රඟපෑම පැත්තකට තියලා සංගීතයට බැස්ස අඹයාළුවෝ අශේන්

අශේන් මංජුල කිව්ව ගමන් අදටත් අපිට මතක් වෙන්නේ අඹ යහළුවෝ ටෙලි නාට්‍යය. අඹ යහළුවෝ හරහා අශේන්ට ලැබුණු ජනප්‍රියත්වය අදටත් අඩුවක් නැහැ. වර්තමානය වෙද්දී අශේන් කලාවේ විවිධ ඉසව් හඹා යන දක්ෂ අධ්‍යක්ෂවරයෙක්. කලාවේ ගුණාත්මක බව රැක ගන්න වෙහෙසෙන සොඳුරු නිර්මාණකරුවෙක්. තමන්ගේ වර්තමාන කලා කටයුතු සම්බන්ධයෙන් අශේන් අපිත් එක්ක කතාබහට එකතු වුණේ මෙහෙමයි.
මේ දවස්වල සම්බන්ධ වෙලා ඉන්න කලා කටයුතු ගැන මතක් කරලම අපි කතාබහ ආරම්භ කරමු?
ජානක වික්‍රමසිංහ සහ සශිකා නිසංසලා ගායනා කරන “අඬන්න ඇයි කාරණේ” කියන ගීතයේ රූප රචනාව තමයි අන්තිමට කළේ.
අධ්‍යක්ෂණය පැත්තෙන් අන්තිමට සම්බන්ධ වුණු ටෙලි නාට්‍ය ගැන කතා කළොත්?
මම අධ්‍යක්ෂණය කරපු “සනහස” කියන ඒකාංගික ටෙලිනාට්‍ය පසුගිය ඇසළ පෝය දවසේ විකාශනය වුණා. ඒක තමයි අන්තිමට අධ්‍යක්ෂනය කළේ. ඒකට ගොඩක් හොඳ ප්‍රතිචාර ලැබෙනවා.
ඒකාංගික ටෙලි නාට්‍ය අධ්‍යක්ෂවරයෙක් විදියට ඔබ ප්‍රේක්ෂකයෝ අතරට ඇවිත් දැන් කාලයක් ගත වෙලා තියෙනවා. ඒ කාලය තුළ කරපු නිර්මාණ ගැන පොඞ්ඩක් කතා කළොත්?
මම මේ වෙද්දී ඒකාංගික ටෙලි නාට්‍ය 9ක් අධ්‍යක්ෂණය කරලා තියෙනවා. ලැබුණු ආරාධනා හින්දා තමයි ඒ හැම එකක්ම අධ්‍යක්ෂණය කළේ. ඒ වගේම විශේෂ දින සඳහා තමයි ඒ නාට්‍ය අධ්‍යක්ෂණය කළෙත්. පෝය දින, ලෝක ළමා සහ වැඩිහිටි දිනය, පරිසර දිනය, නිදහස් දිනය, නත්තල් දිනය, කාන්තා දිනය ගුරු දිනය සහ අම්මාවරුන්ගේ දිනය වෙනුවෙනුත් මම ටෙලි නාට්‍ය නිර්මාණය කරලා තියෙනවා.
මේ තරම් අත්දැකීම් තිබියදීත් දීර්ඝ ටෙලි නාට්‍යයක් අධ්‍යක්ෂණය සඳහා යොමු වෙන්නේ නැත්තේ ඇයි කියලා ඇහුවොත්?
දීර්ඝ ටෙලි නාට්‍යයක් කරන්න ඕනෑ කියලා මටත් දැන් හිතෙනවා. ළඟදිම ඒක කරන්න තමයි හිතා ගෙන ඉන්නේ.
ඒ කියන්නේ අශේනුත් මෙගා පැත්තට යනවා කියන එකද?
අපෝ නැහැ. මම මෙගා ටෙලි නාට්‍යවල රඟපාලත් නැහැ. ඒ වගේව කවදාවත් මෙගා ටෙලි නාට්‍යයක් අධ්‍යක්ෂණය කරන්නෙත් නැහැ. හොඳ නිර්මාණයක් කරන්න තමයි මට ඕනෑකම තියෙන්නේ. ඒ සඳහා අවශ්‍ය හැදෑරීම්වල මේ දවස්වල නිරත වෙලා ඉන්නවා.
අශේන් මේ දවස්වල සංගීතයට සම්බන්ධ ලොකු වැඩකටත් අත ගහලා කියලා දැන ගන්න ලැබුණා. අපි ඒ ගැන කතා කරමු?
