කලාව අප කාටත් පොදු දෙයක්. සමහරුන්ට නටන්න, ගයන්න, සිතුවම් අඳින්න පුළුවන්. තවත් සමහරුන්ට මූර්ති, කැටයම් කලාව පුළුවන්. මේ සියලු දක්ෂතාවන් ඔවුන් අරගෙන එන්නේ සහජයෙන්මයි. ඉතින් එවැනි දක්ෂතාවන් රැසක් ඉතා අපූරුවට පිහිටපු ශිල්පිනියක් සමගයි අද අපේ කතාබහ ඇරැඹෙන්නේ. ඇය නෙයි සාරා. පසුගියදා නිමාවට පත්වුණු ‘වරකත’ ටෙලිනාට්යයේ මාලා ඔබට මතක ඇති. ඇය මාලා චරිතයට පණපොවමින් ප්රේක්ෂක ආදරය දිනාගත්තා. අපි දැන් නෙයි සාරාගෙ කතාව අහමු. Sri Lanka Latest News
සාරා ඉතින් කොහොමද?
හොඳින් ඉන්නවා. මේ දිනවල ‘සිත නිදි නෑ’ ටෙලිනාට්යය සමග කාලය ගතකරනවා. ඒ වගේම පසුගිය දිවස්වල නිර්මාණ කිහිපයකට සම්බන්ධ වුණා. මේ දවස්වල වේයන්ගොඩ ප්රේක්ෂක ජනතාවට රසවිඳින්න වේදිකා නාට්යයක් ගෙන එන්න මමයි මගේ යාළුවෙකුයි එකතු වෙලා සංවිධාන කටයුතු කරනවා.
ඔබ මුලින්ම මේ ක්ෂේත්රයට සම්බන්ධ වුණු විදිය ගැන කතා කළොත්?
මම 2019 වර්ෂයේ නිරූපිකාවක් ලෙස තමයි මේ ක්ෂේත්රයට සම්බන්ධ වෙන්නේ. පැජන්ට් එකක් හරහා අවසන් 12 දෙනා අතරට මම තේරුණා. මම මේ ක්ෂේත්රයට සම්බන්ධ වෙන්න හිතවලත් තිබුණේ නැහැ. වජිර විජේවර්ධන සර් ළඟ මම නිවේදන කටයුතු හැදෑරුවා. මම මුස්ලිම්. මේ ක්ෂේත්රයට සම්බන්ධ වෙන නිසා මට ගොඩක් හිතන්න වුණා. වජිර සර් තමයි මගේ දක්ෂතාව හඳුනාගෙන මට නිවේදනයට වඩා රංගනය පැත්තෙන් ඉදිරියට යන්න පුළුවන් කියලා කිව්වේ. ඉතින් අවුරුදු කිහිපයකට පසු රංගනයට පිවිසුණා.
ඔබව ගොඩ දෙනෙක් හඳුනා ගත්තේ ලොකු නෝනා හරහා?
ඔව්. ‘කුජීත ෆිල්ම්ස්’ යූටියුබ් නාලිකාවේ ලොකු නෝනා චරිතයට මට ගොඩක් දෙනෙක්ගේ ආදරය ලැබුණා.
සාරාගේ ආගම, සංස්කෘතිය පැත්තෙන් ප්රශ්නයක් මතුවුණේ නැද්ද මේ ක්ෂේත්රයට සම්බන්ධ වීම නිසා?
එහෙම කිසිම ප්රශ්නයක් ආවේ නැහැ. මිනුවන්ගොඩ මුස්ලිම් පල්ලියෙන් මට ලොකු සහායක් ලැබුණා. ඒ නිසා මගේ ගමනේ පාර ලස්සනට හදාගෙන හෙමිහිට මේ ගමන යනවා.
‘වරකත’ ඒ ගමන් මගේ රසමුසු නවාතැන්පළක් වුණා?
