“මුළු ජීවිතයම එක අතකට අත්හැරීම තමයි.
මට හිතෙන්නෙ එහෙමයි.
ඒත් දුකට හේතුව නම්,
එකම එක මොහොතක
ඉඩක් නොතබාම යන්නට වීමයි”
ඉර්ෆාන් එහෙම කියන්නෙ ඔහු රඟපෑ Life of Pi චිත්රපටයේ දෙබසක. දෛවයේ සරදමක්දෝ ඔහු, ඔහුගේ ජීවිතයට සමුදෙන්නෙත් ඒ විදිහටමයි.
1967 ජයපූර්හි සාමාන්ය පවුලක උපත ලබන සහබ්සාඞ් ඉර්ෆාන් අලී ඛාන්, අති දැවැන්ත, දිදුලන ඉන්දීය සිනමා කර්මාන්තය ඇතුළෙ නළුවෙක් විදිහට ජීවිතය හමාර කරයි කියල කවුරුත් හිතන්න නැතුව ඇති. හමේ වර්ණය, ලස්සන, හිනාව ප්රමුඛ කරගත් සිනමාවක් ඇතුළෙ ඒ කිසිවක් නොමැතිව නළු සිහිනය සැබෑ කරගන්න ඉර්ෆාන් විප්ලවයක් කරනව විතරක් නෙමෙයි, අන්තිමේදී ඒ අතර තමාගේ නම ඉහළින්ම සටහන් කරගන්නත් ඉර්ෆාන්ට හැකියාව ලැබෙනව. “මිනිස්සු දකින්න කැමැති මගේ වැඩ, මගේ මූණ නෙමෙයි” එහෙම කියන ඉර්ෆාන් හිමින් තමන්ගෙ ගමන යනව. ඔහුගේ ඒ ගමනේ සාර්ථකත්වය කෙතරම්ද කියනවනම් ඉන්දීය අගමැතිවරය පවා ඔහුගේ වියෝව වෙනුවෙන් ශෝක පණිවුඩක් තියනව.
“ඉර්ෆාන් ඛාන්ගේ අභාවය ලෝක සිනමාවට හා කලාවට වූ අහිමිවීමකි. විවිධ මාධ්යයන් ඔස්සේ ඔහු කළ විවිධාකාර රංගනයන් නිසා ඔහු අප මතකයේ සදා රැඳෙනු ඇත. මාගේ සිතුවිලි ඔහුගේ පවුලේ අය, මිතුරන් හා ඔහු අගය කරන්නන් සමග ඇත. ඔහුගේ ආත්මය සුවපත් වේවා” මේ ඉන්දීය අගමැති ඔහුගේ ට්විටර් ගිණුමේ ඉර්ෆාන් ගැන සටහන් කර තිබූ ආකාරයයි.
කෙනෙක්ගෙ ජීවිතය වෙනස් වෙන මොහොත මොකක්ද කියල හරියට කියන්න කාටවත්ම බෑ. ඒත් ඉර්ෆාන්ගෙ ජීවිතයෙ සම්පූර්ණයෙන්ම වෙනස් වෙන්නෙ එම්.ඒ. උපාධිය සඳහා මුම්බායට පැමිණීමත් සමඟ. උපාධිය හදාරමින් සිටින අතරතුර ඉර්ෆාන්ට රංගනය පිළිබඳ හදාරන්න ඉන්දීය ජාතික නාට්ය පාසලේ ශිෂ්යත්වයක් හිමිවෙනව. එයින් ලැබෙන පන්නරයෙන් සිනමාව සඳහා මුල්පොත තබන ඉර්ෆාන් තම සිනමා ගමන නොසිතූ විදිහට නතර කරන්නෙ ‘පද්ම ශ්රී’ සම්මානයෙන් පවා පිදුම් ලබල. ඉන්දීය රජය විසින් පුදකරනු ලබන ඉහළම සම්මානයක් වන ‘පද්ම ශ්රී’ සම්මානයෙන් 2011 වසරෙදි ඔහු පුද ලබන්නෙ ඉන්දීය සිනමාවට හා කලාවට දැක්වූ සුවිශේෂී දායකත්වය වෙනුවෙන්.
ඉන්දීය ජාතික නාට්ය පාසලේ රංගනය හැදෑරීමෙන් පසු ‘චානක්ය’, ‘භාරත් ඒක් කොජ්’, ‘බනේගි අප්නි බාත්’, ‘චන්ද්රකාන්ත’, ‘ස්ටාර් බෙස්ට්සෙලර්’ වැනි ජනප්රිය ප්රසංග රැසකට සහභාගි වෙන්න ඉර්ෆාන්ට අවස්ථාව ලැබෙනව.
