යාළුවෙන්න කලින් සිකුරු කොහෙද බලන්න

මිථුනයේ සිටින සිකුරු රාගයට තැන දෙයි

සිකුරු මීනයේ නම් දෛවයේ සරදම්

ආදර සම්බන්ධයක් පටන් ගන්නකොටම ඔහු හෝ ඇය ගැන කිසිවක් හරියටම නොදැන ඉන්න පුළුවන්. හැබැයි එහෙම ආදර සම්බන්ධ පටන් අරගෙන දුකට පත්වෙච්ච පිරිස නම් සුළුපටු නැහැ. මොකද ටික කාලයක් ආදරය කරලා අමතක කළොත් එයින් ලැබෙන්නේ සිත් වේදනාවක්. අනෙක් අතට සමහර අයගෙ ආදරේත් වංචනිකයි. ඉතින් මේ තත්ත්වය මත ආදරය කිරීමත් පහසු නැහැ. හැබැයි ඔබට පුළුවන් නම් ඔහුගේ, ඇයගේ කේන්දරයේ සිකුරු සිටින තැන දැනගන්න පහත විස්තරයෙන් ඔබට එය ගැන මැන ගන්න පහසු වේවි. මේ කටයුත්ත සඳහා සිකුරු පිහිටන රාශිය හඳුනා ගන්නා ආකාරයද අප දැනසිටිය යුතුය. ඒ සඳහා අදාළ කේන්දරයේ ‘ශු’ අකුර සටහන් කර ඇත්තේ කීවැනි කොටුවේදැයි බලන්න. ඉන්පසු අදාළ අයගේ ලග්නය පළමුවැනි කොටුවේ ඇතැයි සිතා පිළිවෙළට වම් පැත්තට ලග්න තබමින් ‘ශු’ අකුර ඇති කොටුවට කුමන ලග්නය එන්නේදැයි බලන්න. එවිට ලැබෙන ලග්නය එම ලග්න හිමියාගේ සිකුරු හිමි රාශිය ලෙස සැලකේ. ඒ අනුව අදාළ රාශියට හිමි ගතිගුණ පහත පරිදි වේ.
මේෂ
මේ අයත් සමඟ සාර්ථක ප්‍රේම සම්බන්ධයක් ගොඩනගා ගත හැකි අතර ඍජු ප්‍රතිපත්ති ඇති යුක්තිගරුක තරුණියක හෝ තරුණයකු වෙයි. විවාහයට බාධක කරදර පැනනඟිනු ඇත. එහෙත් ඒ සියල්ල ජයගන්නාතුරු මේ අය නොසැලී ආදරය කරයි. විවාහයද සාර්ථක වේ.
වෘෂභ
මේ අයගේ ආදරය පිවිතුරුය. අවංක කෙනෙක් විවාහයට ප්‍රථම රාගය ඉස්සර කර නොගනී. නිතර නිතර හමුවී කතාබස් කිරීමට සිහින දකී. කිසිවකුගෙන් වචනයක් ඇසීමට ප්‍රිය කරන්නේ නැති අවංක අයෙකි.
මිථුන
මේ අය රාගයට වැඩි නැඹුරුතාවයක් දක්වයි. ප්‍රේම සබඳතා කිහිපයක්ම පවත්වාගෙන යෑමට සමත් වෙයි. කිසිදු අවස්ථාවක සිය රහස් හෙළි නොකර සිටීමේ දක්ෂයන්ය.
කටක
දුටු දුටු අයට ආදරය කරන්නට පෙළඹෙන නිසා විශ්වාස කළ නොහැකි අයෙකි. මේ අයට ආදරය කිරීම විනෝදාංශයකි. කිසිම අවස්ථාවක ආදරය කරන අයගේ වචනයට ගරු නොකරයි.
සිංහ
මේ අයට ගැළපීම නොගැළපීම ගැන අවබෝධයක් නැත. සිතන ඕනෑම කෙනකුට ආදරය කරයි. එහෙත් ආදරය අවංක වෙයි. තමාට ගැළපෙන්නේ කවුද යන්න සොයනවාට වඩා තමාට ආදරේ කවුද යන්න සොයා බලයි.
කන්‍යා
මේ අය කෙනකුට ආදරය කරයි. තවත් කෙනෙක් සමඟ විවාහ වෙයි. ආදරය කරන අයගෙන් උදව් උපකාර ගෙන අමතක කර දමයි. එසේම ආදරය නිසාම නින්දා අපහාස උරුම කරගන්නා අයෙකි.
තුලා
මේ අය කිසිම අවස්ථාවක තමාට ආදරය කරන්නා රවටන්නට නොසිතයි. ආදරය පවිත්‍ර සම්පතක් යැයි සිතා කටයුතු කරයි. අවසානයේ ආදරය ජයගන්නා අතර අන් කිසිවකට ආදරය පාවා නොදෙයි.
වෘශ්චික
ආදරයට සමගාමීව රාගයද පවත්වා ගතයුතු යැයි සිතයි. විවාහයට පෙර සිටම ආදරය කරන අය සමඟ කායික සබඳතා ගොඩනඟා ගනී. නන්නාඳුනන අයකු සමගින් වුවද ආදරයෙන් සහ රාගයෙන් බැඳෙන්නට පසුබට නොවේ.
ධනු
මේ අයට ආදරය විහිළුවකි. කිහිපදෙනකුට එකවර ආදරය කරයි. එක් අයකුට පමණක් ආදරය කර සෑහීමකට පත්නොවන්නේය. අවංක ආදරයක් මේ අය තුළ තිබෙනවාද යන්න ගැටලුසහගතය. අනියම් සබඳතාද තිබිය හැක.
මකර
මේ අයට ආදරය පවත්වාගෙන යෑමේ හැකියාවක් නැත. නිතරම අදහස් වෙනස් කරයි. සුළු කාලයකදී ආදරය කරන්නන් මාරු කරයි. විවිධ වූ ලාභ ප්‍රයෝජන ලබාගන්නා අදහසින් ආදර සබඳතා පටන්ගනී.
කුම්භ
මේ අය දුරදිග සිතා බලා ආදරය කරන්නන්ය. බියකින් තොරව ආදරය කළ හැක. එසේම ආදරය ප්‍රකාශ කරන්නේ දුරදිග සිතාබලා ඉන් අනතුරුවය. දීර්ඝකාලීන ආදරයකින් පසු විවාහය බලාපොරොත්තු වේ.
මීන
මේ අයගේ ප්‍රථම ආදරය සාර්ථක නොවන අතර දෙවන හෝ තෙවන ආදරය විවාහයකින් කෙළවර වෙයි. එහෙත් චපල සිතක් මේ අයට නොපිහිටයි. කිසිවකු රැවටීමට කැමැති නැත. ආදරය නිසා නින්දා අපහාස විඳින්නට වුවද සූදානම් අයෙකි.
ජ්‍යොතිෂවේදී සත්‍යජිත් සම්පත්