ඔව්. අපි “ගිමන් හරින තොටුපොළ” නමින් ගීත 16ක සංගීත ඇල්බමයක් නිර්මාණය කෙරුවා. එහි ශ්‍රව්‍ය ද්‍රශ්‍ය අධ්‍යක්ෂවරයා විදියට කටයුතු කළේ මම. ඉතා ඉක්මනින්ම ඒ ඇල්බම් එක රසිකයන් අතරට පත් කරන්න බලාපොරොත්තු වෙනවා.
ගීත ඇල්බම් නිකුත් වෙන්නේ නැති කාලෙක මේ වගේ වැඩකට අත ගහන්න ඇයි හිතුවේ?
ලංකාවේ ප්‍රවීණ ගායන ශිල්පීන්ගේ නව නිර්මාණ අහන්න ලැබෙන්නේ නැති අඩුව පිරවීමේ අදහසින් තමයි පෞද්ගලික ආයතනයක් එක්ක එකතු වෙලා අපි මේ වැඬේ පටන් ගත්තේ. වික්ටර් රත්නායක, ටී. එම්. ජයරත්න, නීලා වික්‍රමසිංහ, අමරසිරි පීරිස්, ජගත් වික්‍රමසිංහ, ශාලිත අබේවික්‍රම, එඞ්වඞ් ජයකොඩි, චරිතා ප්‍රියදර්ශනී පීරිස්, සමන්ත පෙරේරා, සේනානායක වේරලියද්ද වගේ අපේ රටේ ප්‍රවීණ දක්ෂ ගායක ගායිකාවන් රැසකගේ ගීත තමයි මෙහි ඇතුළත් වෙන්නේ. ඊට අමතරව මගේ දුව හිරුනි හංසිනීත් එහි ගීත දෙකක් ගායනා කරනවා.
මේ ගීත හැදුණු විදිය ගැන අපි කතා කළොත්?
අපේ ජීවිතවලට වැදගත් වන විවිධ කාරණා තමයි අපි ඒ ගීතවල තේමා විදියට යොදා ගත්තේ. රත්න ශ්‍රී විජේසිංහ, මහින්ද දිසානායක, කුලරත්න ආරියවංශ, මාලනී ජයරත්න, යමුනා මාලනී පෙරේරා, බන්දුල නානායක්කාරවසම් වගේ ප්‍රවීණයින් අතින් තමයි ඒ ගීත රචනා වුණේ. ඒ වගේම නවරත්න ගමගේ, රෝහණ වීරසිංහ, වික්ටර් රත්නායක සහ මහින්ද බණ්ඩාර වැනි ප්‍රවීණ සංගීත අධ්‍යක්ෂවරු තමයි ඒ ගීතවල සංගීතය නිර්මාණය කළේ. ඉතාම ඉක්මනින් ඒ ගීත රසිකයන් අතට පත් කරන්න අපි බලාපොරොත්තු වෙනවා.
අධ්‍යක්ෂණය පැත්තට යොමු වුණායින් පස්සේ අශේන් රඟපාන එක නවත්තලාද කියලා කවුරු හරි ඇහුවොත්?
අපෝ නැහැ. මම පසුගිය සතියෙදිත් ටෙලි නාට්‍යයක රූගත කිරීම් සඳහා සම්බන්ධ වුණා. අඹ යහළුවෝ රඟපෑවට පස්සේ මේ වනතුරු මම ටෙලි නාට්‍ය 120ක විතර රඟපාලා තියෙනවා.
අවසන් වශයෙන් මම මෙහෙම අහන්නම්. අඹ යහළුවෝ රඟපාන කාලෙත් එක්ක ගත්තම වර්තමානයේ අපේ ටෙලි නාට්‍ය කලාව ගැන මොකද හිතෙන්නේ?
ලොකු වෙනසක් තියෙනවා. ඒ කාලෙට වඩා මේ වෙද්දී හිතට දැනෙණ නිර්මාණ බිහිවීමේ අඩුවක් තියෙනවා. ඒත් මේ තත්ත්වය වෙනස් කරන්න අපිට පුළුවන් දේ කරන්න ඕනේ. ඒක වෙනස් කරන්න තනියෙන් හරි කරන්න පුළුවන් දේ කරනවා කියලත් කියන්න ඕනෑ.
චන්දන පොන්නම්පෙරුම