මගේ ජීවිතයේ සොඳුරුම නවාතැන්පළ තමයි ‘වරකත’ ටෙලිනාට්යයේ මාලා කියන චරිතය. මිහිර සිරිතිලක අයියට මම ගොඩක් ස්තුතිවන්ත වෙනවා මට මේ චරිතය සඳහා අවස්ථාව ලබාදුන්නට. මාලා චරිතයට මට පුළුවන් උපරිම සාධාරණයක් කළා කියලා මම හිතනවා. මැටි ගොඩක් පදම් කරලා හදනවා වගේ මිහිර අයියා මගේ හැම දේම හැදුවා. දෙබස් උච්චාරණයේදී මට පොඩි පොඩි වචන උච්චාරණය කරන්න අපහසුතාවක් තිබුණා. ඉසුරු අයියා, දමයන්ති අක්කා, නිරෝෂා අක්කා ඇතුළු මුළු කණ්ඩායමෙන් මට මාරම සපෝට් එකක් දුන්නේ. මාලා චරිතය මගේ වාසනාවට ලැබුණු චරිතයක්.
මාලා වගේ ගොඩදෙනෙක්ට සමාජය තුළ සිදුවෙන්නේ අසාධාරණයක් නේද?
ගැහැනියක් විදියට මම හිතනවා අවංකව ආදරය කරන පිරිමි හමුවෙනවා අඩුයි. ගොඩක් දුරට මිනිස්සු ආදරය කරන්නේ ලබාගන්න බැරි දේවල්වලට. මෙතැනදී මාලා වුණත් හිතන්නේ නැති කෙනකුට ආදරය කරනවා. මාලාට වලව්වේ හාමුගේ අවංක ආදරය ලැබෙනවා. සාමාන්ය ජීවිතයේ බොහෝ අය මාලා වගේ ආදරයකින් බැඳුණාම, ඇය මවක් වුණා කියලා දැනගත්තාම අත්හැරලා දානවා. ඒත් මාලාට ඒ අසාධාරණය නොවී ඔහුගේ සැමියා ලැබුණා. ඒ වෙලාවේ මට දැනුණේ ඒ දේ මට ලැබුණා වගේ හැඟීමක්. මාලා වගේ අය මේ රටේ ඕනෑ තරම් ඇති. ඒ වගේ අයට කිසිම අසාධාරණයක් නොවී අවංක ආදරයක් ලැබෙන්න කියලා මම ප්රාර්ථනා කරනවා.
සාරාගේ ජීවිතයට සමාන ගති ලක්ෂණ මාලා චරිතය තුළ ඔබ අත්වින්දාද?
මගේ ජීවිතයට සමානකම් තිබුණු විශේෂ අවස්ථා කිහිපයක් මාලා චරිත ස්වභාවය තුළ ගැබ්වෙලා තිබුණා. මම දෙදරු මවක්. මට දුවලා දෙන්නෙක් ඉන්නවා. මමත් තනිවෙලා ඉන්නේ. ඒ වගේම තමයි මාලාගේ ජීවිතයෙත් ප්රශ්න රැසකට ඇයට මුහුණ දෙන්න සිදුවුණු අවස්ථා තිබුණා. අම්මා කෙනෙක් විදියට මගේ ජීවිතයට මුහුණ දුන්න අවස්ථා තියෙනවා. මගේ ජීවිතයේ ඒ ලබපු අත්දැකීම් එකතු කරගෙන මම චරිතය හොඳට රඟපෑවා. චරිතය වෙනුවෙන් මගේ බාහිර ස්වරූපයවත් මම වෙනස් කළේ නැහැ.
ඔබ කාලයක් මේ ක්ෂේත්රයෙන් දුරස් වීමට හේතුව?
තාත්තාගේ මරණයෙන් පසු මම ගොඩක් මානසිකව වැටුණා. කලාව ගැන හිතන්න තරම්වත් මට මානසික මට්ටමක් තිබුණේ නැහැ. මගේ තාත්තා නොසිටින්න මම අද කලාවේ නැහැ. මගේ තාත්තා තමයි මම කරන්න කැමැති දේට පාර පෙන්නුවේ. මගේ අයියලා මගේ ගමනට විරුද්ධ වුණත් තාත්තා තමයි කිව්වේ ‘මම බලාගන්නම් ඒ දේවල් කියලා.’ මගේ ජීවිතයේ ශක්තිය තාත්තා. මට දැන් ලොකු දුකක් තියෙනවා මගේ මේ හොඳම කාලයේ මගේ රඟපෑම් දකින්න ඔහු ජීවතුන් අතර නැති එක ගැන. මට හිතෙනවා තාත්තා කොහේ හරි ඉඳගෙන මගේ දක්ෂතාව බලාගෙන ඇති කියලා.
වසන්ත විතාරණගේ
