගත් නිවෙසක් තුළ ජීවත් වීමේ භාග්‍ය නැති වේ නම් කළයුත්තේ කුමක්ද? අද බොහෝ නිවාස වාස්තු දෝෂවලින් පිරී ඇත. දොරටු, ජනේල, යටලී, උළුවහු ජනේල, වහල පිරිද්දුම්, වැසිකිළි සහ කැසිකිළි දෝෂ වැනි අති විශාල වාස්තු දෝෂවලින් පිරී ඉතිරී ගිය නිවාස තුළ ජීවත්වීම කායික, මානසිකව පිරිහීමකි. ගෙයින් පිට සිටිනතෙක් යහපත් නමුත් ගේ ඇතුළට ආවිට දැනෙන්නේ අපායක් ලෙසටය. එවැනි මහා අවාසනාවන්ත රෝගී නිවෙසක ජීවත් වෙනවාට වඩා සැනසිලිමත්ව ජීවත් වීමට ඉඩකඩ පෑදේ නම් කොතරම් වාසනාවක්ද?

නිවාස දෝෂ ගැන එතරම් තැකීමක් නැතිව සිටින විට එය නිවැරැදි කර ගැනීමට ලැබුණහොත් කොතරම් අගේද යන්න දැන් ඔබට පැහැදිලි වෙයි.
ගෙය ගෙදරක් වන්නේ බිරියගෙනි. බිරියගේ ආලකමන්දාව මුළුතැන්ගෙයයි. එය දෝෂ නැතිව තබා ගැනීම අනිවාර්ය වේ.

කුස්සිය මෙන්ම නිවෙසේ බ්‍රහ්ම පාදය අවහිර නොකර නිදහසේ තැබීම සුබයි. විහාර, දේවාල ඉදිකිරීමේ දී බ්‍රහ්මපාදය සුබයි. එසේ නම් නිවෙසේ බ්‍රහ්මපාදය පෑගෙන, අවහිර වන තැනට පත්කිරීම යෝග්‍ය නොවේ. අනපේක්‍ෂිත අන්දමට කරදර වැඩි වේ.

එපමණක් නොව විවාහය, රැකියාව, පවුල් දිවිය, දරුවන්ගේ අධ්‍යාපනය වෙළෙඳ ව්‍යාපාර කටයුතු දියුණුකර ගැනීමට මහා වාස්තුවක් නිවෙසට අයත් විය යුතුයි.

සමහර නිවාස තුළ වැසිකිළිය මධ්‍ය ලක්‍ෂ්‍යයට හසුවී තිබේ. එපමණක් නොව නිදන කාමර පවා එයට ගොනුවී ඇත. බිත්තිවලින් හා අත්තිවාරම්වලින්ද තෙරපී ඇත.

ඇඳ තබා ඒ මත නිදාගන්නා තැන්ද අප දැක ඇත. විශේෂයෙන්ම තරුණියක් බ්‍රහ්මපාදය මත ඇඳ තබා නිදන්නේ නම් ඇගේ ශරීර සෞඛ්‍යයත්, අධ්‍යාපනයත්, විවාහයත් කඩාබිඳ වැටේ. මේ අතර, ලිංගිකත්වයේ ගැටලුද පැනනඟී. ජීවිතයේ අරමුණු සියල්ල කඩාවැටේ. වාස්තු දෝෂ නිසා මුළු ජීවිතයම හිස්බවට පත්වන බැව් ඇත්තකි.