“කවුරුහරි සිනමා ශාලාවෙන් එළියට ආවට පස්සෙ ඔහුට මගේ රංගනය ගැන ආයෙ ආයෙ මතක් වෙන්නැත්නම් අන්න එතනදි මට මං ගැනම අවුල් යනවා” එහෙම කියන ඉර්ෆාන්ගෙ සිනමා ගමන ආරම්භ වෙන්නෙ 1988 මිරා නයාර් අධ්යක්ෂණය කළ ‘සලාම් බොම්බේ’ චිත්රපටයෙන්. මුල්කාලීනව දුෂ්ට චරිත හා සහාය චරිත රඟපාන ඔහු 2004දි ටිග්මන්ෂු දුලියා අධ්යක්ෂණය කළ Haasil චිත්රපටයේ රංගනය වෙනුවෙන් හොඳම දුෂ්ට නළුවාට හිමි ෆිල්ම් ෆෙයාර් සම්මාන හිමිකරගන්නව. එතැනින් ආරම්භ වන ඔහුගෙ සම්මාන දඩයම අවසන් වෙන්නෙ 2018 ‘හින්දි මීඩියම්’ චිත්රපටයේ හොඳම නළුවාට හිමි ෆිලිම් ෆෙයාර් සම්මානය හිමිකර ගැනීමෙන්. දුෂ්ටයාගෙන් ඇරැඹි සිනමා ගමන ඔහු හොඳම නළුවාගෙන් අවසන් කරන්නෙ ‘ෆිල්ම් ෆෙයා’ සම්මාන 4ක්, ‘ඉන්දීය ජාතික’ සම්මානයක් ඇතුළු ප්රමුඛ පෙළේ සම්මාන 30කට වැඩි සංඛ්යාවක් තමන් සතුකරගෙන.
“මට මිනිසුන්ව පිනවීමට අවශ්යය. එහෙත් ඒ යම්කිසි ගැඹුරක් සමඟය” කියූ ඉර්ෆාන් තම දශක තුනක් තරම් වන රංගන දිවිය තුළ ‘හසීල්’, ‘මැක්බූල්’, ‘ලයිෆ් ඉන් මෙට්රෝ’, ‘පාන් සිං තෝමාර්’, ‘ද ලන්ච්බොක්ස්’, ‘හයිඩර්’, ‘පිකු’ සහ ‘තල්වාර්’ වැනි ජනප්රිය බොලිවුඞ් චිත්රපට වගේම ‘ද නමේසේක්’, ‘ද ඩාර්ජිලිං ලිමිටඞ්’, ‘ස්ලම්ඩෝග් මිලියනය’, ‘ලයිෆ් ඔෆ් පයි’ සහ ‘ජුරාසික් වර්ල්ඞ්’ වැනි හොලිවුඞ් චිත්රපට 50කට ආසන්න සංඛ්යාවකට තම රංගනය දායකත්වය ලබාදෙනව.
2018 වර්ෂයේ ඉර්ෆාන් ඉතාම දුර්ලභ ගණයේ පිළිකා රෝගයකින් පීඩා විඳින බව දැනගන්නව. පිළිකා මාරයාව පරද්දන්න ඔහු එංගලන්තයේ රෝහලකින් පවා ප්රතිකාර ලබාගත්තත් ඔහුට පුළුවන් වෙන්නෙ තාවකාලිකව ඒක යටපත් කරගන්න විතරයි. මහ බඩවැලේ ඇතිවුණ ආසාදනයක් හේතුවෙන්
පසුගිය අප්රේල් 28 වැනිදා මුම්බාහි රෝහලකට ඇතුළත් වන ඔහුට නැවත ගෙදර එන්න ලැබෙන්නෙ නෑ. ඊට දින තුනකට පෙර මෙලොව හැර දමා යන තම මවගේ දේහය පවා දැකගන්නට නොලැබුණු ඉර්ෆාන් ඇයව බැලීමට මෙන් අප්රේල් 29 වැනිදා මෙලොවින් නික්ම යනව. බිරිඳ සුපාතා සිඞ්කාර්ට හා පුතුන් දෙදෙනා වන බාබිල් සහ අයන්ට නැවත තම රුව සිනමා පටයකින් පමණක් දැකීමට ඉඩ සලස්වා ඔහු තම සිනමා ගමන මෙන්ම ජීවන ගමනද නිමා කරනවා.
“ඇදහිය නොහැකි දක්ෂතාවයක්. කරුණාවන්ත සගයෙක්. සිනමා ලෝකයට දැක්වූ විශාල දායකත්වයක්. ඔහු ඉතා ඉක්මනින් අප හැර ගියේය. ඔහු අපට විශාල රික්තයක් නිර්මාණය කරයි,” ‘පිකු’හි ඔහු සමඟ වැඩ කළ සුපිරි නළු අමිතාබ් බච්චන් ඉර්ෆාන් ගැන ට්විටර් පණිවුඩයක් තබා තිබුණේ එසේය.
ඉතින් ඉර්ෆාන් ‘ලොව ඇත්තේ යෑම් ඊම් පමණය. නෑවිත් යන්නට බැරිය. නොගොස් එන්නට බැරිය” ඔබට සුබ ගමන්.
ඉන්දික වික්රමරත්න
