⬤ ගමේ ඉඳලා ගොඩයන්න බෑ…
මවකගේ හෝ පියකුගේ එකම සිහිනය තම දරුවන් රැකගෙන ඔවුන්ට හරිමඟ පෙන්වා දෙමින් ඔවුන්ව රටේ යහපත් පුරවැසියන් කිරීමයි. කුඩා කලම හසරැලිට මව් සෙනෙහස අහිමි වුණත් ඇයට මවගේ ආදරයත්, පියාගේ ආදරයත්, ලබා දුන්නේ ඇයගේ පියාය. ඔහු හසිත ලෙස මෙලෙස හඳුන්වන අතර, හසිත තම සිඟිති දරුවාට දක්වන ආදරය සෙනෙහස වගේම ඔහුගේ තිබෙන සංවේදීකමට ප්රේක්ෂක ජනතාව ආදරය කළා. ඉතින් ඔහුගේ කැදැල්ලට මතු දිනයක මොනවගේ දෙයක් උදාවේවිද කියා අපට තවම සිතාගත නොහැකි අතර, ඔබ මෙතෙක් ඒ ආදරය කළ හසිත, සුනෙත් ශාන්ත ලෙස හඳුන්වන්නම්. ඔහු ජාතික පුවත්පතකට කාලෙකට පස්සේ කතා බහා කළා.
🔴 සුනෙත් මොනරාගලින් කොළඹට ආවේ නළුවෙක් වෙන්න හිතාගෙනමද?
ළමා කාලයේ ඉඳලම මගේ තිබුණු එකම සිහිනය නළුවෙක් වෙන එක තමයි. පාසලේ, දහම් පාසලේ මගේ දක්ෂතාවයන් වේදිකාවේ පෙන්නුවා. ඉතින් මගේ හැකියාවට ගොඩදෙනෙක් ප්රශංසා කළා. රංගනය පැත්තෙන් යන්නනම් ගමේ ඉඳලා හරියන් නැහැ කියලා මට හිතුණා. ඉතින් මම හිතුවා හැදෑරීමක් කරලා මේ ක්ෂේත්රයට සම්බන්ධ වෙන්න ඕනෑ කියලා. ඒ නිසා මම ජනකලා කේන්ද්රයේ රංගනය පිළිබඳව හැදෑරීමක් කළා එයින් මට ගොඩාක් දේවල් ඉගෙන ගන්න ලැබුණා. ඊට පස්සේ මම ජනකරළියට සම්බන්ධ වෙලා අවුරුදු ගණනාවක් වැඩ කළා.
🔴 ඔබ ඒ ගත්ත පන්නරයත් එක්ක වේදිකාවේ හොඳම නළුවා බවට පත්වීම ගැන මොකද හිතන්නේ?
වේදිකාව එක්ක තමයි මගේ ජීවිතය ගෙවුණේ. ඉතාමත් කෙටි කාලයක් තුළ 2013 යෞවන සම්මාන රාත්රියේ ‘පෝරිසාදයා’ වේදිකා නාට්යයේ රඟපාල මම හොඳම නළුවාට සම්මාන ගත්තා. ඉන්පසු මම වේදිකා නාට්ය ගණනාවක චරිත නිරූපණය කළා.
🔴 ටෙලිනාට්ය මතකය අවදි කළොත් සුනෙත්?
මගේ පළමු ටෙලිනාට්ය තමයි රොෂාන් කුරුප්පු අධ්යක්ෂණය කළ ‘විහඟ ගීතය’ ටෙලිනාට්යය. ඉන්පසු ටිකිරි රත්නායකගේ දෝන කැතිරිනා, සකල ගුරු ටෙලිනාට්ය සඳහා මම චරිත නිරූපණය කළා.
🔴 හැබැයි ඔබව ගොඩදෙනෙක් දැනහඳුන ගන්නේ බස් එකේ ඉස්කෝලේ හරහා?
වර්තමානයේදී මාව කතාබහට ලක්වුණේ බස් එකේ ස්කෝලේ ටෙලිනාට්යයේ හසිතගේ චරිතයෙන්. ඒ චරිතය හරහා මම ගොඩාක් ජනප්රිය වුණු බව ඇත්ත. හසිත පිළිබඳව ගොඩදෙනෙක් හොයන්නට පටන්ගත්තේ හසිත ඒ තරමට සංවේදී චරිතයක් බවට පත්වුණු නිසා. හසිතලා වගේ තාත්තලා අප සමාජයේ කොච්චරනම් ඉන්නවද. ඒ චරිතය මට ගොඩාක්ම තදින්ම දැනුණා.
🔴 හසිත ඔබේ ජීවිතයට එතරම් සමීප වීමට හේතුව?
මම තාත්තා කෙනෙක් නොවුණත් ඒ චරිතයේ සංවේදීකමට ගොඩාක් ආදරය කළා. ඒ නිසාම මට ඒ චරිතය කරන්න පහසුවක් වුණා. ඒ වගේම ඒ පුංචි දුවගේ තිබුණු අහිංසකත්වයත් මගේ චරිතයට බලපෑවා. අද සමාජය ගොඩදෙනෙක් තමන්ගේ කියලා හිතන ආකල්පයෙන් තමයි ජීවත් වෙන්නේ. අනෙකුත් අසරණ දරුවන්ටත් තාත්තා කෙනෙක් වෙලා පිහිටක් වෙනවා නම් මේ පුංචි රට මොනතරම් ලස්සන වෙයිද?
🔴 ඔබ එක පැත්තකින් සංවේදී වෙන විට තවත් පැත්තකින් කුහක, පටු අදහස් තිබෙන කෙනෙක් බවට පත්වෙන බවක් අපි දකිනවා?
එක චරිතයකින් තවත් පැත්තකට විසිවීමත් වාසනාවක් වගේම එය තුළින් අත්දැකීම් රාශියක් ඒකරාශී කරගන්න පුළුවන්. ‘ගමනේයා’ ටෙලිනාට්ය හරහා මම එවැනි චරිතයක් තමයි නිරූපණය කරන්නේ. මුදල මත යැපෙමින්, කුහක පටු අදහස් තිබෙන චරිතයක් ඒක. චරිත දෙක තුළින් එතකොට විනිවිද බවක් පෙනෙනවා. කොටුවීමක් නැහැ.
🔴 ඔබ මේ ආපු ගමනත් එක්ක ආපසු හැරී බැලුවොත් මොකද හිතෙන්නේ?
මගේ ජීවිතයේ තිබුණු එකම සිහිනය තමයි මේ. මම එක රැයකින් ජනප්රිය වුණු නළුවෙක් නෙවේ. ගොඩාක් අගහිඟකම් මැද මගේ අරමුණට ආපු එක ගැන මම සතුටු වෙනවා. මම තවම මේ ක්ෂේත්රයට බීජයක් විතරයි. ඉතින් ඒ බීජය නොමරා වැඩෙන්න උදව් කරපු හැමෝටම මම හදවතින්ම ස්තුතිය පුදකරනවා. මොකද ඔවුන් නැතිනම් තවමත් හති දාගෙන කලාව හොයනවා.
වසන්ත විතාරණගේ