ඉඩමක විකර්ණ රේඛා වැඩි දෙනෙක් දන්නා ගිනිකතුර කැපෙන තැන බ්‍රහ්ම පාදය වේ. ගෙය දිග අඩි 40ක් නම් එක කොටසක් හතරෙන් බෙදූ විට වන්නේ අඩි 10කි. පළල විස්සක් නම් අඩි 5කි. මෙහි හරි මැද බ්‍රහ්මපාදය හෙවත් මධ්‍ය ලක්‍ෂ්‍යය වේ. මධ්‍ය ලක්‍ෂ්‍යය වැසිකිළිය හා නාන කාමරයකට මැදි වීම ඉතාම අසුබයි. සාලයේ මැදට අසුවී ඇත්නම් එතැන මල්පෝච්චියක්, දැව භාණ්ඩයක් තිබීම යහපත්ය. බිම් මහල පමණක් නම් වහලය පලදෙක හෝ හතරක් වේ නම් මුදුන් යටලීය හරි මැද තිවුල් පූට්ටුවද, පලදෙකේ වහලයක් නම් මුදුන් හෝ මැද යට ලීයක් එහි පූට්ටුවකටත් හසුවන ලෙසට බ්‍රහ්ම පාදය තිබීම මහා වාස්තු දෝෂයකි. නිවෙසේ තවද වාස්තු දෝෂ දරුවන්ගේ අධ්‍යාපනයට, විවාහයට, රැකියාවට මෙන්ම මූල්‍ය මුදල් ලැබීමට එකසේ බලපෑම් ඇති වේ. සමහර විට රැකියාවේ කරදර, ප්‍රශ්න පැනනඟී. වැඩ තහනම් වීම හෝ රැකියාව අහිමි වීමද සිදුවේ. ආදායම් මාර්ගවලට පහර වදී. නිවෙසට ගෙන එන මුදල් අනපේක්‍ෂිත අන්දමට වැය වෙයි. ආදායමට වඩා වියදම අධික වනු ඇත. නිතර ගේ ඇතුළත කායික, මානසික සතුට නැති වී කලකෝලාහල, අඬදබර ඇති විය හැකිය. අඹු-සැමියන් අතර අසමඟිය ඇති වී සමහරවිට දික්කසාදය පවා සිදුවේ.

ගේ තුළ සිටින අය නිරන්තරයෙන්ම රෝගීන් වන අතර නිදන්ගත රෝගීන් ඇති වේ.
එවැනි දෙයට මුදල් වැය වීම නිසා මුදල් කරදර පැනනඟී. දැව, ගඩොල්, මැටි, සිමෙන්ති, කොන්ක්‍රීට්, පයිබර් වැනි මෙවලම්වලින් ජීවිතයට බලපානු ඇද්ද යන්න කෙනකුට තර්ක කළ හැකිය. තර්කයට වඩා අපේ පියවි ඇසට නොපෙනෙන යම් යම් සැඟවුණු දේ අපමණය.
නිවෙසක වාස්තු දෝෂ විශාල සංඛ්‍යාවක් වැඩිවිය හැකි වන්නේ නියමිත ප්‍රමිතියකට ගොඩනොගැනීම නිසාය. ජන්ම නැතැකට සම්පත් මෛත්‍රී පරම මෛත්‍රි ගණයට අයත් වීම අනිවාර්ය වේ. සමහර වර්ගීකරණවල නිවෙසේ ආයුෂ ප්‍රමාණය අවුරුදු 8ක් හෝ 20ක් විය හැකිය. අයට වඩා වැය වැඩි වෙයි. සමහර නිවාසවලට දෛනිකව ගෙන එන මුදල් කිසිම අයුරකින් ඉතිරිකර ගැනීමට නොහැකි වෙයි. බලාපොරොත්තු නැති අන්දමට මුදල්වලට වූ දෙය ගැන ළතවීමට සිදුවෙයි.

ඔබේ නිවෙසේ ඉහත පරිදි දෝෂ ඇත්නම් එය නිදොස් කර ගන්න. රෝගී නිවෙසක්ද තුළ ජීවත් වීම ඔබේ පවුල් ඒකකයට විශාල අවාසියක් වෙයි. එක දිනක්වත් සතුටින්, සාමයෙන් ඔබ වාසය කරන නිවෙස තුළ ජීවත් වීමට නොහැකි වෙයි නම් එම නිවෙස වාස්තු දෝෂවලින් පීඩාවට පත්වී ඇති බැව් පැහැදිලිය. වසර 50ක නිවාස පරීක්‍ෂා මගින් එකී නිවාස කඩාබිඳ දැමීමකින් තොරව නිවැරැදි කර ගැනීමට හැකි බැව් ප්‍රකාශ කර සිටිමු. වාස්තු විiාව තුළ ඒකරාශී වී ඇති තොරතුරු අති විශාලය. අපි ඒ ගැන ඉදිරි කාලය තුළ කතාබහ කරමු.
ජ්‍යොතිෂවේදී ටී. හෙන්රි බෙම්මුල්ල