ගිරිකුළ ටෙලිනාට්ය කොච්චර බැලුවත් එපා වෙන්නෙ නැති ටෙලිනාට්යයක්…
මුතුමැණිකා කියන්නෙ යකඩ ගැහැනියක්…
ලංකාවේ බිහිවන ගුණාත්මක නිර්මාණ තුළ විශිෂ්ට රංගන ශිල්පීන්ගේ අඩුවක් අපි දකිනවා. මේ දිනවල විකාශය වන ගිරිකුළ ටෙලිනාට්යයත් ඒ ගුණාත්මක නිර්මාණ අතර විශිෂ්ට නිර්මාණයක් ලෙසට හඳුන්වන්න පුළුවන්. ගිරිකුළ ටෙලිනාට්යයේ මුතුමැණිකා ලෙසට විශිෂ්ට රංගනයක නියැළුණු කාංචනා මෙන්ඩිස් ඔබට මතකද? ඇය මේ වෙද්දි විදේශීය රටක ජීවත් වුණත් ඇගේ ඒ විශිෂ්ට රංගනය ගැන කතා කරන්න අපි ඇයව සම්බන්ධ කරගත්තා.
ඉතින් කියමුකො ඔබගේ අලුත් තොරතුරු?
මම එංගලන්තයේ පදිංචි වෙලා ඉන්න බව මගේ ආදරණීය රසික රසිකාවියන් දන්නවා. මේ කොරෝනා වසංගතයට මුළු රටේම ජනතාවට මුහුණදෙන්න සිදුවෙලා. ඉතින් ඒ කරුණු කාරණා සියල්ල සමඟ දැඩි ආරක්ෂාකාරීව අපිත් සතුටින් ජීවත් වෙනවා.
ඔබ ගිරිගුළ ටෙලිනාට්යයේ මුතුමැණිකා ලෙසට සුවිශේෂී රංගනයක යෙදෙනවා. දැන් ඔබේ ආදරණීය ප්රේක්ෂකයන් නැවැත ඔබ ගැන කතා වෙනවා?
ගිරිකුළ ටෙලිනාට්ය කොච්චර බැලුවත් එපා වෙන්නැති ටෙලි නාට්යයක්. මුතුමැණිකා කියන්නේ යකඩ ගැහැනියක්. හරියටම කිව්වොත් මගේ අම්මා වගේ. ඉතින් ගිරිකුළ බලන්න බැරිවුණ අලුත් පරම්පරාවට අලුත් අත්දැකීමක් වෙයි. ගිරිකුළ ටෙලිනාට්ය තමයි මම අවසානයට රඟපෑවේ. ඒ කාල වකවානුවේ තමයි මට දූව ලැබෙන්න හිටියේ. එම වේදනාවන් අමතක කරමින් මම මුතුමැණිකාට උපරිම සාධාරණයක් කිරීමට උත්සාහ කළා.
ඔබ ඒ කළ සාධාරණයට ඔබටත් සාධාරණයක් ඉටුවුණා නේද?
ඔව්. රාජ්ය ටෙලි සම්මාන උළෙලේ හොඳම නිළියට මුතුමැණිකා රංගනය වෙනුවෙන් සම්මාන ලැබුණා. ඒ සුන්දර දවසේ මට සියලුදෙනා සමඟ සතුට බෙදාගන්න බැරි වුණා. ඒ වෙනකොටත් මම විදේශගත වෙලා හිටියේ. මගේ අක්කා තමයි ඒ සම්මානය ගත්තේ.
කලාව මතක් වෙනකොට ආපහු ලංකාවට එන්න හිතෙන්නෙ නැද්ද?
කලාව මට මගේ දෙවියන් වහන්සේ දුන්න දායාදයක්. කලාව මගේ ශරීරයේ දුවන එක නහරයක් වගේ. කලාව කවදාවත් මට අමතක කරන්න බැහැ. කලාව මතක් වෙනවා මට හැමතිස්සෙම. ඉඩකඩ ලැබෙන හැම මොහොතකම ලංකාවේ සිදුවෙන නිර්මාණ මමත් මගේ පවුලේ අයත් රසවිඳිනවා.
වර්තමානයේ නිර්මාණ තුළ කිසිම ගුණාත්මක බවක් නැති බව බොහෝදෙනා චෝදනා නඟනවා. එය ගැන ඔබටත් යමක් කිව හැකිද?
දැන් තිබෙන නිර්මාණ වෙළෙඳාමක් වෙලා. එහි කිසිම හරයක් නැති බව මමත් දකිනවා. ඒ අතර මම කියූ පරිදි සුවිශේෂී විශිෂ්ට නිර්මාණ බිහිවෙනවා. අද බිහිවෙන මෙගා ටෙලිනාට්යවල හරිහමන් පිටපතක් නැහැ. එවලෙට කතා හදලා දෙනවා කියලා මටත් ආරංචියි. ඔය අතර හඬකැවීම් කරපු විදේශීය ටෙලිනාට්ය විකාශය වෙනවා. මම කියන්නේ විදේශීය ටෙලිනාට්යවලට වැය කරන කාලය හරි අපේ නිර්මාණකරුවන්ගේ නිර්මාණවලට හරි ඉඩකඩ දෙන්න කියලා. හොඳ නිර්මාණකරුවන් දැන් පැත්තකට වෙලා ඉන්න බව මමත් දකිනවා. ඔවුන්ට එහෙම ඉන්න දෙන්න එපා එය අපරාධයක්. අලුත් පරම්පරාවක් හදන්න ඒ විශිෂ්ට නිර්මාණකරුවන්ගේ දක්ෂතාවය පෙන්විය යුතුයි. අකාලයේ මැකිල යන්න දෙන්න හොඳ නෑ.
ඔබ විශිෂ්ට කලා ශිල්පිනියක්. ඇයි ඔබ කලාවෙන් දුරස් වෙලා?
මම කලාවෙන් සමුගෙන නැහැ. ගොඩක් විශිෂ්ට ශිල්පීන් කලාවෙන් ඈත්වීමට මේ මෙගා ටෙලිනාට්ය හේතුවෙන්න ඇති. හොඳ නිර්මාණවලට සම්බන්ධ වෙන්න මම කැමැතියි. හොඳ සිනමා නිර්මාණයකට මට ආරාධනාවක් ලැබුණා. රටේ මේ තිබෙන ප්රශ්නත් ඉවර වුණාම මම ලංකාවට එනවා.
වසන්ත විතාරණගේ
