කොමර්ෂල් බැංකුව Fiserv සමග ‘ComBank Digital’ අරඹයි

ඇමෙරිකාව පදනම් කරගත් මූල්‍ය සේවා තාක්ෂණ සැපයුම්කරුවෙකු වන Fiserv විසින් බලගන්වන ‘ComBank Digital’’ ඇප් එක හඳුන්වා දෙමින් කොමර්ෂල් බැංකුව විසින් තම සියලුම අන්තර්ජාල සහ ජංගම දුරකතන බැංකුකරණ නාලිකාවන් තනි ප්‍රවේශයකට ගොනුකර තිබේ.

අන්තර්ජාල බැංකුකරණ, ජංගම දුරකතන සහ ජංගම බැංකුකරණ ඇප් පහසුකම් ඇතුළු අන්තර්ජාල සහ ජංගම දුරකතන බැංකුකරණ නාලිකාවන් කොමර්ෂල් බැංකුව විසින් ඉතාමත් ආරක්ෂිත නව එක් සපිරි නාලිකාවක් තුළට ගොනුකර තිබෙන අතර ප්‍රතිචාර දැක්විය හැකි මෙම වෙබ් අයදුම පුද්ගලික සහ ව්‍යාපාරික ගනුදෙනුකරුවන්ට භාවිතා කිරීමේ හැකියාව තිබේ.
කොමර්ෂල් බැංකුව සඳහන් කරන්නේ ‘ComBank Digital’’ සතුව බැංකුවටම ආවේණික ජංගම දුරකතන ඇප් එකක් තිබෙන නිසා එමගින් ගනුදෙනුකරුවන්ට තමන්ගේ මූල්‍ය ගනුදෙනු ඉතාමත් පහසුවෙන් සහ ආරක්ෂිතව ඕනෑම ස්ථානයක සිට සිදුකිරීමේ අවස්ථාව ලබාදෙන බවයි. මෙම ජංගම දුරකතන අයදුම iOs සහ Android යන මෙහෙයුම් පද්ධති දෙකෙහිම ක්‍රියාකළ හැකි අතර මෙය භාවිතා කරන්නන්ගේ ආරක්ෂාව තහවුරු කිරීම වෙනුවෙන් තිබෙන අන්තර්ජාතික ප්‍රමිතීන්ට සහ යහ ක්‍රමවේදයන්ට අනුකූලව සකස් කර ඇත.